Kargil Vijay Diwas: దాయాది దేశం పాకిస్తాన్తో 1999లో జరిగిన కార్గిల్ యుద్ధం భారత సైనిక చరిత్రలో ఒక సువర్ణ అధ్యాయం. నిట్టనిలువు పర్వతాల మీద, అత్యంత కఠినమైన పరిస్థితుల్లో సైనికులు చూపిన పరాక్రమం ఈరోజు కూడా దేశం మొత్తాన్ని గర్వపడేలా చేస్తుంది. నేడు కార్గిల్ విజయ్ దివస్. ఈ విజయం వెనుక సైనికుల త్యాగాన్ని, జాతీయ గర్వం దాగి ఉంది.
యుద్ధం నేపథ్యం..
కార్గిల్ ప్రాంతంలో పాకిస్తాన్ సైనికులు చొరబడి కొన్ని కీలక పర్వత శిఖరాలను ఆక్రమించారు. ఇది కేవలం భూభాగం సమస్య కాదు; జాతీయ సార్వభౌమత్వానికి సవాలు. భారత సైన్యం ఆ ప్రాంతాన్ని విడిపించడానికి దాదాపు రెండు నెలలు తీవ్రమైన పోరాటం చేసింది. ఇక్కడ ప్రత్యేకత ఏమిటంటే సెనికులు లైన్ ఆఫ్ కంట్రోల్ దాటకుండానే మన భూభాగాన్ని తిరిగి స్వాధీనం చేసుకున్నారు. ఇది కేవలం సైనిక విజయం కాదు.. క్రమశిక్షణ, నియంత్రణ, జాతీయ విధానాలకు కట్టుబడి ఉండటానికి నిదర్శనం.
నిట్టనిలువు కొండలపై పరాక్రమం
టైగర్ హిల్ సహా అనేక కీలక ఎత్తైన ప్రాంతాలను తిరిగి స్వాధీనం చేసుకోవడం సాధారణ విషయం కాదు. నిట్టనిలువు కొండలను ఎక్కుతూ, శత్రు తూటాలను తప్పించుకుంటూ, భారీ ఆయుధాలను మోసుకుని ముందుకు సాగడం మానవ సామర్థ్యాలకు అతీతమైన పని. ఎత్తైన ప్రాంతాల్లో ఆక్సిజన్ తక్కువ, వాతావరణం కఠినం, సరఫరా మార్గాలు కష్టం. అయినా సైనికులు ఆ అడ్డంకులన్నింటినీ అధిగమించి విజయం సాధించారు. ఈ పోరాటం భౌతిక శక్తితోపాటు మానసిక దృఢత్వం, జట్టు స్ఫూర్తి, దేశభక్తి కలయిక.
అమరుల త్యాగం, గర్వం
ఈ విజయం సులభంగా రాలేదు. ‘షేర్ షా’గా ప్రసిద్ధి చెందిన విక్రమ్ బాత్రా సహా 527 మంది సైనికులు వీరమరణం పొందారు. ప్రతి ఒక్కరి కథ ఒక కుటుంబం, ఒక గ్రామం, ఒక దేశం యొక్క గర్వం. విక్రమ్ బాత్రా వంటి యోధులు చూపిన ధైర్యం తరాలకు స్ఫూర్తిగా నిలుస్తుంది. వారు జీవితాన్ని అర్పించి మన భూభాగాన్ని కాపాడారు. ఈ త్యాగాన్ని గుర్తుంచుకోవడం మన బాధ్యత.
కేవలం సంస్మరణ కాదు
జూలై 26 కార్గిల్ విజయ్ దివస్ కేవలం ఒక తేదీ కాదు. ఇది సైనికుల పట్ల గౌరవం చూపే రోజు. ఇది జాతీయ ఐక్యతను గుర్తు చేసే రోజు. యుద్ధం సమయంలో దేశం మొత్తం ఒక్కటై సైన్యానికి మద్దతు ఇచ్చింది. ఆ భావనను నేటికీ కాపాడుకోవాలి. సైనికులు సరిహద్దుల్లో నిలబడి దేశాన్ని కాపాడుతున్నారు. వారి త్యాగాన్ని గుర్తుంచుకోవడం, వారి కుటుంబాలకు గౌరవం ఇవ్వడం, జాతీయ భద్రతపై అవగాహన పెంచడంఇవన్నీ ఈ దినోత్సవం నిజమైన అర్థం.
కార్గిల్ యుద్ధం మనకు ఒక పాఠం నేర్పింది. సార్వభౌమత్వం కోసం ఏ మాత్రం రాజీ పడకూడదు. సైనికుల పరాక్రమం, త్యాగం, దేశభక్తి మన గర్వం, మన గౌరవం. ఈరోజు వారి స్మృతికి నివాళులర్పిస్తూ, భవిష్యత్తులో కూడా దేశ రక్షణకు అంకితమయ్యే తరాలను తీర్చిదిద్దుకోవాలి.
