మెగాఫోన్ పట్టిన బాలకృష్ణ హీరోయిన్

వైవిధ్యమైన నటనతో హిందీతో పాటు అనేక ప్రాంతీయ భాషల్లో నటించి గుర్తింపు తెచ్చుకున్న హీరోయిన్ రాధికా అప్టే. కథ, సన్నివేశం డిమాండ్ చేస్తే డీగ్లామర్ గానే కాకుండా బోల్డ్‌గా నటించేందుకూ వెనుకాడకుండా పాత్రకు ప్రాణం పోస్తుందామె. రక్త చరిత్ర మూవీతో తెలుగు తెరకుపరిచమైన ఆమె బాలకృష్ణ సరసన లెజెండ్, లయన్‌ చిత్రాల్లో నటించి ఆకట్టుకుంది. ఆ తర్వాత టాలీవుడ్‌కు దూరమైన రాధిక.. హిందీలో బిజీగా మారింది. వెబ్‌ సిరీస్‌లతో పాటు పలు ఇంగ్లీష్ మూవీల్లో కూడా నటిస్తోందామె.

హీరోయిన్‌గా ఇంత బిజీగా ఉన్న సమయంలో ఆమె సాహసోపేత నిర్ణయం తీసుకుంది. తన ప్రతిభను నటనతోనే ఆపేయకుండా మెగాఫోన్ పట్టింది. ఓ షార్ట్‌ ఫిల్మ్‌కు దర్శకత్వం వహించింది. ‘ది స్లీప్ వాకర్స్’ అనే టైటిల్ తో రూపొందించిన ఈ షార్ట్‌ఫిల్మ్‌ టీజర్ను రిలీజ్‌ చేసింది. నిమిషం నిడివిగల ఈ టీజర్ చాలా ఆసక్తిరకంగా ఉంది. గర్భవతి అయిన తన భార్యతో భర్త మధ్య జరిగే సంభాషణతో ఈ టీజర్ మొదలవుతుంది. నీకు నిద్రలో నడిచే అలవాటు ఉందని తెలుసా అని భర్త ప్రశ్నిస్తే అలాంటిదేమీ లేదు అని భార్య చెబుతుంది. కానీ, ప్రతి రోజూ రాత్రి ఓ చిన్నారితో కలిసి ఆమె బీచ్‌కు వెళ్తుంది. ఆపై, భార్య ముఖానికి ప్లాస్టిక్‌ కవర్చుట్టిన భర్త ‘ఐయామ్ సారీ’ అని చెబుతాడు. హారర్ బ్యాక్‌డ్రాప్‌లో వైవిధ్యంగా ఉన్న ఈ టీజర్తో రాధిక తన దర్శకత్వ ప్రతిభను చాటుకుంది. అంతేకాదు ‘పాల్మ్ స్ర్పింగ్‌ ఇంటర్నేషనల్ షార్ట్‌ ఫిల్మ్ ఫెస్ట్‌’కు కూడా ఈ షార్ట్‌ ఫిల్మ్‌ ఎంపిక కావడం విశేషం.

https://www.instagram.com/p/CBFoptaHhUI/