San Marino: మనదేశంలో ఏడాది పొడవునా ఎక్కడో ఒకచోట ఎన్నికలు జరుగుతూనే ఉంటాయి. రాష్ట్ర, జాతీయ ఎన్నికల సంఘాలు ఇందుకోసం ఏడాది పొండవునా కసరత్తు చేస్తూనే ఉంటాయి. ఇక అమెరికాలో నాలుగేళ్లకోసారి అధ్యక్ష ఎన్నికలు జరుగుతాయి. మన దేశంలో కూడా పార్లమెంట్, అసెంబ్లీ ఎన్నికలకు ఐదేళ్లకోసారి ఎన్నికలు జరగాలి. కానీ ప్రభుత్వాలు విశ్వాసం కోల్పోయినప్పుడు, ముందస్తు ఎన్నికలకు వెళ్లినప్పుడు ముందుగానే ఎన్నికలు జరుగుతున్నాయి. అయితే ఓ దేశంలో మాత్రం ప్రతీ ఆరు నెలలకోసారి ఎన్నికలు జరుగుతాయి. ఏమిటా దేశం? ఎక్కడుందో తెలుసుకుందాం.
యూరప్ ఖండంలో..
ప్రతి ఆరునెలలకు ఎన్నికలు జరిగే దేశం యూరప్ ఖండంలో ఉంది. పేరు శాన్ మారినో. ప్రపంచంలోని చిన్న దేశాలలో ఒకటిగా పరిగణిస్తారు. ప్రపంచంలోనే అత్యంత పురాతన ప్రజాస్వామ్య దేశం. జనాభా దాదాపు 34 వేలు. ఏడాదిలో రెండుసార్లు ఎన్నికలు జరగడం.. ఫలితాలు వెలువడిన తరువాత అధ్యక్షుడు మారడం ఇక్కడ సర్వసాధారణం. ఎన్నికైన దేశాధినేతను ఆ దేశ ప్రజలు కెప్టెన్–రీజెంట్ అని పిలుస్తారు. గ్రేట్, జనరల్ కౌన్సిల్లోని 60 మంది సభ్యులు కెప్టెన్ రీజెంట్ను ఎన్నుకుంటారు. ఇక్కడి పార్లమెంటును ఆరంగో అంటారు.
పురాతన రాజ్యాంగం..
శాన్మారినోలో మొట్టమొదటి ఎన్నికలు క్రీస్తు శకం 1243లో జరిగాయి. ఈ దేశ రాజ్యాంగం 1600 నుంచి అమల్లోకి వచ్చింది. దేశం మొత్తం విస్తీర్ణం కేవలం 61 చదరపు కిలోమీటర్లు మాత్రమే. ఇది ఇటలీ పొరుగు దేశం. ఇటలీ సంస్కృతి, భాష ఇక్కడ కనిపిస్తుంది. తక్కువ జనాభా ఉండడంతో ఎన్నికల ఖర్చు కూడా ఇక్కడ తక్కువేనట. మన దేశంలో ఓ పంచాయతీకి నిర్వహించిన ఎన్నికలతో సమానంగా ఖర్చు అవుతుందని అంటున్నారు. అయితే అక్కడి రాజ్యాంగం ప్రకారమే ఆరు నెలలకోసారి అక్కడ ఎన్నికలు నిర్వహించడం జరుగుతుందట. ఇప్పటికీ దానినే ఫాలో అవుతున్నారు అక్కడి రాజకీయ నేతలు, పార్టీలు.
