The Paradise Movie story : నేచురల్ స్టార్ నాని, దర్శకుడు శ్రీకాంత్ ఓదెల కాంబినేషన్లో వస్తున్న ‘ది ప్యారడైజ్’ సినిమాపై అంచనాలు రోజురోజుకూ పెరుగుతున్నాయి. ‘దసరా’ తర్వాత ఈ ఇద్దరూ మరోసారి కలిసి పనిచేస్తుండటంతో సినిమాపై మొదటి నుంచే భారీ హైప్ నెలకొంది. సెప్టెంబర్ 24న ఈ చిత్రం ప్రేక్షకుల ముందుకు రానుంది.
ఇప్పటివరకు విడుదలైన ప్రమోషనల్ కంటెంట్ను పరిశీలిస్తే.. ‘ది ప్యారడైజ్’ కేవలం యాక్షన్ సినిమా మాత్రమే కాదనే విషయం అర్థమవుతోంది. అణచివేతకు గురైన ఒక వర్గం, హక్కులు-గుర్తింపు కోసం చేసే పోరాటం, పుట్టిన నేలపై హక్కు కోసం తిరుగుబాటు, తల్లి-కొడుకుల అనుబంధం వంటి అంశాల చుట్టూ కథ తిరుగుతున్నట్లు తెలుస్తోంది. దర్శకుడు శ్రీకాంత్ ఓదెల కూడా తన తెలంగాణ ప్రాంతంలోని నిజ జీవిత ఘటనల నుంచి సినిమాలోని కొన్ని అంశాలకు స్ఫూర్తి పొందినట్లు వెల్లడించారు.
‘జడల్’గా నాని.. ఒక సామాన్యుడి నుంచి తిరుగుబాటు నాయకుడిగా?
సినిమాలో నాని ‘జడల్’ అనే పాత్రలో కనిపిస్తున్నారు. ఒక అణగారిన సమాజానికి చెందిన యువకుడిగా మొదలై.. పరిస్థితులు తనను తిరుగుబాటు దిశగా నడిపించేలా పాత్ర ఉంటుందని ప్రచార చిత్రాలు, ఇప్పటివరకు వచ్చిన సమాచారం సూచిస్తోంది. 1980ల నాటి సికింద్రాబాద్ నేపథ్యంతో ఈ కథను తెరకెక్కించినట్లు సినీ వర్గాల్లో ప్రచారం ఉంది.
తల్లి ప్రేమ, తన సమాజం ఎదుర్కొంటున్న అవమానాలు, హక్కుల కోసం పోరాటం.. ఇవన్నీ జడల్ పాత్రలో భావోద్వేగానికి, యాక్షన్కు మధ్య కీలకమైన లింక్గా కనిపించనున్నాయని టాక్.
మోహన్ బాబు విలన్గా.. ‘షికంజా మాలిక్’
సినిమాలో మోహన్ బాబు ‘షికంజా మాలిక్’ అనే ప్రతినాయక పాత్రలో కనిపించనున్నారు. ఈ పాత్రను దర్శకుడు శ్రీకాంత్ ఓదెల అత్యంత శక్తివంతమైన, క్రూరమైన పాత్రగా తీర్చిదిద్దినట్లు గతంలో వచ్చిన సమాచారం చెబుతోంది.
అదే సమయంలో రాఘవ్ జుయాల్ ‘విక్రమ్ మాలిక్’గా కనిపిస్తున్నారు. ఈ రెండు పాత్రలు కథలో కీలకమైన ప్రతినాయక శక్తులుగా ఉండనున్నట్లు క్యాస్ట్ వివరాలు వెల్లడిస్తున్నాయి.
‘ప్యారడైజ్’కు పొలిటికల్ టచ్ ఉందా?
ఇక్కడే అసలు ఆసక్తికరమైన చర్చ మొదలైంది. సినిమా కథలోని కొన్ని పాత్రలు, సన్నివేశాలు తెలంగాణ రాజకీయ పరిణామాలను గుర్తు చేస్తున్నాయని సోషల్ మీడియాలో, సినీ వర్గాల్లో చర్చ జరుగుతోంది. ముఖ్యంగా ‘షికంజా మాలిక్’, ‘విక్రమ్ మాలిక్’ పాత్రలను వరుసగా కేసీఆర్, కేటీఆర్లను పోలి ఉండేలా దర్శకుడు డిజైన్ చేశారనే ప్రచారం వినిపిస్తోంది.
అలాగే నాని పోషిస్తున్న ‘జడల్’ పాత్రను తెలంగాణలోని ఇటీవలి రాజకీయ పరిణామాలకు అన్వయిస్తూ.. రేవంత్ రెడ్డి తరహా రాజకీయ తిరుగుబాటు ప్రతిబింబిస్తుందనే ఊహాగానాలు కూడా సోషల్ మీడియాలో వైరల్ అవుతున్నాయి.
అయితే ఈ పాత్రలు నిజంగా ఏ రాజకీయ నాయకుడినైనా ఉద్దేశించి రూపొందించబడ్డాయని చిత్రబృందం అధికారికంగా ప్రకటించలేదు. కాబట్టి ఇవి ప్రస్తుతం అభిమానులు, సోషల్ మీడియా వర్గాలు, ఇండస్ట్రీలో వినిపిస్తున్న ఊహాగానాలుగానే చూడాలి.
‘ఆయా షేర్’ పాటతో మరింత ఆసక్తి
‘ది ప్యారడైజ్’ ప్రమోషన్లలో ‘ఆయా షేర్’ పాట కూడా ప్రత్యేకంగా నిలిచింది. పాటలోని కొన్ని మాస్ లిరిక్స్, నాని పాత్రకు ఇచ్చిన ఎలివేషన్ సోషల్ మీడియాలో చర్చకు దారితీశాయి. ఈ పాటలోని కొన్ని పదాలను తెలంగాణ రాజకీయ డైలాగ్స్తో ముడిపెడుతూ నెటిజన్లు వివిధ రకాల విశ్లేషణలు చేస్తున్నారు.
ఇదే సమయంలో సినిమాలోని ప్రపంచాన్ని, పాత్రలను నిజ జీవిత రాజకీయ నాయకులతో నేరుగా పోల్చడం కంటే.. దర్శకుడు శ్రీకాంత్ ఓదెల చెప్పాలనుకుంటున్న సామాజిక-రాజకీయ నేపథ్యాన్ని సినిమాగా చూడాల్సిన అవసరం ఉందని మరో వర్గం అభిప్రాయపడుతోంది.
‘దసరా’ తర్వాత మరోసారి రా అండ్ రస్టిక్ ట్రీట్
‘దసరా’లో తెలంగాణ మట్టి వాసనతో కూడిన కథను చూపించిన శ్రీకాంత్ ఓదెల.. ‘ది ప్యారడైజ్’లో కూడా రా అండ్ రస్టిక్ ట్రీట్మెంట్కు ప్రాధాన్యం ఇచ్చినట్లు ప్రమోషనల్ కంటెంట్ను బట్టి తెలుస్తోంది. నాని పాత్ర, మోహన్ బాబు విలనిజం, రాఘవ్ జుయాల్ పాత్ర, భారీ యాక్షన్ సన్నివేశాలు, అనిరుధ్ సంగీతం సినిమాకు ప్రత్యేక ఆకర్షణగా నిలవనున్నాయి.
మొత్తానికి.. ‘జనాలు చీదరించుకున్న ఒక కాకి కథ’ అంటూ మొదలైన ‘ది ప్యారడైజ్’ కథ ఎక్కడికి దారితీస్తుంది? ‘జడల్’ నిజంగా ఒక వ్యక్తి కథనా? లేక అణచివేతకు గురైన ఒక సమాజం గొంతుకగా నిలిచే పాత్రనా? ‘షికంజా మాలిక్’, ‘విక్రమ్ మాలిక్’ పాత్రల వెనుక ఉన్న అసలు ఉద్దేశం ఏమిటి? ఈ ప్రశ్నలకు సమాధానం సినిమా విడుదలైన తర్వాతే పూర్తిగా తెలుస్తుంది.
ప్రస్తుతం మాత్రం రాజకీయ నేపథ్యంపై వస్తున్న ఊహాగానాలు సినిమాపై ఆసక్తిని మరింత పెంచుతున్నాయి. సెప్టెంబర్ 24న థియేటర్లలోకి రానున్న ‘ది ప్యారడైజ్’ ప్రేక్షకులకు ఎలాంటి అనుభూతిని ఇస్తుందో చూడాలి.
