Nirmalamma: తెలుగు సినిమా రంగం వయసు కంటే.. ఆమె వయసు పెద్దది. ఆమె నాటకాల్లో ఒక వెలుగు వెలిగి.. సినిమాల్లో అమ్మగా, అమ్మమ్మగా తెలుగు ప్రేక్షకుల హృదయాల్లో శాశ్వతంగా నిలిచిపోయింది. ఆమె అలనాటి నటీమణి నిర్మలమ్మ. తెలుగు సినిమాకు ఆమె బామ్మ, ఆ రోజుల్లో అనగా నలభై ఏళ్ల క్రితం ఆమెను చూసిన ప్రేక్షకులు అంతా ‘మా బామ్మ’ అని మనసుకు దగ్గరగా భావించే వాళ్ళు.
ఇక నిర్మలమ్మ గారి సినీ జీవితం గురించి ముచ్చటించుకుంటే.. నిర్మలమ్మ గారి జీవితమే ఓ నాటకం. ఆమెను ఓ సినిమా షూటింగ్ లో చూసి ప్రేమలో పడ్డాడు ఆ సినిమా ప్రొడక్షన్ మేనేజర్ జీవి కృష్ణారావు. ఆమె ఎంతో పద్దతిగా ఉంది అనుకున్నాడు. అందుకే, తన ప్రేమ సంగతి ఆమెకు చెప్పకుండా.. నిర్మలమ్మగారి ఇంటికి వెళ్లి ఆమె నాన్నగారితో పెళ్లి సంబంధం మాట్లాడాడు.
అందరూ ఒప్పుకున్నారు, కానీ నిర్మలమ్మ గారికి మాత్రం ఇష్టం లేదు. పెళ్లి తర్వాత నటనకు దూరం కావాల్సి వస్తుందేమో అని ఆమె భయం. అయినా జీవి కృష్ణారావు గారు ఆమె వెంటే పడుతూ పెళ్లి చేసుకుందాం అని అడుగుతూ ఉండేవారు. ఆయన ప్రవర్తన నచ్చడంతో ఇక కృష్ణారావుతో పెళ్ళికి ఒప్పుకుంటూ ఒక కండిషన్ పెట్టారు నిర్మలమ్మ గారు. మన పెళ్లయ్యాక కూడా నేను నటిస్తాను. దానికి మీరు అడ్డు చెప్పకూడదు’ అంది.
నిర్మలమ్మ గారి షరతులకు జీవి కృష్ణారావు గారు తలూపారు. అలా ఇద్దరు ఒకటయ్యారు. అయితే, పెళ్లయ్యాక నిర్మలమ్మ గారికి పిల్లలు పుట్టలేదు. దాంతో ఆమె బాగా డిప్రెషన్ కి గురి అయింది. ఆ సమయంలోనే నిర్మలమ్మ గారు సినిమాలకి దూరం జరిగారు. కొన్నాళ్ళు అసలు ఆమె ఎవరికీ కనిపించలేదట. మరోపక్క ఆమె భర్త కృష్ణారావుకి ప్రొడక్షన్ మేనేజర్ గా అవకాశాలు తగ్గాయి.
ఆదాయం లేకుండా పోయింది. అప్పులు చేసి బతకాల్సిన పరిస్థితి వచ్చింది. ఆ సమయంలోనే ఇద్దరు నాటక రంగంపై దృష్టి పెట్టి.. ఎన్నో నాటకాలు వేశారు. ఆ క్రమంలోనే 1961 లో కృష్ణ ప్రేమ అనే సినిమాలో నిర్మలమ్మ గారికి అవకాశం వచ్చింది. ఆ సినిమా నుంచే ఆమె సెకండ్ ఇన్నింగ్స్ మొదలు అయింది. ఇక ఆ తర్వాత నుంచి ఆమె వెనుతిరిగి చూసుకోలేదు.
అక్కినేని నాగేశ్వరరావు, ఎన్టీఆర్ దగ్గర నుంచి మొదలు పెడితే.. చిరంజీవి, బాలకృష్ణ, వెంకటేష్, నాగార్జున వరకు ఎన్నో సినిమాల్లో ఎంతోమంది సూపర్ స్టార్లకి ఆమె అమ్మగా బామ్మగా నటించి తెలుగు తెరకు నిర్మలమైన నటనను అందించి వెళ్లిన గొప్ప నటి నిర్మలమ్మ గారు. ఎలాంటి సీన్ అయిన ఎంతో సాధారణంగా ఆమె నటిస్తోంది. ఆమె సినిమా సెట్స్ ఒక తల్లిలా ఆదరించేదట.
అన్నట్టు నిర్మలమ్మ గారు కవిత అనే ఒక ఆడ పిల్లను దత్తత తీసుకుంది. అలా ఆమెకు ఒక మనమడు ఉన్నాడు. అతని పేరు విజయ్ మాదాల. తన నట వారసుడిగా కూడా ఇతన్ని నిర్మలమ్మ గారు ‘పడమట సంధ్యారాగం’ అనే సినిమాలో గణపతి పాత్రలో ఇండస్ట్రీకి పరిచయం చేశారు. ఈయనకు శోభా అనే అమ్మాయితో వివాహం జరిగింది. ప్రస్తుతం ఈయన అమెరికాలోనే సెటిల్ అయ్యారు.
