Narendra Modi ప్రజాస్వామ్యంలో విమర్శలు సహజం. అధికారంలో ఉన్నవారిని ప్రశ్నించడం, వ్యతిరేకించడం ప్రతిపక్షాల బాధ్యతే. అదే సమయంలో రాజకీయ విభేదాలు, వ్యక్తిగత ద్వేషాల మధ్య ఒక సున్నితమైన గీత కూడా ఉంటుంది. ఇటీవల ప్రధాని నరేంద్ర మోడీ తనపై, తన కుటుంబంపై అనుచిత వ్యాఖ్యలు చేసిన విద్యార్థుల విషయంలో కేసులు పెట్టవద్దని, వారిని క్షమించాలని, “వాళ్లు మన పిల్లలే.. తప్పు చేస్తే సరిదిద్దాలి” అనే భావనతో స్పందించడం ఇప్పుడు రాజకీయ చర్చకు దారి తీసింది.
ఈ వ్యాఖ్యలను ప్రతిపక్షాలు, ముఖ్యంగా కాంగ్రెస్ నాయకుడు రాహుల్ గాంధీ, వామపక్షాలు తీవ్రంగా విమర్శిస్తున్నాయి. “క్షమించే స్థానం మోడీకి ఎవరు ఇచ్చారు?”, “అయితే ఇలాంటి కేసుల్లో అందరినీ క్షమించాలిగా” అనే వాదనలు వినిపిస్తున్నాయి. కొందరు మేధావులు కూడా ఇదే ప్రశ్నలను లేవనెత్తుతున్నారు.
అయితే ఇక్కడ అసలు ప్రశ్న వేరే. ఒక నాయకుడు శిక్ష కంటే మార్పుకు ప్రాధాన్యం ఇవ్వాలని కోరితే, దానిని రాజకీయ కోణంలోనే చూడాలా? లేక సమాజానికి ఇచ్చిన ఒక సందేశంగా అర్థం చేసుకోవాలా? ప్రజా జీవితంలో ఉన్న వ్యక్తులపై విమర్శలు ఉండొచ్చు. కానీ విద్యార్థులు భావోద్వేగాలకు లోనై తప్పులు చేస్తే వారిని శిక్షించడం కంటే మార్గనిర్దేశం చేయాలని చెప్పడం కూడా ఒక దృక్పథమే.
ప్రతిపక్షాలు ఈ అంశంపై ప్రశ్నలు అడగడం తప్పు కాదు. అయితే ప్రతి విషయాన్ని రాజకీయ ఆరోపణల స్థాయికి తీసుకెళ్లడం వల్ల అసలు సందేశం కనుమరుగయ్యే ప్రమాదం ఉంది. క్షమాపణ, సహనం, సంయమనం వంటి విలువలు రాజకీయాల్లో కూడా అవసరమే. వాటిని బలహీనతగా చిత్రీకరించడం కంటే, ప్రజాస్వామ్య సంస్కృతిలో భాగంగా చూడాల్సిన అవసరం ఉంది.
ఇక మరోవైపు, చట్టం ముందు అందరూ సమానమే అనే సూత్రం కూడా అంతే ముఖ్యమైనది. ఏ కేసులోనైనా చట్టపరమైన ప్రక్రియ పారదర్శకంగా ఉండాలి. ఎవరికి ప్రత్యేక మినహాయింపులు ఉండకూడదు. అదే సమయంలో చిన్నపాటి తప్పిదాలకు జీవితాంతం ముద్ర వేయకుండా, సరిదిద్దుకునే అవకాశం ఇవ్వాలనే భావన కూడా సమాజానికి అవసరమైనదే.
రాజకీయాలు ప్రజల సమస్యలపై జరగాలి. క్షమించడం, కరుణ చూపడం, మార్పును ప్రోత్సహించడం వంటి విలువలను కూడా రాజకీయ వివాదాలుగా మార్చేస్తే ప్రజాస్వామ్య చర్చ స్థాయి దిగజారే ప్రమాదం ఉంది. విభేదాలు ఉండొచ్చు, విమర్శలు ఉండొచ్చు. కానీ ప్రతి అంశాన్ని రాజకీయ లాభనష్టాల కళ్లజోడుతో కాకుండా, సమాజ ప్రయోజనాల కోణంలో చూడగలిగితేనే ప్రజాస్వామ్యం మరింత బలపడుతుంది.
మోడీ ఔదార్యాన్ని రాజకీయం చేస్తున్న రాహుల్ గాంధీ, వామపక్షాలు .. దీనిపై ‘రామ్’ గారి సునిశిత విశ్లేషణను కింది వీడియోగా చూడొచ్చు.
