Success Secrets : జీవితంలో గెలవాలని ప్రతి ఒక్కరికీ ఉంటుంది. కానీ అడ్డంకులు, కష్టాలు ఎదురు కావడంతో చాలా మంది గెలుపు వైపు పయనించలేరు. దీంతో అనుకున్న లక్ష్యాలను అధిగమించకుండా మిగిలిపోతున్నారు. కొన్ని పరిస్థితుల కారణంగా కొందరి జీవితంలో అనూహ్య మార్పులు రావడంతో వారు గమ్యస్థానాలకు వెళ్లడం లేదు. మరికొందరు మాత్రం కొన్ని విషయాల పట్ల వ్యతిరేకంగా ఉండడంతో అనుకున్నది సాధించడం లేదు. ఒక గమ్యాన్ని ఏర్పాటు చేసుకొని లక్ష్యం చేరడం ఎవరికైనా ఈజీ కాదు. కానీ ఎవరైనా కొన్ని సూత్రాలను పాటిస్తే మాత్రం అనుకున్నది సాధిస్తారు. ముఖ్యంగా ఈ 5 విషయాలపై శ్రద్ధ పెడితే తప్పకుండా లక్ష్యాలను ఛేదిస్తారని మానసిక శాస్త్రవేత్తలు చెబుతున్నారు. ఇంతకీ ఆ 5 విషయాలేంటంటే?
నమ్మకం:
జీవితం నమ్మకంపై ఆధారపడుతుందనేది చాలా సందర్భాల్లో వినే ఉంటారు. అయితే ముందుగా మీపై మీరు నమ్మకం పెంచుకోండి. ఏదైనా చేయాలని అనుకున్నప్పుడు తప్పకుండా చేస్తామనే నమ్మకం ఏర్పరుచుకోవాలి. తాను ఆ బాధ్యత నిర్వహించే సత్తా తనలో ఉందనే భావన ఏర్పడాలి. అప్పుడే ఎంత పెద్ద పనైనా చేయడానికి శక్తి వస్తుంది.
టార్గెట్:
ఆఫీసులో పనిచేసేటప్పుడు టీం లీడర్ ఒక పనిని అప్పజెబుతాడు. నిర్ణీత సమయంలో పూర్తి చేయాలని ఆర్డర్ వేస్తారు. ఆయన చెప్పిన విషయాన్ని జాగ్రత్తగా అనుకున్న సమయంలో పూర్తి చేస్తారు. అయితే సొంతంగా ఒక పనిచేయడానికి మీకు మీరే టార్గెట్ అవ్వండి. సకాలంలో పూర్తి కాకపోతే ఏం జరుగుతుందో ఆలోచించుకుని భయాన్ని ఏర్పరుచుకొని అనుకున్న సమయంలో పని పూర్తి చేయడానికి ముందుకెళ్లండి.
మీకోసం.. మీ కుటుంబం కోసం:
ఈ రోజుల్లో చాలా మంది వ్యక్తులు అవసరాల కోసమే స్నేహం చేస్తున్నారన్న విషయాలు వింటున్నాం. ఈ నేపథ్యంలో ఇతరుల కోసం కాకుండా మీ కోసం.. మీ కుటుంబం కోసం జీవించడానికి ప్రయత్నించండి. బయటి వారు ఏదో అనుకుంటారని, వాళ్లేదో చేస్తారనే భ్రమలో ఉండకపోవడమే మంచిది.
భవిష్యత్ పై ఆశలు:
ఆశ మనిషిని ముందుకు నడిపిస్తుంది. మంచి ఆశలు పెంచుకోవడం ద్వారా అవి కావాలనే కోరిక బలంగా ఉంటుంది. అందువల్ల భవిష్యత్ లో ఏం చేయాలో? ఏం కావాలో ఆశలు పెంచుకోండి. అందు కోసం కాస్త కష్టం కలిగినా ముందుకు వెళ్లాలి.
ఆత్మవిశ్వాసం దెబ్బతినకుండా:
చాలా మంది చిన్న చిన్న తప్పులకే పెద్దగా కుంగిపోతారు. అందుకు తమను తామే నిందించుకుంటారు. తమ జీవితం బాగాలేదని, జాతకంలో దోషం ఉందని అనుకుంటారు. కానీ కష్టపడితేనే ఫలితం వస్తుందన్న విషయాన్ని గుర్తుకు తెచ్చుకోవాలి. అందుకు అనుగుణంగా ఆత్మ విశ్వాసం పెంచుకోవాలి.
