Railway Ticket Booking : రైలు ప్రయాణం చేయాలనుకునే వారికి టికెట్ బుకింగ్ అనేది కొన్నిసార్లు పెద్ద సవాలుగా మారుతుంది. ముఖ్యంగా తత్కాల్ టికెట్లు బుక్ చేసుకునే సమయంలో సర్వర్ స్లో అవడం, క్యాప్చా సమస్యలు, ఎక్కువ స్టెప్స్, ఒకేసారి సమాచారం కనిపించకపోవడం వంటి ఇబ్బందులు ఎదురవుతుంటాయి. ఈ సమస్యలకు పరిష్కారం చూపేలా భారతీయ రైల్వే క్యాటరింగ్ అండ్ టూరిజం కార్పొరేషన్ (IRCTC) తన వెబ్సైట్ను పూర్తిగా రీడిజైన్ చేసింది. దాదాపు 2002లో ప్రారంభమైన తర్వాత తొలిసారిగా ఇంత పెద్ద స్థాయిలో మార్పులు తీసుకొచ్చింది. ఇందులో ప్రధానంగా 5 మార్పులు చేసింది. వీటి ద్వారా ప్రయాణికులకు ఎన్నో ప్రయోజనాలు ఉన్నాయి.
జూలై 15 నుంచి కొత్త వెబ్సైట్ బీటా వెర్షన్ను ప్రయాణికులకు అందుబాటులోకి తీసుకొచ్చారు. ఆధునిక సాంకేతికతతో రూపొందించిన ఈ కొత్త ప్లాట్ఫామ్ ద్వారా టికెట్ బుకింగ్ను వేగవంతంగా, సులభంగా మార్చడంతో పాటు వినియోగదారుల అనుభవాన్ని మరింత మెరుగుపరిచేలా పలు కొత్త ఫీచర్లను ప్రవేశపెట్టారు.
నిమిషానికి 1.5 లక్షల టికెట్ల బుకింగ్ సామర్థ్యం
కొత్త వెబ్సైట్లో అత్యంత కీలకమైన మార్పు టికెట్ బుకింగ్ సామర్థ్యం పెరగడం. గతంలో నిమిషానికి సుమారు 32 వేల టికెట్లు మాత్రమే బుక్ అయ్యేవి. దీంతో తత్కాల్ సమయంలో సర్వర్పై భారీ ఒత్తిడి ఏర్పడి చాలా మంది టికెట్లు బుక్ చేసుకోలేకపోయేవారు. ఇప్పుడు కొత్త సిస్టమ్ ద్వారా నిమిషానికి 1.5 లక్షల వరకు టికెట్లను ప్రాసెస్ చేసే సామర్థ్యాన్ని అందుబాటులోకి తీసుకొచ్చింది. దీంతో బుకింగ్ వేగం గణనీయంగా పెరిగే అవకాశం ఉంది.
క్యాప్చా, పాప్అప్స్కు గుడ్బై..
టికెట్ బుక్ చేసుకునే సమయంలో తరచూ ఎదురయ్యే క్యాప్చా వెరిఫికేషన్, అనవసర పాప్అప్స్ కారణంగా సమయం వృథా అయ్యేది. ముఖ్యంగా తత్కాల్ బుకింగ్ సమయంలో కొన్ని సెకన్ల ఆలస్యం కూడా టికెట్ కోల్పోయే పరిస్థితిని తీసుకొచ్చేది. కొత్త వెబ్సైట్లో వీటిని గణనీయంగా తగ్గించడంతో పాటు బుకింగ్ ప్రక్రియలో ఉండే స్టెప్స్ను కూడా తగ్గించారు. దీంతో ప్రయాణికులు వేగంగా టికెట్ బుక్ చేసుకునే అవకాశం కలుగుతుంది.
అన్ని క్లాసుల వివరాలు ఒకే స్క్రీన్పై..
ఇప్పటి వరకు స్లీపర్, థర్డ్ ఏసీ, సెకండ్ ఏసీ వంటి ప్రతి క్లాస్ వివరాలు వేర్వేరుగా చూసుకోవాల్సి వచ్చేది. కొత్త వెబ్సైట్లో మాత్రం ఒకే స్క్రీన్పై అన్ని క్లాసులకు సంబంధించిన సీట్ల లభ్యత, ఛార్జీలు, వెయిటింగ్ స్టేటస్ వంటి వివరాలు కనిపిస్తాయి. దీంతో ప్రయాణికులు ఒకేసారి అన్ని ఆప్షన్లను పోల్చుకుని తమకు అనుకూలమైన క్లాస్ను ఎంచుకోవచ్చు.
తేదీల వారీగా ఛార్జీల వివరాలు..
కొత్త వెబ్సైట్లో మరో ముఖ్యమైన ఫీచర్ తేదీల వారీగా టికెట్ ధరలను ఒకే స్క్రీన్పై చూపించడం. ఏ తేదీన ప్రయాణిస్తే తక్కువ ఛార్జీ ఉంటుందో, ఏ రోజుల్లో ఎక్కువ డిమాండ్ కారణంగా ధరలు మారుతున్నాయో సులభంగా తెలుసుకోవచ్చు. దీంతో ప్రయాణికులు తమ బడ్జెట్కు అనుగుణంగా ప్రయాణ తేదీని ప్లాన్ చేసుకునే అవకాశం ఉంటుంది.
మల్టీపుల్ లాంగ్వేజేస్ లో టికెట్ బుకింగ్..
దేశవ్యాప్తంగా ఉన్న ప్రయాణికులను దృష్టిలో పెట్టుకుని IRCTC కొత్త వెబ్సైట్లో మల్టీ లాంగ్వేజ్ సపోర్ట్ను అందుబాటులోకి తీసుకొచ్చింది. వివిధ భారతీయ భాషల్లో వెబ్సైట్ను ఉపయోగించే అవకాశం కల్పించడం ద్వారా ప్రాంతీయ భాషల్లో కూడా టికెట్ బుకింగ్ చేయడం సులభమవుతుంది. దీంతో ఇంగ్లీష్పై అవగాహన తక్కువగా ఉన్నవారికి కూడా ఇది ఎంతో ఉపయోగకరంగా మారనుంది.
