చంద్రముఖి సినిమా రిలీజై దాదాపు పదేహేనేళ్లు కావస్తోంది. రజనీకాంత్ హీరోగా పి.వాసు దర్శకత్వంలో తెరకెక్కిన చంద్రముఖి సినిమా తెలుగు, తమిళ ప్రేక్షకులు విశేషంగా అలరించింది. ఇందులో గంగ, చంద్రముఖిగా జ్యోతిక రెండు విభిన్న పాత్రల్లో నటించి మెప్పించింది. చంద్రముఖి క్యారెక్టర్లో జ్యోతిక పరకాయప్రవేశం చేసింది. అప్పట్లో ఎక్కడ చూసిన ‘వారయ్.. పాట విన్పించేంది. ప్రతీఒక్కరు ‘ఉమ్మా.. లక..లక..లక’ అంటూ రజనీ, జ్యోతిక మ్యానరిజం చేస్తూ అలరించేవారు. ఆ తర్వాత రిలీజైన పలు సినిమాల్లోనూ చంద్రముఖిని ఇమ్మిటేట్ చేస్తూ కామెడీ, యాక్షన్స్ సీన్స్ చాలా వచ్చాయి. అవి కూడా ప్రేక్షకులను విపరీతంగా అలరించాయి. ప్రస్తుతం ఈ సినిమాకు దర్శకుడు పి.వాసు సీక్వెల్ తీయనున్నాడు. ‘చంద్రముఖి-2’గా ప్రేక్షకుల ముందుకు తీసుకొచ్చేందుకు సన్నహాలు చేస్తున్నాడు.
ఇదిలా ఉంటే ఈ సినిమాలో ముందుగా చంద్రముఖిగా సిమ్రాన్ ను తీసుకోవాలని అనుకున్నారట. అయితే కొన్ని వ్యక్తిగత కారణాలతో సిమ్రాన్ ఈ మూవీలో నటించలేదట. అయితే తాజాగా చంద్రముఖి-2లో సిమ్రాన్ నటించనుందనే వార్తలు విన్పిస్తున్నాయి. ఇటీవలే చంద్రముఖి సీక్వెల్ గురించి జ్యోతికను మీడియా ప్రశ్నించగా ఈ మూవీ కోసం తనను ఎవరూ సంప్రదించలేదని స్పష్టం చేసింది. చంద్రముఖి మూవీ సిక్వెల్ వస్తున్న సంగతి కూడా తనకు తెలియదని చెప్పింది. అయితే దర్శకుడు పీ.వాసు మాత్రం చంద్రముఖి సీక్వెల్ కోసం అన్ని ఏర్పాట్లు చేస్తున్నాడు. రజనీకాంత్ స్థానంలో డ్యాన్సర్ కమ్ హీరో లారెన్స్ నటిస్తున్నాడు. ఇక చంద్రముఖి(జ్యోతిక) స్థానంలో సిమ్రాన్ నటించనుందని ప్రచారం జరుగుతోంది. ‘చంద్రముఖి’లో రజనీకాంత్, జ్యోతిక అభిమానులను ఆకట్టుకోగా ‘చంద్రముఖి-2’లో లారెన్స్, సిమ్రాన్ అలరించేందుకు సిద్ధమవుతోన్నారు. తొలిసారి చేజారిన చంద్రముఖి పాత్రను సిమ్రాన్ తిరిగి ‘చంద్రముఖి-2’లో దక్కించుకోవడం ఆసక్తిని రేపుతోంది. చంద్రముఖిగా సిమ్రాన్ అభిమానులను ఏమేరకు ఆకట్టుకుందో వేచి చూడాల్సిందే..!