TTD: కలియుగ వైకుంఠనాథుడు శ్రీ వేంకటేశ్వర స్వామి దర్శనార్థం తిరుమలకు వచ్చే భక్తులకు తిరుమల తిరుపతి దేవస్థానం మంచి వార్త అందించింది. పెద్ద మొత్తంలో విరాళాలు అందించి వీఐపీ బ్రేక్ దర్శనం పొందే వారికి ఎదురవుతున్న వేచిచూపు సమస్యలను తొలగించేందుకు కొత్త ఏర్పాటు చేస్తోంది.
ప్రస్తుతం ఎదురవుతున్న కష్టాలు
శ్రీవాణి దర్శన టికెట్లు తీసుకున్నవారికి వసతి విషయంలో ఇబ్బందులు కొనసాగుతున్నాయి. మూడు నెలల ముందుగానే ఆన్లైన్లో విరాళం చెల్లించి బుకింగ్ చేసుకున్నవారికే టీటీడీ గదులు కేటాయిస్తోంది. అదే రోజు లేదా తక్కువ ముందస్తు బుకింగ్తో టికెట్ సాధించినవారికి మాత్రం గదులు లభించవు. ఉదయం తొమ్మిది గంటలకు దర్శనం ఉన్నవారు సాయంత్రం నాలుగు గంటల వరకు బయటనే నిలబడాల్సి వస్తోంది. విశ్రాంతి తీసుకునేందుకు తగిన ఏర్పాట్లు లేకపోవడంతో వయోవృద్ధులు, పిల్లలతో వచ్చిన కుటుంబాలు అలసటకు గురవుతున్నాయి.
కొత్త లాంజ్ నిర్మాణం
ఈ ఇబ్బందులను గమనించిన టీటీడీ పాలకమండలి విమానాశ్రయాల్లో కనిపించే తరహాలో ఒక ఆధునిక విశ్రాంతి కేంద్రాన్ని ఏర్పాటు చేయాలని నిర్ణయించింది. భక్తులు సుఖంగా కూర్చుని, వేచి ఉండేందుకు అవసరమైన అన్ని సౌకర్యాలతో కూడిన లగ్జరీ లాంజ్గా దీన్ని అభివృద్ధి చేయనున్నారు.
నిర్మాణ ఇలా..
తిరుమలలోని అన్నమయ్య భవనానికి దగ్గరగా ఉన్న పాత న్యూ ఉడ్సైడ్ హోటల్ ప్రాంగణాన్ని ఎంపిక చేశారు. ప్రస్తుతం ఖాళీగా ఉన్న ఈ విశాల భవనాన్ని పూర్తిగా నవీకరించి, అత్యాధునిక సదుపాయాలతో అమర్చనున్నారు. దీని ద్వారా శ్రీవాణి దర్శనం కోసం వచ్చినవారు గంటల తరబడి బయట నిలబడాల్సిన అవసరం ఉండదు.
ఈ కొత్త ఏర్పాటు భక్తులకు గణనీయమైన ఉపశమనం కలిగిస్తుందని అధికారులు భావిస్తున్నారు. స్వామివారి దర్శనం మరింత సౌకర్యవంతంగా, నిశ్చింతగా జరిగేలా టీటీడీ చేస్తున్న ఈ చర్య భక్తులకు ఆనందం కలిగించనుంది.
