AP Mega DSC : మెగా డీఎస్సీ స్పోర్ట్స్ కోటా నియామకాల వ్యవహారం ఆంధ్రప్రదేశ్లో మరోసారి చర్చనీయాంశంగా మారింది. నియామకాల్లో అక్రమాలు, నకిలీ ధ్రువపత్రాలు ఉన్నాయంటూ వైసీపీ నేతలు ఆరోపిస్తూ విజయవాడలోని SAAP కార్యాలయం వద్ద ఆందోళన చేపట్టగా.. స్పోర్ట్స్ కోటా ద్వారా ఉపాధ్యాయ ఉద్యోగాలు పొందిన అభ్యర్థులు అక్కడికి చేరుకోవడంతో పరిస్థితి ఉద్రిక్తంగా మారింది.
ఆరోపణలు.. అభ్యర్థుల వివరణ
స్పోర్ట్స్ కోటా నియామకాల్లో అవకతవకలు జరిగాయని, కొంతమంది అభ్యర్థులు నకిలీ ధ్రువపత్రాలతో ఉద్యోగాలు పొందారనే ఆరోపణలను వైసీపీ నేతలు తెరపైకి తీసుకొచ్చారు. దీనిపై ప్రభుత్వాన్ని, సంబంధిత అధికారులను ప్రశ్నిస్తూ SAAP కార్యాలయం వద్ద నిరసన చేపట్టారు.అయితే ఈ ఆరోపణలను స్పోర్ట్స్ కోటా ద్వారా ఎంపికైన ఉపాధ్యాయులు ఖండించారు. తమకు లభించిన ఉద్యోగాలు క్రీడా ప్రతిభ, విద్యార్హతలు, నిబంధనల ప్రకారం సమర్పించిన ధ్రువపత్రాల ఆధారంగానే వచ్చాయని స్పష్టం చేశారు. తాము సాధించిన పతకాలు, ఒరిజినల్ స్పోర్ట్స్ సర్టిఫికెట్లు, విద్యా ధ్రువపత్రాలను అవసరమైతే ఎవరైనా పరిశీలించుకోవచ్చని తెలిపారు.
‘మా ప్రతిభను అవమానించొద్దు’
సాధారణ కుటుంబాల నుంచి వచ్చిన తాము క్రీడల్లో ఎన్నో ఏళ్ల కష్టంతో గుర్తింపు సాధించామని అభ్యర్థులు చెబుతున్నారు. రాష్ట్ర, జాతీయ స్థాయి పోటీల్లో సాధించిన విజయాల ఆధారంగా స్పోర్ట్స్ కోటాలో ఉద్యోగాలకు ఎంపికయ్యామని పేర్కొన్నారు.తమ అర్హతలపై అనుమానాలు ఉంటే అధికారికంగా పరిశీలించాలని, కానీ రాజకీయ ఆందోళనల పేరుతో తమను అవమానించడం సరికాదని వారు ఆవేదన వ్యక్తం చేశారు.
గేటుకు తాళం.. పోలీసులతో వాగ్వాదం
ఇరువర్గాలు పోటాపోటీగా నినాదాలు చేయడంతో పరిస్థితి అదుపు తప్పకుండా పోలీసులు రంగంలోకి దిగారు. SAAP కార్యాలయం ప్రధాన గేటుకు తాళం వేసి, లోపలకు వెళ్లేందుకు ప్రయత్నించిన ఆందోళనకారులను అడ్డుకున్నారు. ఈ సందర్భంగా పోలీసులకు, వైసీపీ నాయకులకు మధ్య వాగ్వాదం చోటుచేసుకుంది.మరోవైపు అభ్యర్థులు తమ ధ్రువపత్రాలను ప్రదర్శిస్తూ మైక్ ద్వారా తమ అర్హతలను సమర్థించుకోవడంతో ఇరువర్గాల మధ్య మాటామాటా పెరిగినట్లు సమాచారం.
తోపులాటలో ఉపాధ్యాయుడికి గాయం
ఈ క్రమంలో ఇరువర్గాల మధ్య తోపులాట చోటుచేసుకున్నట్లు సమాచారం. ఒక ఉపాధ్యాయుడి తలకు గాయం కావడంతో అతడిని చికిత్స కోసం ఆస్పత్రికి తరలించారు. దీంతో అక్కడ ఉద్రిక్తత మరింత పెరిగింది. పరిస్థితిని అదుపులోకి తీసుకురావడానికి పోలీసులు అదనపు బందోబస్తు ఏర్పాటు చేశారు.
అధికారుల పరిశీలనపైనే దృష్టి
స్పోర్ట్స్ కోటా నియామకాలపై వస్తున్న ఆరోపణల నేపథ్యంలో అభ్యర్థుల అర్హతలు, ధ్రువపత్రాలను నిబంధనల ప్రకారం పరిశీలిస్తామని ఏపీ అధికారులు గతంలో వెల్లడించారు. ఏదైనా ధ్రువపత్రం నకిలీదిగా తేలినా లేదా అర్హత నిబంధనలకు విరుద్ధంగా నియామకం జరిగినట్లు నిర్ధారణ అయినా తగిన చర్యలు తీసుకుంటామని తెలిపారు.
ప్రస్తుతం ఈ వివాదంలో ఒకవైపు అక్రమాలపై విచారణ జరపాలనే డిమాండ్, మరోవైపు తమ నియామకాలు నిబంధనల ప్రకారమే జరిగాయంటున్న ఉపాధ్యాయుల వాదన వినిపిస్తోంది. దీంతో అసలు అర్హతలు, ధ్రువపత్రాలపై అధికారిక పరిశీలనలో ఏం తేలుతుందన్నదే కీలకంగా మారింది.
