Poonam Kaur: స్కిల్ డెవలప్మెంట్ స్కామ్ లో మూడు వందల కోట్లకు పైగా అవినీతికి పాల్పడ్డారన్న ఆరోపణలపై ఏపీ సీఐడీ మాజీ ముఖ్యమంత్రి చంద్రబాబు నాయుడిని అరెస్ట్ చేసిన విషయం తెలిసిందే. ఏసీబీ కోర్టు ఆయనకు 14 రోజుల రిమాండ్ విధించింది. ప్రస్తుతం చంద్రబాబు నాయుడు రాజమండ్రి సెంట్రల్ జైల్లో ఉన్నారు. చంద్రబాబు అరెస్ట్ అక్రమం అంటూ చిత్ర పరిశ్రమకు చెందిన పలువురు ఖండిస్తున్నారు. జనసేన అధినేత పవన్ కళ్యాణ్ మొదటి నుండి దీన్ని వ్యతిరేకిస్తున్నారు. నేడు బాలకృష్ణతో పాటు రాజమండ్రి సెంట్రల్ జైలులో పవన్ కళ్యాణ్ ఆయన్ని కలవనున్నారు.
కే రాఘవేంద్రరావు, నిర్మాత అశ్వినీ దత్ చంద్రబాబు అరెస్ట్ ని ఖండించారు. అశ్వినీ దత్ అయితే సీఎం జగన్ ప్రభుత్వంపై మండిపడ్డారు. త్వరలోనే చంద్రబాబు బయటకు వస్తారు. రానున్న ఎన్నికల్లో టీడీపీ ఏపీలో 160 సీట్లతో అధికారంలోకి వస్తుందని జోష్యం చెప్పారు. చిరంజీవి, రాజమౌళి, ప్రభాస్, ఎన్టీఆర్ వంటి ప్రముఖులు చంద్రబాబు అరెస్ట్ పై స్పందించాలన్నారు. జగన్ కి ఎందుకు భయపడుతున్నారు? ఆయనేమైనా ఉరి తీస్తాడా? అంటూ మండిపడ్డారు. కనీసం ట్వీట్ చేసి వ్యతిరేకించాలని విజ్ఞప్తి చేశారు.
కాగా చిత్ర పరిశ్రమకు చెందిన మరొక సెలెబ్ నటి పూనమ్ కౌర్… చంద్రబాబు అరెస్ట్ ని వ్యతిరేకించారు. ప్రజాసేవలో సుదీర్ఘ కాలం ఉన్న చంద్రబాబు వంటి నేతను ఈ వయసులో జైలులో పెట్టడం సరికాదని ఆమె అభిప్రాయపడుతున్నారు. పూనమ్ కౌర్ ట్విట్టర్ వేదికగా…”73 ఏళ్ల వయసులో జైల్లో ఉంచడం సరికాదు. ముఖ్యంగా ప్రజా జీవితంలో ఏళ్ల తరబడి ఉన్న వ్యక్తి జైలుపాలు కావడం బాధాకరం. ఈ విషయాలపై మాట్లాడటానికి నాకు ఎలాంటి అధికారం, సంబంధం లేదు. కేవలం మానవతా దృక్పథంతో స్పందించాను. చంద్రబాబు నాయుడు వయసు, ఆరోగ్యం పరిగణలోకి తీసుకొని మానవత్వంతో ఆలోచించాలని కోరుతున్నాను” అని కామెంట్ చేశారు.
పూనమ్ కౌర్ ట్వీట్ పై భిన్న వాదనలు వినిపిస్తున్నాయి. ఏ వయసు వారికైనా చట్టం ఒకటే. తప్పు చేస్తే శిక్ష తప్పదని కొందరు ఆమె అభిప్రాయాన్ని ఖండిస్తున్నారు. కొందరు మాత్రం చంద్రబాబుకి మద్దతు తెలిపిన ఆమె తెగువను కొనియాడుతున్నారు. పూనమ్ కౌర్ గొప్పగా చెప్పారని అంటున్నారు. పూనమ్ కౌర్ తరచుగా సోషల్, పొలిటికల్ విషయాలపై స్పందిస్తూ ఉంటారు. ఒక్కోసారి ఆమె ట్వీట్స్ సంచలనం రేపుతుంటాయి. నటిగా పూనమ్ కౌర్ కెరీర్ నెమ్మదించింది. ఆమె అడపాదడపా చిత్రాల్లో కనిపిస్తున్నారు. గత ఏడాది నాతిచరామి టైటిల్ తో ఓ మూవీ చేశారు.
73 is not a age to be in space of jail after u have served for considerable about time in public life ,have no authority or connection to any of the things which are happening but as a humanitarian plea for #ChandrababuNaidu sir health to be considered by respective people .
— पूनम कौर ❤️ poonam kaur (@poonamkaurlal) September 13, 2023
