KA Paul : ఈరోజు వాలెంటైన్స్ డే.. ప్రేమికులు సెలబ్రేషన్ చేసుకునే డే. ప్రేమికుల దినోత్సవం సందర్భంగా.. ప్రేమికుల కోసం పలు సంస్థలు ఈరోజు అనేక ఆఫర్లు ప్రకటించాయి. దర్జాగా క్యాష్ చేసుకున్నాయి.. కానీ ప్రేమికుల దినోత్సవం రాజకీయ నాయకులకు కూడా ఓట్లను దక్కేలా చేస్తుందని.. కాదేది కవితకు అనర్హం అన్నట్టు.. ప్రేమికుల దినోత్సవం కూడా ఎన్నికల ప్రచారానికి అనర్హం కాదని ఓ రాజకీయ నాయకుడు నిరూపించారు. అంతే కాదు ప్రేమికులకు రకరకాల తాయిలాలు ప్రకటించారు. ఇంతకీ ఎవరా రాజకీయ నాయకుడు? ప్రేమికుల రోజు ప్రేమికులకు ఎటువంటి ఆఫర్లు ఇచ్చాడు?
కేఏ పాల్.. పేరు చదువుతుంటేనే నవ్వొస్తుంది కదా.. రాజకీయ నాయకులందరూ సీరియస్ గా రాజకీయాలు చేస్తూ ఉంటే.. ఈయన సీరియస్ గా కామెడీ పండిస్తారు. ఆది నేనే.. అంతం నేనే.. అంతర్యామి నేనే అన్నట్టుగా మాట్లాడుతారు. అమెరికా అధ్యక్షుడు బిల్ క్లింటన్ నుంచి రష్యా అధ్యక్షుడు పుతిన్ వరకు అందరూ తెలుసు అన్నట్టుగా మాట్లాడతారు. తనకు అధికారం ఇస్తే ఏం చేస్తానో చెబుతారు. తన పార్టీకి సింబల్ లేకపోయినప్పటికీ పవన్ కళ్యాణ్ ను తన పార్టీలో చేరాలని డిమాండ్ చేస్తారు. చంద్రబాబు నాయుడిని ఎన్నికల్లో సపోర్ట్ చేయాలని కోరతారు. అవసరమైతే తనను ప్రధానిని చేయాలని ఆర్డర్ వేస్తారు. అలాంటి కేఏ పాల్ తెలంగాణలో ఇలాంటి విన్యాసాలు చాలానే చేశారు.
ఇప్పుడు ఏపీలో ఎన్నికలు త్వరలో జరగనున్న నేపథ్యంలో కేఏ పాల్ ఆ ప్రాంతాల్లో విస్తృతంగా పర్యటిస్తున్నారు. పర్యటించిన చోటల్లా విలేకరుల సమావేశం పెడుతున్నారు. ఇప్పుడు అసలే సోషల్ మీడియా రోజులు కాబట్టి వివాదాస్పద వ్యాఖ్యలు చేస్తూ వార్తల్లో ఉంటున్నారు. మంగళవారం వాలెంటైన్స్ డే ను పురస్కరించుకొని ప్రేమికులకు తన పార్టీ తరఫున పలు హామీలు ఇచ్చారు. “కుల మతాలకు అతీతంగా ప్రేమించుకోండి. పెళ్లి చేసుకోండి. తల్లిదండ్రులను సన్మానించండి.. తన పార్టీకి ఓటు వేయండి” అంటూ పాల్ కోరారు. ప్రేమికుల కోసం తమ ప్రభుత్వం అధికారంలోకి వస్తే రాయితీపై రుణాలు, గృహ నిర్మాణం, ఉచిత విద్యుత్ వంటి సౌకర్యాలు కల్పిస్తామని హామీ ఇచ్చారు. అంతేకాదు నర్సీపట్నంలో తన లవ్ స్టోరీ గురించి కూడా చెప్పారు. కాగా, పాల్ చేసిన వ్యాఖ్యలు ప్రస్తుతం సామాజిక మాధ్యమాలలో తెగ చక్కర్లు కొడుతున్నాయి. కాక పాల్ తమకు ఇచ్చిన హామీల పట్ల ప్రేమికులు హర్షం వ్యక్తం చేస్తున్నారు. అధికారంలో కి వచ్చినా, రాకపోయినా పాల్ తమ బాధలు అర్థం చేసుకున్నారని.. ఆయనకే మేము ఓటు వేస్తామని ప్రేమికులు వ్యాఖ్యానిస్తుండడం విశేషం.
