Chiranjeevi: ఏపీలో ఓ ఘటన హాట్ టాపిక్ గా మారింది. రాజకీయాల నుంచి దూరంగా ఉన్న మెగాస్టార్ చిరంజీవితో మాజీ మంత్రులు ఇద్దరు ప్రత్యేకంగా భేటీ కావడం చర్చనీయాంశంగా మారింది. ప్రస్తుతం చిరంజీవి నటిస్తున్న భోళాశంకర్ సినిమా షూటింగ్ హైదరాబాద్ లో శరవేగంగా జరుగుతోంది. షూటింగ్ సెట్ లోకి మాజీ మంత్రులు గంటా శ్రీనివాసరావు, పొంగూరు నారాయణ వెళ్లారు. ప్రత్యేకంగా చిరంజీవితో సమావేశమయ్యారు. దీంతో ఈ భేటీ పొలిటికల్ హీట్ పుట్టించింది. ఇంట్లో శుభకార్యానికి ఆహ్వానించేందుకే వెళ్లినట్టు ప్రచారం జరుగుతున్నా.. టీడీపీ, జనసేన మధ్య పొత్తు వాతావరణం నెలకొన్న నేపథ్యంలో ఇది ప్రాధాన్యతను సంతరించుకుంది.
గంటా శ్రీనివాసరావు, చిరంజీవి మంచి మిత్రులు. ఇద్దరి మధ్య సన్నిహిత సంబంధాలున్నాయి. ప్రజారాజ్యం పార్టీ సమయంలో ఇద్దరూ కలిసి పనిచేశారు. పీఆర్పీని కాంగ్రెస్ లో విలీన సమయంలో గంటాకు రాష్ట్ర మంత్రివర్గంలో చోటుదక్కింది. చిరంజీవి కేంద్ర మంత్రిగా బాధ్యతలు స్వీకరించారు.చిరంజీవి మెల్లగా రాజకీయాలకు దూరమయ్యారు. రాజ్యసభ సభ్యత్వం ముగిసిన తర్వాత తాను ఇక క్రియాశీలక రాజకీయాలకు దూరమని ప్రకటించారు. ఆయనను తమ పార్టీలో చేర్చుకునేందుకు భారతీయ జనతా పార్టీ తీవ్రంగా ప్రయత్నిస్తోంది. అయినప్పటికి ఆయన మాత్రం తాను రాజకీయాలకు పూర్తిగా విరామం ప్రకటించేనని నిర్మోహమాటంగాప్రకటించారు. రాజకీయ కార్యక్రమాలకూ దూరంగా ఉంటున్నారు .
గంటా శ్రీనివాసరావు, పొంగూరు నారాయణలు వియ్యంకులు. గత టీడీపీ ప్రభుత్వంలో మంత్రులుగా పనిచేశారు. కానీ టీడీపీ ఓడిపోయిన తర్వాత ఇద్దరూ సైలెంట్ అయ్యారు. చంద్రబాబు హయాంలో మంత్రివర్గంలో కీలక పాత్ర పోషించి పొంగూరు నారాయణపై ప్రభుత్వం పలు రకాల కేసులు పెట్టింది. ఆయన న్యాయపోరాటం చేస్తున్నారు. వచ్చే ఎన్నికల్లో నెల్లూరు సిటీ నుంచి మరోసారి పోటీ చేస్తారన్న ప్రచారం జరుగుతోంది. గంటా శ్రీనివాసరావు ఇటీవలి కాలంలో టీడీపీలో యాక్టివ్ అయ్యారు. లోకేష్ పాదయాత్ర .. ఇతర అంశాల్లో తరచూ స్పందిస్తున్నారు. ప్రభుత్వాన్నీ విమర్శిస్తున్నారు. ఎన్నికలు దగ్గర పడుతున్న సమయంలో వారిద్దరూ కలిసి చిరంజీవితో భేటీ కావడం రాజకీయవర్గాల్లో ఆసక్తి రేపుతోంది.
