Tanakpur-Bagheshwar Railway Line:  బ్రిటిష్‌ కాలంలో మొదలైన సర్వే.. ఎట్టకేలకు పూర్తి… నిర్మాణానికి ఎన్నేళ్లో మరి!

Tanakpur-Bagheshwar Railway Line:  నూతన రైల్వే లైన్ల నిర్మాణానికి ఏ దేశంలో అయినా ముందుగా సర్వే చేస్తారు. అనుకూల మార్గంలోనే నిర్మాణాలు చేపడతారు. భారత దేశంలో రైల్వే లైన్ల విస్తరణ వేగంగా జరుగుతోంది. రవాణా సౌకర్యాలను మెరుగు పర్చేందుకు రైల్వే శాఖ వివిధ మార్గాల్లో నూతన రైల్వే లైన్లు నిర్మిస్తోంది. అయితే ఓ రైల్వే లైన్‌ నిర్మాణానికి చేపట్టిన సర్వే పూర్తి చేయడానికి 112 ఏళ్లు పట్టింది. బ్రిటిష్‌ కాలంలో మొదలైన ఈ సర్వే.. ఎట్టకేలకు పూర్తయింది.

170 కి.మీ పొడవు..
ఉత్తరాఖండ్‌లోని తనక్పూర్–భాగేశ్వర్‌ రైలు మార్గానికి సబంధించి 170 కిలోమీటర్ల రైల్వే లైన్‌ నిర్మాణానికి 1882లోనే అడుగులు పడ్డాయి. ఈ రైల్వే లైన్‌ కోసం 1912లో సర్వే జరిగింది. నాటి నుంచి నేటి వరకు మొత్తం ఏడు సర్వేలు జరిగాయి. రెండేళ్లపాటు సాగిన సర్వేలో తుది నివేదికను స్కైలైన్‌ ఇంజినీరింగ్‌ డిజైస్‌ సంస్థ తాజాగా రైల్వే శాఖకు అందజేసింది. 170 కిలోమీటర్ల ఈ రైలు మార్గం నిర్మాణానికి రూ.49 వేల కోట్లు ఖర్చవుతుందని అంచనా. ఈ రైల్వేలైన్‌ నిర్మాణం జరిగితే నేపాల్, చైనా సరిహద్దు వరకు చేరుకోవడం సులభం అవుతుంది.

తుది నివేదికలో ఇలా..
తాజాగా సమర్పించిన తుది నివేదిక ప్రకారం.. తనక్పూర్‌–భాగేశ్వర్‌ మధ్య రైల్వే మార్గ చేపడితే 12 రైల్వే స్టేషన్లు నిర్మించాల్సి ఉంటుంది. ఈ స్టేషన్లు 170 కిలోమీటర్ల రైల్వే మార్గంలోనిర్మించాల్సి ఉంటుంది. అలాగే ఈ లైన్‌ కోసం 452 హెక్టార్ల భూమిని సేకరించాల్సి ఉంటుంది. దీనిలో 27 హెక్టార్ల భూమి ప్రైవేటు వ్యక్తుల చేతుల్లో ఉంది.

ప్రాముఖమైన ప్రాజెక్టుగా…
తనక్పూర్‌–భాగేశ్వర్‌ రైలు మార్గాన్ని 2012లో అప్పటి కేంద్ర ప్రభుత్వం జాతీయ ప్రాముఖ్యత కలిగిన ప్రాజెక్టుగా పరిగణించింది. అప్పట్లో ఈ రైల్వే లైన్ మార్గంలో 54 కిలోమీటర్ల మేర 72 సొరంగాలను ప్రతిపాదించారు. కాళీ నది ఒడ్డున తనక్పూర్‌ నుంచి పంచేశ్వర్‌ వరకు రైల్వే మార్గం నిర్మించాల్సి ఉంటుంది. అల్మోరా, పితోర్డ్, చంపాత్, భాగేశ్వర్‌ జిల్లాలకు ఈ రైల్వేలైన్‌ నిర్మాణంతో ప్రయోజనం చేకూరుతుంది. పర్వత ప్రాంతాలకు వెళ్లే మార్గం సులభతరం కావడంతోపాటు పర్యాటక రంగానికి ఆదరణ లభిస్తుంది. చైనా, నేపాల్‌ సరిహద్దులకు దగ్గరగా ఉన్న ఈ రైలే మార్గానికి వ్యూహాత్మక ప్రాముఖ్యత కూడా ఉంది.

నిర్మాణానికి ఎన్నేళ్లో..
అత్యంత ప్రాముఖ్యత ఉన్న ఈ రైల్వే లైన్‌ సర్వేకు 112 ఏళ్లు పట్టింది. మరి నిర్మాణం ఎప్పుడు ప్రారంభిస్తారు. తుది నివేదికను ఓకే చేసి నిర్మాణం చేపట్టినా పూర్తి చేయడానికి ఎన్నేళ్లు పడుతుంది అన్న సందేహాలు వ్యక్తమవుతున్నాయి.