Karthikeya: ఆర్ఎక్స్ 100 సినిమాతో హీరోగా గొప్ప గుర్తింపు తెచ్చుకున్నారు కార్తికేయ. కాగా, కార్తికేయ హీరోగా తాన్య రవించ్రంద్రన్ హీరోయిన్గా నటిస్తోన్న సినిమా రాజా విక్రమార్క. ఈ సినిమాతో తెలుగు తెరకు దర్శకుడిగా పరిచయమవుతున్నారు శ్రీ సిరిపల్లి. తాజాగా, వీవీఐటీలో ఈ చిత్రయూనిట్ సందడి చేసింది. పొన్నూరు నియోజకవర్గంలోని పెదకాకాని మండలం నంబూరు వాసిరెడ్డి వెంకటాద్రి ఇన్స్టిట్యూట్ ఆఫ్ టెక్నాలజీ కళాశాలను బుధవారం రాజా విక్రమార్క చిత్రయూనిట్ సందర్శించింది. ఈ క్రమంలోనే స్టూడెంట్స్తో ముచ్చటించింది.
ఈ సందర్భంగా హీరో కార్తికేయ మాట్లాడుతూ.. అద్భుతమైన సాంకేతిక హంగులతో అందరినీ ఆకట్టుకునేలా ఈ సినిమాను తెరకెక్కించినట్లు తెలిపారు. దర్శకుడు శ్రీ సరిపల్లికి ఇది తొలి సినిమా అయినప్పటికీ.. ఎంతో నైపుణ్యంతో సినిమాను రూపొందించినట్లు పేర్కొన్నారు. ఇప్పటికే విడుదలైన ఈ సినిమా పాటలకు జనాల్లో మంచి టాక్ నడుస్తోంది. తన తొలి సినిమా నుంచి ప్రచారంలో భాగంగా వీవీఐటీని సందర్శించడం మాములైందని అన్నారు. కాగా, మరోవైపు శ్రీ సరిపల్లి మాట్లాడుతూ.. మంచి కథతో ప్రేక్షకులనకు పరిచయమవ్వడం ఎంతో సంతోషంగా ఉందని అన్నారు. నవంబరు 12న ఈ సినిమా విడుదల కానుందని అన్నారు. రాజా విక్రమార్క సినిమా తప్పకుండా విజయం సాధిస్తుందని ధీమా వ్యక్తం చేశారు. ఈ క్రమంలోనే విద్యార్థులతో సెల్ఫీలు దిగుతూ హీరో కార్తికేయ సందడి చేశారు.
