Royal Enfield Flying Flea C6 : రాయల్ ఎన్ఫీల్డ్ ఎలక్ట్రిక్ బైక్ సెగ్మెంట్లో తన తొలి మోడల్ అయిన ఫ్లయింగ్ ఫ్లీ C6ను అంతర్జాతీయ మార్కెట్లలోకి తీసుకెళ్లింది. తాజాగా యూరప్, యూకే మార్కెట్లలో ఈ ఎలక్ట్రిక్ మోటార్సైకిల్ అధికారికంగా లాంచ్ అయింది. అంతర్జాతీయ మార్కెట్ ఎంట్రీ సందర్భంగా కంపెనీ కొత్త పారాచూట్ వైట్ కలర్ను కూడా పరిచయం చేసింది. ఇప్పటికే భారత్లో అందుబాటులో ఉన్న ఈ రంగు బైక్ ధరలో ఎలాంటి మార్పు లేదు.
ఫ్లయింగ్ ఫ్లీ C6లో పారాచూట్ వైట్ కలర్ బాడీకి బ్లాక్ డీటెయిలింగ్ అందించారు. సీటు, హ్యాండిల్బార్ గ్రిప్స్పై బ్లూ యాక్సెంట్స్ ఇవ్వడం ద్వారా ప్రత్యేకమైన లుక్ తీసుకొచ్చారు. బ్యాటరీ, ఇతర కీలక భాగాల చుట్టూ బ్లాక్ సెక్షన్లు ఉండటం వల్ల బైక్ డిజైన్ మరింత ఆకర్షణీయంగా కనిపిస్తుంది. కొత్త కలర్ మినహా బైక్లో ఎలాంటి మెకానికల్ మార్పులు చేయలేదు. దీంతో ఫ్లయింగ్ ఫ్లీ C6 కలర్ ఆప్షన్లు ఫ్లీ గ్రీన్, స్టార్మ్ బ్లాక్, పారాచూట్ వైట్కు చేరాయి.
ఐదు యూరోపియన్ నగరాల్లో విక్రయాలు
యూరప్లో ఫ్లయింగ్ ఫ్లీ C6 ధర 5,990 యూరోలుగా నిర్ణయించారు. భారత కరెన్సీలో ఇది సుమారు రూ.6.58 లక్షలకు సమానం. యూకేలో ఈ బైక్ ధర 5,300 పౌండ్లు, అంటే సుమారు రూ.6.78 లక్షలు. యూరప్లో తొలుత పారిస్, లండన్, బెర్లిన్, బార్సిలోనా, రోమ్ నగరాల్లో ఈ బైక్ విక్రయాలు ప్రారంభం కానున్నాయి. అక్టోబర్ నుంచి డెలివరీలు మొదలయ్యే అవకాశం ఉంది.
భారత్లో ఫ్లయింగ్ ఫ్లీ C6 ధర రూ.2.79 లక్షలు (ఎక్స్-షోరూమ్, బెంగళూరు)గా ఉంది. ప్రస్తుతం దేశీయ మార్కెట్లో ఈ బైక్ బెంగళూరులో మాత్రమే అందుబాటులో ఉంది. యూరప్, యూకే మార్కెట్లలో కూడా మూడు కలర్ ఆప్షన్లకు ఇదే ధర నిర్మాణం వర్తిస్తుంది.
బ్యాటరీ, రేంజ్ ఇలా..
ఫ్లయింగ్ ఫ్లీ C6లో 3.91kWh NCA బ్యాటరీ ప్యాక్ను ఉపయోగించారు. ఇది మ్యాగ్నీషియం అల్లాయ్ కేసింగ్లో అమర్చారు. PMS ఎలక్ట్రిక్ మోటార్ గరిష్ఠంగా 15.4kW పవర్ను ఉత్పత్తి చేస్తుంది. భారత్లో ఈ బైక్ 154 కిలోమీటర్ల IDC రేంజ్, గంటకు 115 కిలోమీటర్ల టాప్ స్పీడ్ను కలిగి ఉంది. బైక్ కెర్బ్ వెయిట్ 124 కిలోలుగా ఉంది.
అయితే యూరప్, యూకే మార్కెట్లలో WMTC సర్టిఫికేషన్ ప్రకారం 104 కిలోమీటర్ల రేంజ్ను కంపెనీ ప్రకటించింది. మార్కెట్ మారినా మోటార్, బ్యాటరీ లేదా ఫీచర్లలో ఎలాంటి మార్పులు లేవు.
టెక్నాలజీ, ఫీచర్లు
ఫ్లయింగ్ ఫ్లీ C6లో 3.5 అంగుళాల రౌండ్ TFT డిస్ప్లే, కనెక్టెడ్ టెక్నాలజీ, గిర్డర్-స్టైల్ ఫ్రంట్ ఫోర్క్ వంటి ఫీచర్లు ఉన్నాయి. LED హెడ్ల్యాంప్తో పాటు ఫ్రంట్ ఇండికేటర్లను హ్యాండిల్బార్లోనే ఇంటిగ్రేట్ చేశారు. ట్రాక్షన్ కంట్రోల్, కస్టమైజ్ చేసుకునే రైడింగ్ మోడ్స్, లీన్-సెన్సిటివ్ ABS వంటి అధునాతన భద్రతా ఫీచర్లు కూడా ఉన్నాయి.
ఫ్లయింగ్ ఫ్లీ C6తో పాటు ఇదే ప్లాట్ఫామ్పై రూపొందించిన S6 స్క్రాంబ్లర్ స్టైల్ ఎలక్ట్రిక్ మోటార్సైకిల్ను కూడా రాయల్ ఎన్ఫీల్డ్ వెబ్సైట్లో ప్రదర్శిస్తోంది. అయితే S6 అంతర్జాతీయ మార్కెట్లలో ఎప్పుడు లాంచ్ అవుతుందనే విషయంపై కంపెనీ ఇంకా స్పష్టత ఇవ్వలేదు.
