JioBharat 4G Phone : దేశంలో 2G ఫోన్లను వినియోగిస్తున్న వినియోగదారులను 4Gకి మార్చే లక్ష్యంతో రిలయన్స్ జియో కీలక ఆఫర్ను ప్రకటించింది. సంస్థ 10వ వార్షికోత్సవాన్ని పురస్కరించుకుని జియో భారత్ 4G ఫీచర్ ఫోన్లపై పరిమిత కాల ఆఫర్ను అందుబాటులోకి తీసుకొచ్చింది. ఈ ఆఫర్లో భాగంగా జియో భారత్ 4G ఫోన్ను రూ.1,499కే కొనుగోలు చేయవచ్చు. అంతేకాకుండా ఆరు నెలల పాటు ఉచిత రీచార్జ్ ప్రయోజనాలను కూడా అందిస్తోంది.
ఈ ఆఫర్లో ప్రతి నెల 14GB డేటాతో పాటు అపరిమిత HD వాయిస్ కాల్స్ లభిస్తాయి. అయితే ఈ ఆఫర్కు ఏయే జియో భారత్ మోడళ్లు అర్హత పొందుతాయనే విషయాన్ని జియో ఇంకా అధికారికంగా వెల్లడించలేదు. పరిమిత కాలం మాత్రమే ఈ ఆఫర్ అందుబాటులో ఉంటుందని కంపెనీ తెలిపింది.
జియో లెక్కల ప్రకారం.. ప్రస్తుతం 2G ఫోన్ వినియోగదారు నెలకు సుమారు రూ.199 రీచార్జ్ కోసం ఖర్చు చేస్తే, ఆరు నెలల్లో దాదాపు రూ.1,200 ఖర్చవుతుంది. అదే కాలానికి సంబంధించిన కనెక్టివిటీ ప్రయోజనాలు రూ.1,499 ప్యాకేజీలోనే లభిస్తుండటంతో ఫోన్ అసలు ధర సుమారు రూ.299గా ఉంటుందని జియో చెబుతోంది. పండుగ సీజన్ను దృష్టిలో ఉంచుకుని 2G నుంచి 4Gకి మారడాన్ని మరింత సులభతరం చేయడమే ఈ ఆఫర్ ఉద్దేశమని పేర్కొంది.
జియో భారత్ ఫోన్లలో కేవలం కాల్స్, డేటా మాత్రమే కాకుండా వినోదం, డిజిటల్ చెల్లింపులు, కుటుంబ భద్రత వంటి ఫీచర్లు కూడా అందుబాటులో ఉన్నాయి. JioTV ద్వారా 500కు పైగా టీవీ ఛానళ్లను వీక్షించవచ్చు. JioHotstar ద్వారా క్రికెట్, సినిమాలు, ఇతర వినోద కార్యక్రమాలను ఆస్వాదించవచ్చు. అలాగే మ్యూజిక్ సేవల ద్వారా లక్షలాది పాటలకు యాక్సెస్ లభిస్తుంది.
డిజిటల్ పేమెంట్ల కోసం JioPay ద్వారా UPI చెల్లింపులు చేసుకునే సదుపాయం ఉంది. పేమెంట్ అలర్ట్స్, సౌండ్బాక్స్ ఫీచర్లు కూడా అందుబాటులో ఉన్నాయి. కుటుంబ సభ్యుల భద్రత కోసం Jio Safety Shieldతో పాటు సేఫ్ కాలింగ్, లొకేషన్ మానిటరింగ్ వంటి సదుపాయాలను కూడా జియో అందిస్తోంది.
కంపెనీ వెల్లడించిన 2.4 అంగుళాల డిస్ప్లే, 2,000mAh బ్యాటరీ, 4G కనెక్టివిటీ వంటి వివరాలు జియో భారత్ B1, B2 ఫోన్ల స్పెసిఫికేషన్లకు దగ్గరగా ఉన్నాయి. అయితే ఈ రెండు మోడళ్లే ఆఫర్కు అర్హమా అనే విషయంపై జియో నుంచి స్పష్టత రావాల్సి ఉంది. మొత్తంగా చూస్తే తక్కువ ధరలో 4G కనెక్టివిటీతో పాటు ఆరు నెలల కాలింగ్, డేటా ప్రయోజనాలు కోరుకునే 2G వినియోగదారులకు ఈ ఆఫర్ ఆకర్షణీయంగా మారే అవకాశం ఉంది.
