October 2026 Car Sales : భారత ఆటోమొబైల్ మార్కెట్లో అక్టోబర్ 2026లో కార్ల రిటైల్ అమ్మకాలు తగ్గుముఖం పట్టాయి. గత ఏడాది ఇదే నెలతో పోలిస్తే ఈసారి అమ్మకాలు ఏకంగా 14.23 శాతం క్షీణించాయి. అయితే, ఈ తగ్గుదలకు ప్రధాన కారణం పండుగల తేదీల్లో వచ్చిన మార్పులేనని పరిశ్రమ వర్గాలు విశ్లేషిస్తున్నాయి. ధన్‌తేరస్ నవంబర్ 6న, దీపావళి నవంబర్ 8న రావడంతో పండుగ సీజన్‌లో కార్లు కొనుగోలు చేయాలనుకున్న చాలామంది వినియోగదారులు నవంబర్‌కు తమ కొనుగోళ్లను వాయిదా వేసుకున్నారు. అయినప్పటికీ, అక్టోబర్ నెలలో నమోదైన అమ్మకాలు ఇప్పటికీ అత్యధిక అమ్మకాలు నమోదైన అక్టోబర్ నెలల్లో మూడో స్థానంలో నిలిచాయి.
5.07 లక్షల కార్ల విక్రయాలు
అక్టోబర్ 2026లో దేశవ్యాప్తంగా మొత్తం 5,07,768 కార్లు రిటైల్ మార్కెట్లో అమ్ముడయ్యాయి. గత ఏడాది అక్టోబర్‌లో ఈ సంఖ్య 5,92,032 యూనిట్లుగా ఉంది. అంటే ఏడాది ప్రాతిపదికన 84,264 యూనిట్ల అమ్మకాలు తగ్గాయి. అయితే సెప్టెంబర్ 2026లో నమోదైన 4,27,213 యూనిట్లతో పోలిస్తే అక్టోబర్‌లో అమ్మకాలు 18.86 శాతం పెరిగాయి.
మరోవైపు, ఏప్రిల్ నుంచి అక్టోబర్ 2026 వరకు ఏడు నెలల కాలంలో కార్ల రిటైల్ అమ్మకాలు మాత్రం సానుకూల వృద్ధిని నమోదు చేశాయి. ఈ కాలంలో మొత్తం 30,68,353 కార్లు విక్రయించగా, గత ఏడాది ఇదే సమయంలో 26,35,837 యూనిట్లు అమ్ముడయ్యాయి. దీంతో ఏడాది ప్రాతిపదికన 16.14 శాతం వృద్ధి నమోదైంది.
టాటా మోటార్స్ రెండో స్థానానికి.. మహీంద్రాకు మూడో స్థానం
బ్రాండ్‌ల వారీగా అమ్మకాలను పరిశీలిస్తే మారుతీ సుజుకీ తన అగ్రస్థానాన్ని కొనసాగించింది. అక్టోబర్‌లో మొత్తం 2,11,996 కార్లను విక్రయించింది. గత ఏడాది ఇదే నెలలో నమోదైన 2,49,521 యూనిట్లతో పోలిస్తే అమ్మకాలు 15.04 శాతం తగ్గాయి. అయినప్పటికీ 41.75 శాతం మార్కెట్ వాటాతో మొదటి స్థానంలో నిలిచింది.
ఇక టాటా మోటార్స్ కీలకమైన ముందడుగు వేసింది. సెప్టెంబర్‌లో మహీంద్రా కంటే కేవలం 89 కార్లు వెనుకబడిన టాటా మోటార్స్.. అక్టోబర్‌లో రెండో స్థానాన్ని కైవసం చేసుకుంది. ఈ సంస్థ 73,449 కార్లను విక్రయించింది. గత ఏడాది అక్టోబర్‌తో పోలిస్తే అమ్మకాలు 8.21 శాతం తగ్గినప్పటికీ, మహీంద్రాను అధిగమించింది.
మహీంద్రా 64,982 యూనిట్ల అమ్మకాలతో మూడో స్థానానికి పరిమితమైంది. గత ఏడాది ఇదే నెలలో విక్రయించిన 73,739 కార్లతో పోలిస్తే 11.88 శాతం క్షీణత నమోదైంది. టాటా మోటార్స్, మహీంద్రా మధ్య అమ్మకాల వ్యత్యాసం 8,467 యూనిట్లుగా ఉంది. మార్కెట్ వాటా పరంగా టాటా మోటార్స్ 14.47 శాతం, మహీంద్రా 12.80 శాతం వాటాను కలిగి ఉన్నాయి.
హ్యుందాయ్ నాలుగో స్థానంలో.. కియా దూకుడు
హ్యుందాయ్ 58,099 కార్ల విక్రయాలతో నాలుగో స్థానాన్ని నిలబెట్టుకుంది. గత ఏడాది అక్టోబర్‌లో 69,458 యూనిట్లు అమ్ముడవగా, ఈసారి అమ్మకాలు 16.35 శాతం తగ్గాయి. మార్కెట్ వాటా 11.44 శాతంగా నమోదైంది. అయితే హ్యుందాయ్ వెన్యూ మోడల్ ఈ నెలలో తన చరిత్రలోనే అత్యధిక అమ్మకాలను నమోదు చేయడం విశేషం.
కియా మోటార్స్ 30,799 యూనిట్ల అమ్మకాలతో టయోటాను అధిగమించి ఐదో స్థానానికి చేరుకుంది. గత ఏడాదితో పోలిస్తే అమ్మకాలు 12.99 శాతం తగ్గాయి. మరోవైపు టయోటా 28,727 కార్లను విక్రయించి ఆరో స్థానంలో నిలిచింది. గత ఏడాది ఇదే నెలలో 38,367 యూనిట్లు విక్రయించిన టయోటా ఈసారి 25.13 శాతం క్షీణతను చవిచూసింది.
స్కోడా-ఫోక్స్‌వ్యాగన్ గ్రూప్ అమ్మకాలు 32.02 శాతం తగ్గి 9,150 యూనిట్లకు పరిమితమయ్యాయి. జేఎస్‌డబ్ల్యూ ఎంజీ మోటార్ మాత్రం 5.25 శాతం వృద్ధితో 7,082 కార్లను విక్రయించింది.
వినియోగదారుల ఆసక్తి ఏ కార్లపై?
ఇంధన రకం ఆధారంగా చూస్తే పెట్రోల్, ఇథనాల్ కార్లకు అత్యధిక ఆదరణ లభించింది. మొత్తం అమ్మకాల్లో వీటి వాటా 41.60 శాతంగా ఉంది. సీNG, ఎల్‌పీజీ కార్లు 24.59 శాతం వాటాతో రెండో స్థానంలో నిలిచాయి. డీజిల్ కార్ల వాటా 16.57 శాతంగా నమోదైంది. హైబ్రిడ్ కార్ల వాటా 9.94 శాతానికి, ఎలక్ట్రిక్ వాహనాల వాటా 7.38 శాతానికి చేరుకుంది.
ఇతర కంపెనీల అమ్మకాలను పరిశీలిస్తే హోండా కార్స్ 29.86 శాతం తగ్గి 5,455 యూనిట్లకు పరిమితమైంది. రెనాల్ట్ అమ్మకాలు 31.57 శాతం క్షీణించి 3,505 యూనిట్లుగా నమోదయ్యాయి. నిస్సాన్ మాత్రం 23.56 శాతం వృద్ధితో 3,273 కార్లను విక్రయించింది.
ఎలక్ట్రిక్ వాహనాల తయారీ సంస్థ విన్ఫాస్ట్ అమ్మకాల్లో భారీ వృద్ధిని నమోదు చేసింది. గత ఏడాది అక్టోబర్‌లో కేవలం 142 కార్లను విక్రయించిన ఈ సంస్థ.. ఈసారి 2,571 యూనిట్లను విక్రయించింది. బీఎండబ్ల్యూ 1,770 కార్లతో మెర్సిడెస్ బెంజ్‌ను అధిగమించింది. మెర్సిడెస్ బెంజ్ అమ్మకాలు 19.02 శాతం తగ్గి 1,682 యూనిట్లకు చేరాయి.
గ్రామీణ, పట్టణ మార్కెట్లలోనూ వృద్ధి
అక్టోబర్‌లో మొత్తం కార్ల అమ్మకాలు తగ్గినప్పటికీ పట్టణ, గ్రామీణ ప్రాంతాల్లో డిమాండ్ సానుకూలంగా నమోదైంది. పట్టణ ప్రాంతాల్లో 20.10 శాతం, గ్రామీణ ప్రాంతాల్లో 16.90 శాతం వృద్ధి నమోదైంది.
అక్టోబర్ నెలలో కార్ల అమ్మకాలు తగ్గడానికి పండుగల క్యాలెండర్‌లో వచ్చిన మార్పులు ప్రధాన కారణంగా కనిపిస్తున్నాయి. నవంబర్‌లో దీపావళి, ధన్‌తేరస్ కొనుగోళ్లు ఏ మేరకు అమ్మకాలను పెంచుతాయన్నది ఆసక్తికరంగా మారింది. ముఖ్యంగా మారుతీ సుజుకీ ఆధిపత్యం, టాటా మోటార్స్ రెండో స్థానాన్ని నిలబెట్టుకోవడం, మహీంద్రా తిరిగి పుంజుకోవడం వంటి అంశాలు రాబోయే నెలల్లో భారత కార్ల మార్కెట్ పోటీని మరింత ఆసక్తికరంగా మార్చనున్నాయి.
