WhatsApp Android Update : ప్రముఖ మెసేజింగ్ యాప్ వాట్సాప్ (WhatsApp) ఎప్పటికప్పుడు కొత్త ఫీచర్లను అందుబాటులోకి తీసుకొస్తూ యూజర్ల అనుభవాన్ని మెరుగుపరుస్తోంది. ఇప్పటికే మెసేజింగ్, వాయిస్ కాల్స్, వీడియో కాల్స్, ఛానల్స్, కమ్యూనిటీస్ వంటి అనేక ఫీచర్లతో కోట్లాది మంది వినియోగదారులను ఆకట్టుకుంటున్న ఈ సంస్థ.. తాజాగా మరో కీలక మార్పునకు సిద్ధమవుతోంది. ఆండ్రాయిడ్ యూజర్ల కోసం ప్రత్యేకంగా కొత్త కాంటాక్ట్స్ ట్యాబ్‌ను తీసుకొస్తున్నట్లు సమాచారం. ప్రస్తుతం కొంతమంది బీటా టెస్టర్లకు ఈ ఫీచర్ అందుబాటులోకి వచ్చినట్లు టెక్ వర్గాల్లో కథనాలు వెలువడుతున్నాయి.
కమ్యూనిటీస్ స్థానంలో కాంటాక్ట్స్ ట్యాబ్!
WABetaInfo నివేదిక ప్రకారం.. వాట్సాప్ ఆండ్రాయిడ్ బీటా వెర్షన్ 2.26.45.2లో కొత్త కాంటాక్ట్స్ ట్యాబ్‌ను పరీక్షిస్తోంది. ప్రస్తుతం యాప్ కింది భాగంలో కనిపించే నావిగేషన్ బార్‌లో కమ్యూనిటీస్ ట్యాబ్ స్థానంలో ఈ కొత్త విభాగాన్ని తీసుకొస్తున్నట్లు తెలుస్తోంది. దీని ద్వారా యూజర్లు తమ ఫోన్‌లో సేవ్ చేసుకున్న కాంటాక్ట్స్‌ను నేరుగా వాట్సాప్‌లోనే చూడవచ్చు. అంతేకాదు, చాట్స్ విభాగానికి వెళ్లకుండానే తమకు కావాల్సిన వ్యక్తిని ఎంచుకుని నేరుగా సంభాషణ ప్రారంభించవచ్చు.
కాంటాక్ట్స్‌ను సులభంగా ఆర్గనైజ్ చేసుకునే అవకాశం
కొత్త కాంటాక్ట్స్ ట్యాబ్‌లో ఫేవరెట్స్‌కు ప్రత్యేక ప్రాధాన్యత ఇవ్వనున్నట్లు సమాచారం. యూజర్లు ఎక్కువగా మాట్లాడే వ్యక్తులను ఫేవరెట్స్ విభాగంలో పైభాగంలో చూడవచ్చు. మిగిలిన కాంటాక్ట్స్ వాటి కింద కనిపిస్తాయి. అంతేకాదు, కాంటాక్ట్స్‌ను వివిధ పద్ధతుల్లో క్రమబద్ధీకరించుకునే సదుపాయం కూడా ఉండనుంది.
అక్షర క్రమంలో (Alphabetical Order), పుట్టినరోజుల ఆధారంగా (Birthdays), యాక్టివిటీ ఆధారంగా (Activity) కాంటాక్ట్స్‌ను సార్ట్ చేసుకునే అవకాశం కల్పించనున్నట్లు తెలుస్తోంది. యాక్టివిటీ ఆప్షన్ ఎంచుకుంటే ప్రస్తుతం ఆన్‌లైన్‌లో ఉన్న వ్యక్తులు ముందుగా కనిపిస్తారు. వారి పేర్ల పక్కన గ్రీన్ డాట్ కూడా ప్రదర్శించబడుతుంది. మిగిలిన కాంటాక్ట్స్ చివరిసారిగా ఎప్పుడు ఆన్‌లైన్‌లో ఉన్నారనే సమాచారం ఆధారంగా క్రమబద్ధీకరించబడతాయి. అయితే, ఈ వివరాలు యూజర్ల ప్రైవసీ సెట్టింగ్స్‌కు అనుగుణంగానే కనిపిస్తాయి.
మెటా ఏఐకి కూడా ప్రత్యేక షార్ట్‌కట్!
ఈ కొత్త ట్యాబ్‌లో మెటా ఏఐ (Meta AI) షార్ట్‌కట్‌ను కూడా అందించే అవకాశం ఉన్నట్లు నివేదిక వెల్లడించింది. దీంతో యూజర్లు నేరుగా కాంటాక్ట్స్ విభాగం నుంచే ఏఐ సేవలను యాక్సెస్ చేయవచ్చు. అలాగే వాట్సాప్ ఇన్వైట్ లింకులను షేర్ చేయడం, ఇన్‌స్టాగ్రామ్ ఫాలోవర్లను వాట్సాప్‌లో చాట్ చేసేందుకు ఆహ్వానించడం వంటి ఆప్షన్లు కూడా అందుబాటులోకి రావచ్చని తెలుస్తోంది.
ఫోన్ నంబర్ లేకున్నా కాంటాక్ట్ యాడ్ చేయవచ్చా?
కొత్త ఫీచర్‌లో మరో ఆసక్తికరమైన అంశం కాంటాక్ట్ యాడ్ చేసే విధానం. కాంటాక్ట్స్ ట్యాబ్ దిగువన ప్రత్యేకంగా యాడ్ కాంటాక్ట్ బటన్ ఉండనున్నట్లు సమాచారం. దీని ద్వారా పేరు, యూజర్‌నేమ్ లేదా ఫోన్ నంబర్ ఉపయోగించి కొత్త కాంటాక్ట్స్‌ను జోడించవచ్చు. ఫోన్ నంబర్ ఆధారంగా సేవ్ చేసే కాంటాక్ట్స్‌ను నేరుగా ఫోన్ అడ్రస్ బుక్‌లో కూడా స్టోర్ చేసుకునే అవకాశం ఉండనుంది.
ఎప్పటి నుంచి అందరికీ అందుబాటులోకి వస్తుంది?
ప్రస్తుతం ఈ ఫీచర్ గూగుల్ ప్లే బీటా ప్రోగ్రామ్ ద్వారా వాట్సాప్ ఆండ్రాయిడ్ బీటా వెర్షన్ 2.26.45.2 ఉపయోగిస్తున్న కొంతమంది యూజర్లకు మాత్రమే అందుబాటులోకి వస్తోంది. దశలవారీగా మరింత మంది బీటా టెస్టర్లకు విస్తరించే అవకాశం ఉంది. అయితే, సాధారణ ఆండ్రాయిడ్ యూజర్లందరికీ ఈ ఫీచర్ ఎప్పటి నుంచి అందుబాటులోకి వస్తుందనే విషయంపై వాట్సాప్ అధికారికంగా ఎలాంటి ప్రకటన చేయలేదు.
కొత్త కాంటాక్ట్స్ ట్యాబ్ అందుబాటులోకి వస్తే వాట్సాప్‌లో వ్యక్తులను వెతకడం, ఆన్‌లైన్‌లో ఉన్నవారిని గుర్తించడం, కొత్త కాంటాక్ట్స్‌ను జోడించడం మరింత సులభం కానుంది. ముఖ్యంగా ఎక్కువ మంది కాంటాక్ట్స్ ఉన్నవారికి ఈ ఫీచర్ ఉపయోగకరంగా మారే అవకాశం ఉంది.
