Volkswagen Virtus : జర్మన్ ఆటోమొబైల్ దిగ్గజం వోక్స్‌వ్యాగన్ భారత మార్కెట్లో మరోసారి సందడి చేసేందుకు సిద్ధమైంది. తన పాపులర్ సెడాన్ విర్టస్‌లో కొత్త ఫేస్‌లిఫ్ట్ వెర్షన్‌ను తీసుకొచ్చేందుకు సన్నాహాలు చేస్తోంది. ఇందులో భాగంగా తాజాగా కొత్త విర్టస్ ఫేస్‌లిఫ్ట్ ఎక్స్‌టీరియర్ డిజైన్‌ను కంపెనీ అధికారికంగా వెల్లడించింది. డిసెంబర్‌లో ఈ కారును భారత మార్కెట్లో విడుదల చేయనున్నట్లు ప్రకటించింది. 2022లో భారత్‌లో అడుగుపెట్టిన తర్వాత విర్టస్‌కు ఇదే తొలి సమగ్ర అప్‌డేట్ కావడం విశేషం. కొత్త లుక్‌తో పాటు అదనపు ఫీచర్లు, మెరుగైన టెక్నాలజీతో ఈ సెడాన్‌ను అందుబాటులోకి తీసుకురావాలని కంపెనీ భావిస్తోంది.
కొత్త డిజైన్‌తో ప్రీమియం లుక్
వోక్స్‌వ్యాగన్ విర్టస్ ఫేస్‌లిఫ్ట్‌లో ప్రధానంగా ముందు భాగంలో మార్పులు కనిపిస్తున్నాయి. కొత్త డిజైన్‌తో ఫ్రంట్ బంపర్‌ను రూపొందించారు. ఇందులో డైమండ్ ఆకారపు డిజైన్ ఎలిమెంట్స్ ప్రత్యేక ఆకర్షణగా నిలుస్తున్నాయి. ఫాగ్ ల్యాంప్ హౌసింగ్‌లను కూడా చిన్నవిగా మార్చారు. గ్రిల్‌పై ప్రకాశించే ఇల్యూమినేటెడ్ వోక్స్‌వ్యాగన్ లోగోను ఏర్పాటు చేశారు. అయితే హెడ్‌ల్యాంప్స్ డిజైన్‌ను యథాతథంగా కొనసాగిస్తూ, వాటిలో ఇంటిగ్రేటెడ్ ఎల్ఈడీ డీఆర్ఎల్స్‌ను అందించారు.
ఈ కొత్త మోడల్‌లో 360 డిగ్రీల కెమెరా, ఫ్రంట్ పార్కింగ్ సెన్సార్లు ప్రధాన ఆకర్షణగా నిలవనున్నాయి. కారుకు సంబంధించిన ఓఆర్‌వీఎంలపై కూడా కెమెరాలను ఏర్పాటు చేశారు. దీంతో పార్కింగ్ సమయంలో డ్రైవర్లకు మరింత సౌకర్యం కలగనుంది.
టాప్ స్పెక్ జీటీ వేరియంట్‌లో కొత్తగా డిజైన్ చేసిన 16 ఇంచుల బ్లాక్ అల్లాయ్ వీల్స్‌ను అందించారు. ముందు వైపు రెడ్ బ్రేక్ కాలిపర్లు, డోర్లు మరియు బూట్‌పై రెడ్ జీటీ బ్యాడ్జింగ్ ప్రత్యేకంగా కనిపిస్తున్నాయి. సాధారణ వేరియంట్లలో డ్యూయల్ టోన్ అల్లాయ్ వీల్స్ ఉండే అవకాశం ఉంది. కొత్త బ్లూ కలర్ ఆప్షన్‌ను కూడా పరిచయం చేశారు. ఇందులో రూఫ్, ఓఆర్‌వీఎంలు, లిప్ స్పాయిలర్‌కు బ్లాక్ ఫినిషింగ్ ఇచ్చారు. వెనుక బంపర్ దిగువ భాగంలో స్వల్ప మార్పులు చేశారు.
క్యాబిన్‌లోనూ కొత్త ఫీచర్లు?
ప్రస్తుతం కంపెనీ ఇంటీరియర్‌కు సంబంధించిన ఫొటోలను వెల్లడించలేదు. అయితే క్యాబిన్ డిజైన్‌లో పెద్దగా మార్పులు ఉండకపోవచ్చని తెలుస్తోంది. వోక్స్‌వ్యాగన్ టైగన్‌లో అందిస్తున్న కొన్ని ఆధునిక ఫీచర్లను విర్టస్ ఫేస్‌లిఫ్ట్‌లోనూ తీసుకొచ్చే అవకాశం ఉంది.
ముఖ్యంగా 10.25 ఇంచుల డిజిటల్ ఇన్‌స్ట్రుమెంట్ క్లస్టర్‌ను అందించవచ్చని అంచనా. ప్రస్తుతం ఉన్న 10.1 ఇంచుల టచ్‌స్క్రీన్ ఇన్ఫోటైన్‌మెంట్ సిస్టమ్‌లో కొత్త యూజర్ ఇంటర్‌ఫేస్‌తో పాటు ఏఐ ఆధారిత ఫీచర్లు వచ్చే అవకాశం ఉంది. సింగిల్ పేన్ సన్‌రూఫ్, వైర్‌లెస్ ఫోన్ ఛార్జర్, ఆటోమేటిక్ క్లైమేట్ కంట్రోల్, వెనుక ప్రయాణికుల కోసం ఏసీ వెంట్స్, 8 స్పీకర్ల సౌండ్ సిస్టమ్ వంటి ఫీచర్లు కొనసాగనున్నాయి.
సేఫ్టీ విషయంలోనూ పెద్దగా మార్పులు ఉండకపోవచ్చు. ఆరు ఎయిర్‌బ్యాగ్స్‌ను స్టాండర్డ్‌గా అందించనున్నారు. టైర్ ప్రెజర్ మానిటరింగ్ సిస్టమ్ (TPMS), రియర్ పార్కింగ్ సెన్సార్లు, డే/నైట్ ఐఆర్‌వీఎం వంటి ఫీచర్లు కొనసాగుతాయి. కొత్తగా 360 డిగ్రీల కెమెరా, ఫ్రంట్ పార్కింగ్ సెన్సార్లు చేరనున్నాయి.
ఇంజిన్, గేర్‌బాక్స్‌లో మార్పులు ఉంటాయా?
ఇంజిన్‌కు సంబంధించిన వివరాలను వోక్స్‌వ్యాగన్ ఇంకా అధికారికంగా వెల్లడించలేదు. ప్రస్తుతం ఉన్న 1.0 లీటర్ టీఎస్ఐ పెట్రోల్ ఇంజిన్ 115 హెచ్‌పీ పవర్‌ను ఉత్పత్తి చేస్తుంది. ఈ ఇంజిన్‌తో 6 స్పీడ్ మాన్యువల్ గేర్‌బాక్స్ కొనసాగవచ్చని అంచనా. అయితే ప్రస్తుతం ఉన్న 6 స్పీడ్ ఆటోమేటిక్ స్థానంలో కొత్త 8 స్పీడ్ టార్క్ కన్వర్టర్ ఆటోమేటిక్ గేర్‌బాక్స్‌ను తీసుకొచ్చే అవకాశం ఉంది.
అదేవిధంగా 1.5 లీటర్ టీఎస్ఐ పెట్రోల్ ఇంజిన్ కూడా కొనసాగనుంది. ఇది 150 హెచ్‌పీ పవర్‌ను ఉత్పత్తి చేస్తుంది. ఈ ఇంజిన్‌తో 7 స్పీడ్ డ్యూయల్ క్లచ్ ఆటోమేటిక్ గేర్‌బాక్స్ అందుబాటులో ఉండనుంది.
ధర ఎంత ఉండొచ్చు?
ప్రస్తుతం భారత మార్కెట్లో వోక్స్‌వ్యాగన్ విర్టస్ ధరలు రూ.10.71 లక్షల నుంచి రూ.19.20 లక్షల వరకు (ఎక్స్‌షోరూమ్) ఉన్నాయి. ఫేస్‌లిఫ్ట్ మోడల్‌లో కొత్త ఫీచర్లు, డిజైన్ మార్పులు ఉండటంతో ధరలు స్వల్పంగా పెరిగే అవకాశం ఉంది. ప్రారంభ ధర సుమారు రూ.11.99 లక్షలుగా ఉండొచ్చని అంచనా.
డిసెంబర్‌లో విడుదల కానున్న కొత్త విర్టస్.. మార్కెట్లో స్కోడా స్లావియా, హ్యుందాయ్ వెర్నా, హోండా సిటీ వంటి సెడాన్లకు పోటీ ఇవ్వనుంది. మొత్తంగా కొత్త డిజైన్, అదనపు టెక్నాలజీ, మెరుగైన పార్కింగ్ సౌకర్యాలతో విర్టస్ ఫేస్‌లిఫ్ట్ భారత సెడాన్ మార్కెట్లో ఎలాంటి స్పందన అందుకుంటుందో చూడాలి
