Ben Stokes Injury Update: ఇంగ్లాండ్ జట్టు సారధి బెన్ స్టోక్స్ గురించి ప్రత్యేకంగా చెప్పాల్సిన అవసరం లేదు. బ్యాటింగ్ తో పాటు బౌలింగ్ చేస్తాడు. వేగంగా పరుగులు తీస్తాడు. అదే సమయంలో వికెట్లు కూడా తన ఖాతాలో వేసుకుంటాడు. అందువల్లే అతడిని అత్యంత ప్రమాదకరమైన ఆటగాడిగా పిలుస్తుంటారు.
బెన్ స్టోక్స్ ప్రస్తుతం గాయపడ్డాడు. ఆ ఫోటోలను అతడు తన సామాజిక మాధ్యమ ఖాతాల ద్వారా బయటపెట్టాడు. ఆ ఫోటోలలో స్టోక్స్ ను చూస్తుంటే హృదయ విదారకంగా ఉన్నాడు. అతడి కన్ను లొట్ట పోయింది. మూతి వాచిపోయింది. గాయాలు కూడా ఎక్కువ అయ్యాయి.
తనకు గాయాలైన ఫోటోలను స్టోక్స్ సోషల్ మీడియాలో పెట్టాడు. అంతేకాదు.. “గాయాల సంగతి పక్కన పెడితే.. ఇప్పుడు బంతి పరిస్థితి ఎలా ఉంటుందో చూడాల్సి ఉంటుందని” ఒక ఎమోజిని అతడు సూచికగా పేర్కొన్నాడు.
ఇంగ్లాండ్ మీడియాలో మాత్రం ఈ ఘటనపై విభిన్నమైన కథనాలు ప్రసారమవుతున్నాయి.. బ్యాటింగ్ చేస్తున్నప్పుడు అతడు గాయపడలేదని మీడియాలో వార్తలు వచ్చాయి. తన తోటి ప్లేయర్లతో అతడు పక్కనే నిలబడి ఉన్నాడని.. ఆ సమయంలో బంతిని అతడు గమనించలేదని.. అందువల్ల అది అతని ముఖం కుడి వైపు ప్రాంతంలో నేరుగా తాకిందని.. బంతి తాకుతున్నప్పుడు అతడిని బలంగా రాసుకుపోయి ఉంటుందని ఇంగ్లాండ్ మీడియా తన కథనాలలో చెబుతోంది. నిర్విరామమైన క్రికెట్ ఆడుతున్న ఇంగ్లాండ్ టెస్ట్ కెప్టెన్.. ఇటీవల జరిగిన యాషెస్ సిరీస్ లో గాయపడ్డాడు. ఆ గాయం తగ్గకపోవడంతో ఇప్పటికి ఇబ్బంది పడుతూనే ఉన్నాడు.
ఇంగ్లాండ్ టెస్ట్ సారథి గతంలోనే పరిమిత ఓవర్ల క్రికెట్ కు శాశ్వత విరామం ప్రకటించాడు. కేవలం అతడు సుదీర్ఘ ఫార్మాట్ లో మాత్రమే కొనసాగుతున్నాడు. త్వరలో న్యూజిలాండ్ జట్టుతో ఇంగ్లాండు జట్టు టెస్ట్ సిరీస్ ఆడుతుంది. ఇది జూన్ నెలలో మొదలవుతుంది. అప్పుడే బెన్ స్టోక్స్ ఆటను ఇంగ్లాండ్ అభిమానులు చూడగలుగుతారు. అప్పటివరకు అతడు గాయం నుంచి కోలుకోవాలని ఇంగ్లాండ్ అభిమానులు ప్రార్థిస్తున్నారు.
