IT Jobs : ఐటీ రంగంలో ఉద్యోగం అంటే ఒకప్పుడు భద్రమైన కెరీర్కు గుర్తుగా ఉండేది. మంచి ప్యాకేజీతో ఆఫర్ లెటర్ చేతికి వస్తే ఇక కెరీర్ సెట్ అయిపోయినట్టేనని చాలామంది భావించేవారు. కానీ ఇప్పుడు పరిస్థితులు పూర్తిగా మారిపోయాయి. ఉద్యోగంలో చేరిన మూడు నెలలకే తొలగింపునకు గురవుతున్న ఉద్యోగుల సంఖ్య పెరుగుతోందన్న వార్తలు ఐటీ వర్గాల్లో ఆందోళన కలిగిస్తున్నాయి. ఆఫర్ లెటర్ అందుకున్న ఆనందం పూర్తిగా తగ్గకముందే కంపెనీలు ఉద్యోగులను బయటకు పంపుతున్న ఘటనలు చోటుచేసుకుంటున్నాయి.
కరోనా తర్వాత ప్రపంచవ్యాప్తంగా టెక్నాలజీ రంగంలో భారీగా నియామకాలు జరిగాయి. అయితే ఆ తర్వాత డిమాండ్ తగ్గడం, ఆర్థిక అనిశ్చితి, కంపెనీల వ్యయ నియంత్రణ చర్యలు, ఆటోమేషన్తో పాటు జనరేటివ్ ఏఐ వినియోగం పెరగడం వంటి కారణాలతో అనేక సంస్థలు ఉద్యోగుల సంఖ్యను తగ్గించడం ప్రారంభించాయి. ముఖ్యంగా సాఫ్ట్వేర్ డెవలప్మెంట్, టెస్టింగ్, కస్టమర్ సపోర్ట్, డేటా ప్రాసెసింగ్ వంటి కొన్ని విభాగాల్లో ఏఐ ఆధారిత టూల్స్ వినియోగం పెరుగుతోంది.
దీంతో ఇప్పటికే ఉద్యోగం కోల్పోయిన పలువురు ఐటీ నిపుణులు తమ అనుభవాలను సోషల్ మీడియాలో వీడియోల రూపంలో పంచుకుంటున్నారు. ఉద్యోగం కోసం నెలల తరబడి ప్రయత్నించిన తర్వాత వచ్చిన అవకాశం కూడా కొద్ది నెలల్లోనే కోల్పోయామని కొందరు ఆవేదన వ్యక్తం చేస్తున్నారు. ముఖ్యంగా ఫ్రెషర్లు, ఇటీవల ఉద్యోగాల్లో చేరినవారు, కాంట్రాక్ట్ లేదా ప్రాజెక్ట్ ఆధారిత ఉద్యోగుల్లో ఈ భయం ఎక్కువగా కనిపిస్తోంది.
అయితే ఏఐ అంటే ఉద్యోగాలన్నీ పూర్తిగా కనుమరుగవుతాయనే అర్థం కాదని నిపుణులు చెబుతున్నారు. సాంకేతికత మారుతున్న కొద్దీ ఉద్యోగాల స్వభావం కూడా మారుతుందని, కొత్త నైపుణ్యాలు ఉన్నవారికి అవకాశాలు కొనసాగుతాయని సూచిస్తున్నారు. ఏఐ టూల్స్ను ఉపయోగించగలగడం, క్లౌడ్ కంప్యూటింగ్, సైబర్ సెక్యూరిటీ, డేటా అనలిటిక్స్, మెషిన్ లెర్నింగ్ వంటి ఆధునిక నైపుణ్యాలను అభివృద్ధి చేసుకోవడం ఉద్యోగులకు ఉపయోగపడొచ్చు.
ప్రస్తుతం ఐటీ ఉద్యోగులకు నిపుణులు ఇస్తున్న ప్రధాన సూచన కూడా ఇదే. చేతిలో ఉన్న ఉద్యోగాన్ని నిర్లక్ష్యం చేయకుండా పనితీరును మెరుగుపరుచుకోవడం, సంస్థకు అవసరమైన నైపుణ్యాలను పెంచుకోవడం, కొత్త టెక్నాలజీలను నేర్చుకోవడం కీలకం. ఒకే టెక్నాలజీపై ఆధారపడకుండా నిరంతరం అప్స్కిల్, రీస్కిల్ చేసుకోవడం అవసరం.
అయితే ఇక్కడ మరో ముఖ్యమైన ప్రశ్న కూడా ఉంది. ఏఐ, ఆటోమేషన్ పేరుతో సంస్థలు ఎంతమేరకు ఉద్యోగాలను తగ్గిస్తాయి? ఉద్యోగాలు కోల్పోతున్న వారికి కొత్త అవకాశాలు ఎలా కల్పించాలి? కంపెనీలు ఏఐ ద్వారా వచ్చే ఉత్పాదకత ప్రయోజనాలను ఉద్యోగుల నైపుణ్యాభివృద్ధికి కూడా ఉపయోగించాలా? అనే చర్చ ఇప్పుడు ప్రపంచవ్యాప్తంగా జరుగుతోంది.
ఏఐను ఆపడం సాధ్యం కాకపోయినా, దాని ప్రభావంతో ఉద్యోగ మార్కెట్లో వస్తున్న మార్పులకు ఉద్యోగులు, కంపెనీలు, విద్యా సంస్థలు కలిసి సిద్ధం కావాల్సిన అవసరం మాత్రం స్పష్టంగా కనిపిస్తోంది. రాబోయే రోజుల్లో కేవలం డిగ్రీ లేదా అనుభవం కంటే.. మారుతున్న టెక్నాలజీకి అనుగుణంగా పనిచేయగల సామర్థ్యమే ఉద్యోగ భద్రతలో కీలక పాత్ర పోషించే అవకాశం ఉంది.
ఒక ఐటీ ఉద్యోగి ఆవేదన ఇది .. రిక్రూట్ చేసుకున్న మూడునెలలకే ఐటీ ఉద్యోగుల్ని తీసేస్తున్నారు .. ఐటీ రంగం పరిస్థితి అస్సలు బాగోలేదు .. అందుకే పని చేసే చోట ఎలాగోలా సర్దుకుని ఉద్యోగం చేసుకోండి అని సలహా ఇస్తున్నారు pic.twitter.com/tdvInF00wP
— ASHOK VEMULAPALLI (@ashuvemulapalli) September 22, 2026
