TANA Charlotte : విదేశీ గడ్డపై తెలుగు సమాజం మరోసారి సామాజిక బాధ్యతను చాటుకుంది. పర్యావరణ పరిరక్షణ, పరిసరాల పరిశుభ్రతే లక్ష్యంగా తానా ఆధ్వర్యంలో చేపట్టిన ‘అడాప్ట్ ఏ స్ట్రీట్ – ఫేజ్ 2’ కార్యక్రమంలో విద్యార్థులు, తల్లిదండ్రులు, ప్రవాస తెలుగు ప్రతినిధులు పెద్ద సంఖ్యలో భాగస్వాములయ్యారు.
అమెరికాలో స్థిరపడినా.. సామాజిక బాధ్యతను మరిచిపోలేదు. నివసిస్తున్న ప్రాంతాన్ని పరిశుభ్రంగా ఉంచుకోవడం కూడా సమాజ సేవలో భాగమేనని చాటిచెప్పారు ఉత్తర అమెరికా తెలుగు సంఘం (తానా) సభ్యులు. నార్త్ కరోలినా రాష్ట్రంలోని చార్లెట్ నగరంలో తానా అప్పలాచియన్ రీజియన్ ఆధ్వర్యంలో నిర్వహించిన ‘అడాప్ట్ ఏ స్ట్రీట్ – ఫేజ్ 2’ కార్యక్రమం స్థానికంగా ఆకట్టుకుంది.
నవంబర్ 7, శనివారం దక్షిణ చార్లెట్ ప్రాంతంలో ఈ సేవా కార్యక్రమాన్ని నిర్వహించారు. ఆర్డ్రీ కెల్ రోడ్, టామ్ షార్ట్ రోడ్ అనే రెండు ప్రధాన రహదారులను దత్తత తీసుకుని, వాటి పరిసరాలను పరిశుభ్రంగా ఉంచేందుకు వాలంటీర్లు ముందుకొచ్చారు. రోడ్ల పరిశుభ్రతతో పాటు పర్యావరణ పరిరక్షణపై స్థానికుల్లో అవగాహన పెంచడం ఈ కార్యక్రమం వెనుక ఉన్న ప్రధాన ఉద్దేశం.
విద్యార్థులే ముందుండి..
ఈ కార్యక్రమంలో సుమారు 30 మంది విద్యార్థి వాలంటీర్లు పాల్గొనడం ప్రత్యేక ఆకర్షణగా నిలిచింది. తల్లిదండ్రులు, తానా సభ్యులు, స్థానిక నాయకత్వ బృందంతో కలిసి విద్యార్థులు ఉత్సాహంగా సేవలందించారు. చిన్న వయసు నుంచే సామాజిక బాధ్యత, పర్యావరణ స్పృహ, సేవా దృక్పథాన్ని అలవర్చాలనే లక్ష్యంతో ఈ కార్యక్రమాన్ని నిర్వహించారు.
సమాజంలో మార్పు రావాలంటే ప్రభుత్వాలే కాకుండా పౌరులు కూడా బాధ్యత తీసుకోవాలనే సందేశాన్ని ఈ కార్యక్రమం చాటిచెప్పింది. ముఖ్యంగా విద్యార్థులు స్వచ్ఛందంగా ముందుకు రావడం భవిష్యత్తు తరాల్లో సామాజిక స్పృహ పెరుగుతోందనడానికి నిదర్శనంగా నిలిచింది.
తానా సేవలకు సిటీ కౌన్సిల్ ప్రశంసలు
చార్లెట్ సిటీ కౌన్సిల్ సైతం తానా బృందం చేపట్టిన కార్యక్రమాన్ని అభినందించింది. నగరంలోని రెండు ముఖ్యమైన రహదారులను దత్తత తీసుకుని వాటి పరిశుభ్రతకు బాధ్యత వహించడం పట్ల ప్రశంసలు వ్యక్తం చేసింది. స్థానిక సమాజ అభివృద్ధిలో ప్రవాస తెలుగు సంఘాలు భాగస్వాములు కావడం అభినందనీయమని పేర్కొంది.
ఈ కార్యక్రమంలో పాల్గొన్న విద్యార్థులు, వారిని ప్రోత్సహించిన తల్లిదండ్రులు, తానా సభ్యులకు నిర్వాహకులు ప్రత్యేక కృతజ్ఞతలు తెలిపారు. తానా అధ్యక్షుడు నరేన్ కొడాలి, ఎగ్జిక్యూటివ్ వైస్ ప్రెసిడెంట్ శ్రీనివాస్ లావు కార్యక్రమంలో పాల్గొన్న వారిని ప్రత్యేకంగా అభినందించారు.
నిర్వహణలో కీలకంగా వ్యవహరించిన నాయకత్వ బృందం
తానా అప్పలాచియన్ రీజియన్ నాయకత్వ బృందానికి చెందిన రవి (నాని) వడ్లమూడి, ఠాగూర్ మల్లినేని, కిరణ్ కొత్తపల్లి, నాగ పంచుమర్తి, మాధురి ఏలూరి ఈ కార్యక్రమ నిర్వహణలో కీలక పాత్ర పోషించారు.
కేవలం ఒకరోజు పరిశుభ్రత కార్యక్రమానికే పరిమితం కాకుండా.. స్థానిక సమాజంలో నిరంతర సేవా స్ఫూర్తిని పెంపొందించడమే తమ లక్ష్యమని తానా అప్పలాచియన్ రీజియన్ – చార్లెట్ ప్రతినిధులు తెలిపారు. భవిష్యత్తులోనూ పర్యావరణ పరిరక్షణ, సామాజిక సేవ, స్థానిక సమాజ అభివృద్ధికి ఉపయోగపడే కార్యక్రమాలను కొనసాగిస్తామని వెల్లడించారు.
విదేశాల్లో నివసిస్తున్నా సామాజిక బాధ్యతను విస్మరించకుండా, తమ పిల్లలను సైతం సేవా కార్యక్రమాల్లో భాగస్వాములను చేయడం ద్వారా చార్లెట్ తెలుగు సమాజం మంచి సందేశాన్ని ఇచ్చింది. రోడ్లను దత్తత తీసుకోవడం ఒక కార్యక్రమం మాత్రమే కాదు.. పరిశుభ్రమైన సమాజ నిర్మాణంలో ప్రతి ఒక్కరికీ బాధ్యత ఉందని గుర్తుచేసిన చొరవగా నిలిచింది.
