Gnaneshwari Missing Case: తుని చిన్నారి జ్ఞానేశ్వరి అదృశ్యం కేసు మిస్టరీ ఇంకా వీడడం లేదు. దీనికి సంబంధించి చిక్కుముళ్ళు అలానే ఉన్నాయి. ఇప్పటివరకు కిడ్నాప్ కోణంలో పోలీసులు దర్యాప్తు చేశారు. జ్ఞానేశ్వరి ఆచూకీ కోసం వందలాది మంది పోలీసులు జల్లెడ పడుతున్నారు. ఎస్టిఆర్ఎఫ్ తో పాటు ఎన్డీఆర్ఎఫ్ బృందాలు కూడా రంగంలోకి దిగాయి. రాపిడ్ యాక్షన్ ఫోర్స్ తో సైతం పోలీసుల ఉన్నతాధికారులు ఎప్పటికప్పుడు శోధన చేస్తున్నారు. కానీ ఏ ప్రయత్నాలు కూడా వర్కౌట్ కావడం లేదు. ఇప్పటివరకు కిడ్నాప్ అన్న కోణంలో దర్యాప్తు కొనసాగింది. చివరకు తండ్రిని సైతం అదుపులోకి తీసుకొని విచారణ జరిపారు. మరోవైపు చిన్నారితో కనిపించని కుక్క ఇంటి వద్దకు వచ్చినట్టే వచ్చి చనిపోయింది. ఈ పరిస్థితుల్లో అటవీ జంతువుల బారిన పడి ఉండవచ్చు అనే అనుమానం పోలీసుల్లో ఉంది. దానిపైనే ప్రత్యేకంగా దృష్టి పెట్టినారు పోలీసులు.
* అటవీ జంతువుల పై అనుమానం..
ఆయిల్ ఫామ్ పాటలు ఉన్న ప్రాంతంలో కొండలు ఎక్కువగా ఉన్నాయి. అటువైపుగా అడవులు విస్తారంగా ఉన్నాయి. దీంతో వన్యప్రాణులు అటాక్ చేసి ఉండవచ్చు అనే అనుమానాలు ఉన్నాయి. కొండచిలువలు ఏమైనా హాని తలపెట్టాయా అన్న అనుమానాలు వ్యక్తం అవుతున్నాయి. అందుకే పోలీసులు ఆ దిశగా దర్యాప్తు మొదలుపెట్టారు. చిన్నారి మాదిరిగా బొమ్మలను ఏర్పాటు చేసి అందులో కొంత మాంసం పెట్టారు. ఆ వాసనకు అటవీ జంతువులు వచ్చి బొమ్మలను తీసుకెళ్తే.. చిత్రీకరించేందుకు కెమెరాలను సైతం అమర్చారు. ఆ బొమ్మలను అటవీ జంతువులు తీసుకెళ్లే మార్గంలో అన్వేషిస్తే ఈ కేసు ఒక కొలిక్కి వచ్చే అవకాశం ఉందన్నది పోలీసుల ఆలోచన.
* కుక్క మరణంతో..
వాస్తవానికి చిన్నారితో పాటు పెంపుడు కుక్క కనిపించలేదు. అయితే అక్కడకు రెండు రోజులకు ఆ కుక్క ఇంటి వద్దకు వచ్చింది. కానీ వింత ప్రవర్తనతో కనిపించింది. దీంతో పోలీసులు ఒక ఆలోచన చేశారు. దాని మెడకు జిపిఆర్ఎస్ ట్రాకర్ను అమర్చారు. దానిని అనుసరించే ప్రయత్నం చేశారు కానీ అది అడవికి వెళ్లి మళ్లీ తిరిగి వచ్చేసింది. అక్కడకు రెండు రోజులకే అలసటతో మృతి చెందింది. అప్పటినుంచి అటవీ జంతువులపై అనుమానాలు మరింత పెరిగాయి. అటవీ జంతువుల బారిన చిన్నారిని తప్పించే క్రమంలో కుక్క పోరాడి ఉంటుందని.. అలా ఫైట్ చేసే క్రమంలో అలసటకు గురై చనిపోయింది అనేది ఒక అనుమానం. అందుకే కుక్క మృతదేహాన్ని పోస్టుమార్టం చేసి కొన్ని నమూనాలను విశాఖ ల్యాబ్ కు పంపించారు. మొత్తానికి అయితే చిన్నారి జ్ఞానేశ్వరి అదృశ్యం మిస్టరీని ఛేదించేందుకు పోలీసులు చేయని ప్రయత్నం అంటూ లేదు.
