loan charges G అత్యవసర అవసరాలు, ఇల్లు కొనుగోలు ఇతర వ్యక్తిగత అవసరాల కోసం చాలామంది బ్యాంకులు, ఇతర ఆర్థిక సంస్థల నుంచి రుణాలు తీసుకుంటుంటారు. అయితే లోన్ తీసుకునే సమయంలో చాలామంది ప్రధానంగా వడ్డీ రేటు ఎంత ఉందనే విషయంపైనే దృష్టి పెడతారు. కానీ వాస్తవానికి రుణం తీసుకున్న తర్వాత చెల్లించాల్సిన మొత్తం కేవలం వడ్డీకే పరిమితం కాదు. ప్రాసెసింగ్ ఫీజు నుంచి డాక్యుమెంటేషన్ వరకు రకరకాల ఛార్జీలు ఉంటాయి. వీటి ఛార్జీల గురించి కూడా తెలుసుకోవాల్సిన అవసరం ఉంది. ఎందుకంటే ఇవి ఒక్కో లోన్ కు ఒక్కో విధంగా ఉంటాయి. అయితే ఒక లోన్ లో ఎలాంటి ఛార్జీలు ఉంటాయో తెలుసుకుందాం..
ప్రాసెసింగ్ ఫీజు
లోన్ అప్లికేషన్ను పరిశీలించడం, క్రెడిట్ స్కోర్ను తనిఖీ చేయడం, డాక్యుమెంట్లను వెరిఫై చేయడం, రుణాన్ని ప్రాసెస్ చేయడం వంటి ప్రక్రియల కోసం బ్యాంకులు, ఆర్థిక సంస్థలు ప్రాసెసింగ్ ఫీజును వసూలు చేయవచ్చు. ఈ ఛార్జీ సాధారణంగా లోన్ మొత్తంలో ఒక నిర్దిష్ట శాతంగా లేదా నిర్ణీత మొత్తంగా ఉండొచ్చు. కొన్ని సందర్భాల్లో లోన్ మంజూరైన తర్వాత ఈ ఫీజును వసూలు చేస్తారు. లోన్ తీసుకునే ముందు ప్రాసెసింగ్ ఫీజు ఎంత? అది రీఫండబుల్నా? లోన్ మంజూరు కాకపోతే తిరిగి ఇస్తారా? అనే విషయాలను స్పష్టంగా తెలుసుకోవాలి.
డాక్యుమెంటేషన్, లీగల్ ఛార్జీలు
ముఖ్యంగా హోమ్ లోన్, ప్రాపర్టీ లోన్ వంటి రుణాల్లో ఆస్తికి సంబంధించిన పత్రాలను పరిశీలించడానికి, చట్టపరమైన ధృవీకరణ చేయడానికి లీగల్ ఛార్జీలు ఉండొచ్చు. అలాగే రుణ ఒప్పందాలు, ఇతర పత్రాల తయారీ లేదా ప్రాసెసింగ్కు డాక్యుమెంటేషన్ ఛార్జీలు విధించే అవకాశం ఉంది. ఈ ఖర్చులు రుణ సంస్థను బట్టి మారవచ్చు. అందువల్ల ‘ఇతర ఛార్జీలు’ అనే పేరుతో ఎంత మొత్తం వసూలు చేస్తున్నారో ముందుగానే అడిగి తెలుసుకోవడం మంచిది.
టెక్నికల్ లేదా వాల్యుయేషన్ ఛార్జీలు
హోమ్ లోన్ లేదా ప్రాపర్టీపై రుణం తీసుకునే సందర్భంలో ఆస్తి విలువను అంచనా వేయడానికి బ్యాంకు లేదా రుణదాత టెక్నికల్ నిపుణులను నియమించవచ్చు. ఆస్తి మార్కెట్ విలువ, నిర్మాణ స్థితి, పత్రాల్లో ఉన్న వివరాలు వంటి అంశాలను పరిశీలించేందుకు అయ్యే ఖర్చును వాల్యుయేషన్ లేదా టెక్నికల్ ఛార్జీగా వసూలు చేయవచ్చు. ముఖ్యంగా ప్రాపర్టీ ఆధారిత రుణాల్లో ఈ ఛార్జీలు వర్తించే అవకాశం ఎక్కువగా ఉంటుంది.
బీమా ప్రీమియం
కొన్ని రకాల రుణాలకు బీమా తీసుకోవాలని రుణదాత సూచించవచ్చు. ముఖ్యంగా హోమ్ లోన్ లేదా పెద్ద మొత్తంలో రుణం తీసుకునే సమయంలో రుణగ్రహీతకు సంబంధించిన జీవిత బీమా లేదా ఆస్తికి సంబంధించిన బీమా ఉండాలని సూచించే సందర్భాలు ఉన్నాయి. ఈ బీమా ప్రీమియం రుణ ఖర్చును పెంచవచ్చు. అయితే బీమా తప్పనిసరిగా ఉందా? లేక ఐచ్ఛికమా? ప్రీమియం మొత్తాన్ని ఎలా చెల్లించాలి? వంటి వివరాలను తెలుసుకోవాలి. మీ సమ్మతి లేకుండా అనవసరమైన బీమా ఉత్పత్తిని రుణంతో కలిపి తీసుకోకూడదు.
ఆలస్య చెల్లింపు జరిమానా
లోన్ EMIని గడువులోగా చెల్లించకపోతే ఆలస్య చెల్లింపు ఛార్జీలు లేదా ఇతర పెనాల్టీలు విధించవచ్చు. EMI ఆలస్యం కావడం వల్ల అదనపు ఆర్థిక భారం పడటమే కాకుండా, రుణ ఖాతా పరిస్థితిని బట్టి క్రెడిట్ రిపోర్టుపైనా ప్రతికూల ప్రభావం పడే అవకాశం ఉంటుంది. అందువల్ల ప్రతి నెల EMI చెల్లించాల్సిన తేదీని గుర్తుంచుకుని, బ్యాంక్ ఖాతాలో తగినంత బ్యాలెన్స్ ఉండేలా చూసుకోవాలి. EMI చెల్లింపులో సమస్య ఉంటుందని ముందే తెలిసినప్పుడు రుణదాతను సంప్రదించడం మంచిది.
ప్రీ-క్లోజర్ ఛార్జీలు
లోన్ను నిర్ణయించిన కాలం పూర్తికాకముందే మొత్తం బకాయిని చెల్లించి రుణాన్ని ముగించాలనుకుంటే కొన్ని రుణాల్లో ప్రీ-క్లోజర్ లేదా ఫోర్క్లోజర్ ఛార్జీలు వర్తించవచ్చు. అలాగే కొంత మొత్తాన్ని ముందుగానే చెల్లించే సందర్భంలో పార్ట్-పేమెంట్ నిబంధనలు ఉండవచ్చు. అయితే ఈ ఛార్జీలు రుణ రకం, వడ్డీ విధానం, రుణదాత నిబంధనలు, వర్తించే ప్రస్తుత నియంత్రణలపై ఆధారపడి మారవచ్చు. కాబట్టి లోన్ తీసుకునే సమయంలోనే ముందస్తు చెల్లింపుకు సంబంధించిన నిబంధనలను స్పష్టంగా తెలుసుకోవాలి.
రుణం తీసుకునే ముందు ఏం చేయాలి?
లోన్ అప్లై చేసే ముందు బ్యాంకు లేదా రుణదాత నుంచి అన్ని ఛార్జీల వివరాలను స్పష్టంగా అడిగి తెలుసుకోవాలి. వడ్డీ రేటు, ప్రాసెసింగ్ ఫీజు, ఇతర సేవా ఛార్జీలు, ఆలస్య చెల్లింపు నిబంధనలు, ప్రీ-క్లోజర్ లేదా పార్ట్-పేమెంట్ ఛార్జీలు, బీమా ఖర్చులు వంటి అంశాలను పరిశీలించాలి. రుణదాత ఇచ్చే కీ ఫ్యాక్ట్ స్టేట్మెంట్ (KFS) లేదా సంబంధిత రుణ పత్రాలను జాగ్రత్తగా చదవడం ద్వారా రుణానికి సంబంధించిన ముఖ్యమైన ఖర్చులను ముందుగానే అర్థం చేసుకోవచ్చు.
