Kalki Bhagwan : ఆధ్యాత్మిక ప్రపంచంలో ప్రముఖుడిగా గుర్తింపు పొందిన కల్కీ భగవాన్ కన్నుమూశారు. కొంతకాలంగా అనారోగ్యంతో బాధపడుతున్న ఆయనను సుమారు పది రోజుల క్రితం చెన్నైలోని ఓ ప్రైవేట్ ఆసుపత్రిలో చేర్పించారు. చికిత్స పొందుతూ మంగళవారం మధ్యాహ్నం 3 గంటల సమయంలో తుదిశ్వాస విడిచారు. ఆయన అసలు పేరు విజయ్కుమార్ నాయుడు. సాధారణ ఎల్ఐసీ క్లర్క్గా జీవితం ప్రారంభించిన ఆయన.. అనంతరం ఆధ్యాత్మిక గురువుగా మారి ప్రపంచవ్యాప్తంగా అనుచరులను సంపాదించుకున్నారు. అయితే ఆయన జీవితం కేవలం ఆధ్యాత్మిక బోధనలకే పరిమితం కాలేదు. సేవా కార్యక్రమాలతో పాటు పలు వివాదాలు, ఆరోపణలు, ఐటీ దాడులు కూడా ఆయన ప్రస్థానంలో కీలక మలుపులుగా నిలిచాయి.
ఎల్ఐసీ క్లర్క్గా మొదలై..
1949లో తమిళనాడులో జన్మించిన విజయ్కుమార్ నాయుడు అక్కడే విద్యాభ్యాసం పూర్తి చేశారు. అనంతరం లైఫ్ ఇన్సూరెన్స్ కార్పొరేషన్ ఆఫ్ ఇండియాలో క్లర్క్గా ఉద్యోగ జీవితం ప్రారంభించారు. 1977 జూన్ 9న పద్మావతిని వివాహం చేసుకున్నారు. ఆ తర్వాత ఆయన జీవిత గమనం క్రమంగా ఆధ్యాత్మికత వైపు మళ్లింది.
చిత్తూరు జిల్లా కుప్పం నియోజకవర్గంలోని రామకుప్పం మండలం రాజుపేట సమీపంలో ‘జీవాశ్రమం’ పేరుతో రెసిడెన్షియల్ స్కూల్ను ప్రారంభించారు. విద్యతో పాటు ఆధ్యాత్మికతపై దృష్టి పెట్టిన ఆయన.. 1990 ప్రాంతంలో తాను ‘కల్కి అవతారం’ అని ప్రకటించుకున్నట్లు ప్రచారం జరిగింది. ఆయన సతీమణి పద్మావతి ‘అమ్మ భగవాన్’గా భక్తులకు పరిచయమయ్యారు.
ఆధ్యాత్మిక సామ్రాజ్యంగా ఎదిగిన ప్రస్థానం
తమిళనాడులోని తిరువళ్లూరు సమీపంలోని నేమం ప్రాంతం నుంచి కల్కీ భగవాన్గా ఆధ్యాత్మిక బోధనలు కొనసాగించారు. అనంతరం తిరుపతి జిల్లా వరదయ్యపాళెం పరిసర ప్రాంతాల్లో ఆధ్యాత్మిక కేంద్రాలు, ట్రస్టులు ఏర్పాటు చేశారు.
2005లో భారీ వ్యయంతో నిర్మించిన తెల్లటి పాలరాతి నిర్మాణం ప్రత్యేక ఆకర్షణగా నిలిచింది. అనంతరం ఈ ప్రాంతం దేశ, విదేశాల నుంచి వచ్చే భక్తులకు ప్రధాన ఆధ్యాత్మిక కేంద్రంగా మారింది.
ధ్యానం, ఆధ్యాత్మిక శిక్షణ, ముక్తి దీక్ష వంటి కార్యక్రమాలను నిర్వహిస్తూ పెద్ద సంఖ్యలో అనుచరులను ఆకర్షించారు. విదేశాల నుంచి కూడా భక్తులు ఆయన ఆశ్రమాలకు వచ్చేవారు.
సేవా కార్యక్రమాలపై కూడా దృష్టి
కల్కీ భగవాన్కు సంబంధించిన సంస్థలు కేవలం ఆధ్యాత్మిక కార్యక్రమాలకే పరిమితం కాలేదు. గ్రామీణాభివృద్ధి, విద్య, వైద్యం, తాగునీరు వంటి రంగాల్లో పలు సేవా కార్యక్రమాలు నిర్వహించినట్లు ఆయన సంస్థలు పేర్కొన్నాయి.
వందలాది గ్రామాల్లో తాగునీటి శుద్ధి కేంద్రాలు ఏర్పాటు చేయడం, పేదలకు వైద్య సేవలు అందించడం, ఉచిత వైద్య శిబిరాలు నిర్వహించడం, కంటి ఆపరేషన్లు చేయించడం వంటి కార్యక్రమాలు చేపట్టారు. గ్రామీణ విద్యార్థులకు ఉచిత విద్య, పుస్తకాలు అందించడంతో పాటు పాఠశాలలకు మౌలిక వసతులు కల్పించే కార్యక్రమాలు కూడా చేపట్టినట్లు సమాచారం.
అయితే.. వివాదాలు కూడా తప్పలేదు
ఆధ్యాత్మిక గురువుగా భారీగా పేరు సంపాదించిన కల్కీ భగవాన్ ప్రస్థానంలో కొన్ని వివాదాస్పద ఘటనలు కూడా ఉన్నాయి. గతంలో ఆయన ఆశ్రమాల్లో జరిగిన కార్యక్రమాలకు భారీగా భక్తులు తరలివచ్చేవారు.
2008లో కల్కీ భగవాన్ ఆశ్రమంలో జరిగిన ఓ కార్యక్రమం సందర్భంగా తొక్కిసలాట చోటుచేసుకుని పలువురు భక్తులు మృతి చెందగా, మరికొందరు గాయపడ్డారు. ఈ ఘటన అప్పట్లో తీవ్ర చర్చకు దారితీసింది.
2019.. కల్కీ ఆశ్రమాలకు షాక్
కల్కీ భగవాన్ జీవితంలో అత్యంత కీలకమైన మలుపుల్లో 2019లో జరిగిన ఆదాయపు పన్ను శాఖ సోదాలు ఒకటి. 2019 అక్టోబర్లో ఆయనకు సంబంధించిన ఆశ్రమాలు, కార్యాలయాలు, ఇతర ప్రదేశాల్లో ఐటీ అధికారులు విస్తృతంగా సోదాలు నిర్వహించారు.
ఈ సోదాల్లో భారీగా నగదు, విదేశీ కరెన్సీ, బంగారం లభించినట్లు అప్పట్లో ఐటీ శాఖ వెల్లడించింది. లెక్కల్లో చూపని ఆదాయం, విదేశాల్లో పెట్టుబడులకు సంబంధించిన వివరాలు కూడా వెలుగులోకి వచ్చినట్లు అధికారులు తెలిపారు. ఈ వ్యవహారం దేశవ్యాప్తంగా సంచలనం సృష్టించింది.
ఈ దాడుల అనంతరం కల్కీ భగవాన్ వీడియో సందేశం ద్వారా స్పందించారు. తన ఆధ్యాత్మిక కార్యకలాపాలు, సంస్థలపై వచ్చిన ఆరోపణల నేపథ్యంలో ఆయన చేసిన వ్యాఖ్యలు అప్పట్లో చర్చనీయాంశంగా మారాయి.
ఒకే వ్యక్తి.. రెండు భిన్నమైన కోణాలు
కల్కీ భగవాన్ జీవితాన్ని పరిశీలిస్తే రెండు భిన్నమైన కోణాలు కనిపిస్తాయి. ఒకవైపు సాధారణ ఉద్యోగిగా జీవితాన్ని ప్రారంభించి ఆధ్యాత్మిక గురువుగా ఎదిగి, ప్రపంచవ్యాప్తంగా భక్తులను సంపాదించుకున్న వ్యక్తి. మరోవైపు ఆయన ఆశ్రమాలు, ఆస్తులు, ఆర్థిక వ్యవహారాలపై వివాదాలు, ఆరోపణలు ఎదుర్కొన్న వ్యక్తి.
అయితే ఆయనను అనుసరించిన భక్తులు మాత్రం ఆయనను ఆధ్యాత్మిక మార్గదర్శిగా భావించారు. ధ్యానం, సేవ, మానవతా విలువలపై ఆయన చేసిన బోధనలు తమ జీవితాల్లో ప్రభావం చూపాయని చెబుతుంటారు.
బత్తులవల్లిలో అంతిమ వీడ్కోలు
కల్కీ భగవాన్ పార్థివదేహాన్ని భక్తుల సందర్శనార్థం తిరుపతి జిల్లా వరదయ్యపాళెం మండలం బత్తులవల్లిలోని ఏకం ఆలయ ప్రాంగణంలోని గోల్డెన్ సిటీకి తరలించనున్నారు. శనివారం అక్కడే అంత్యక్రియలు నిర్వహించి, సమాధి చేయనున్నట్లు సమాచారం.
సామాన్య ఎల్ఐసీ ఉద్యోగి నుంచి ‘కల్కీ భగవాన్’గా మారిన విజయ్కుమార్ నాయుడు జీవిత ప్రయాణం.. ఆధ్యాత్మికత, సేవ, భక్తి, వివాదాలు అన్నింటినీ కలగలిపిన ఓ సుదీర్ఘ అధ్యాయంగా ముగిసింది.
