gold rate today : ప్రపంచ మార్కెట్లలో ఒకప్పుడు పరుగులు పెట్టిన బంగారం ఇప్పుడు భారీ అమ్మకాల ఒత్తిడిని ఎదుర్కొంటోంది. ఆకాశమే హద్దుగా దూసుకెళ్లిన పసిడి ధరలు ఒక్కసారిగా కుప్పకూలడంతో ఇన్వెస్టర్లు అప్రమత్తమయ్యారు. రికార్డు గరిష్ఠ స్థాయుల నుంచి భారీగా పడిపోయిన బంగారం.. ఇప్పుడు ఎక్కడ ఆగుతుంది? ఏ ధర వద్ద కొనుగోలుదారులు మళ్లీ రంగంలోకి దిగుతారు? అనే ప్రశ్నలు మార్కెట్ వర్గాల్లో ఆసక్తిని రేకెత్తిస్తున్నాయి. ప్రస్తుత పరిస్థితులను పరిశీలిస్తే బంగారం ధరల్లో పతనం ఇంకా పూర్తికాలేదనే సంకేతాలు కనిపిస్తున్నాయి.
రికార్డు గరిష్ఠం నుంచి భారీ పతనం
ఈ ఏడాది జనవరి 29న ఔన్సు బంగారం ధర ఏకంగా 5,602.23 డాలర్ల రికార్డు స్థాయిని తాకింది. అయితే అక్కడి నుంచి మార్కెట్ పరిస్థితులు పూర్తిగా మారిపోయాయి. రికార్డు స్థాయిని అందుకున్న మూడు రోజుల్లోనే ధరలు సుమారు 20 శాతం పడిపోయాయి. అప్పటి నుంచి బంగారం మార్కెట్లో గరిష్ఠ స్థాయులు, కనిష్ట స్థాయులు వరుసగా దిగజారుతున్నాయి.
గతంలో ధరలు వేగంగా పెరిగిన సమయంలో ఇన్వెస్టర్లు భారీగా కొనుగోళ్లకు దిగారు. మార్కెట్ను కోల్పోతామనే భయంతో (FOMO) చాలామంది అధిక ధరల వద్ద కూడా కొనుగోళ్లు చేశారు. అయితే ప్రస్తుతం అదే దూకుడు అమ్మకాల రూపంలో కనిపిస్తోంది. గత ర్యాలీలో ఏర్పడిన చిన్నపాటి కనిష్ట స్థాయులు ప్రస్తుత పతనాన్ని ఆపలేకపోతున్నాయి.
$3,311 స్థాయి అత్యంత కీలకం!
ప్రస్తుతం అంతర్జాతీయ స్పాట్ గోల్డ్ మార్కెట్లో అందరి దృష్టి 2025లో నమోదైన కీలక కనిష్ట ధరలపై ఉంది. సాంకేతిక విశ్లేషణ ప్రకారం బంగారానికి ఎదురుగా ఉన్న ప్రధాన మద్దతు స్థాయులు ఇవే..
$3,311.56: ప్రస్తుత పతనంలో తొలి కీలక టార్గెట్.
$3,120.76: బలమైన మద్దతు లభించే అవకాశం ఉన్న స్థాయి.
$2,956.56: మరో ముఖ్యమైన చారిత్రక కనిష్ట స్థాయి.
$2,832.72: 2025 ఫిబ్రవరి 28న నమోదైన ప్రధాన కనిష్ట స్థాయి.
ఈ స్థాయుల్లో ఏదో ఒక దగ్గర కొనుగోలుదారులు తిరిగి మార్కెట్లోకి వచ్చే అవకాశం ఉందని విశ్లేషణలు సూచిస్తున్నాయి. ముఖ్యంగా $3,120 నుంచి $2,832 మధ్య ప్రాంతాన్ని దీర్ఘకాలిక కొనుగోలుదారులు ఆసక్తిగా పరిశీలించే అవకాశం ఉందని అంచనా.
బంగారం పతనానికి అసలు కారణం ఫెడ్ విధానాలేనా?
బంగారం ధరల తదుపరి గమనాన్ని ప్రభావితం చేయగల అంశాల్లో అమెరికా ఫెడరల్ రిజర్వ్ (ఫెడ్) వడ్డీ రేట్ల విధానం అత్యంత కీలకంగా మారింది. 2025 సెప్టెంబర్లో జరిగిన ఫెడ్ ద్రవ్య విధాన సమావేశం తర్వాత బంగారం ధరల్లో భారీ ర్యాలీ కనిపించింది. భవిష్యత్తులో మరిన్ని వడ్డీ రేట్ల కోతలు ఉంటాయనే అంచనాలు ఇన్వెస్టర్లలో కొనుగోళ్ల ఆసక్తిని పెంచాయి.
అయితే కాలక్రమేణా ఆ అంచనాలు మారిపోయాయి. ఫెడ్ వడ్డీ రేట్లను తగ్గిస్తుందనే ఆశలు తగ్గడం, ద్రవ్యోల్బణ గణాంకాలు అంచనాలను మించడం వంటి పరిణామాలు బంగారంపై ఒత్తిడిని పెంచాయి. సెప్టెంబర్లో రేట్ల పెంపు ఉంటుందనే అంచనాలు కూడా మార్కెట్ సెంటిమెంట్ను దెబ్బతీశాయి. నవంబర్లో వెలువడిన అంచనాలకు మించిన వినియోగదారుల ధరల సూచీ (CPI) గణాంకాలు అమ్మకాల ఒత్తిడిని మరింత పెంచాయి.
వడ్డీ రేట్లు పెరిగే అవకాశం ఉన్నప్పుడు వడ్డీ ఆదాయం ఇవ్వని బంగారంపై పెట్టుబడుల ఆకర్షణ సాధారణంగా తగ్గుతుంది. మరోవైపు రేట్ల కోతల సంకేతాలు వస్తే పసిడికి మళ్లీ డిమాండ్ పెరిగే అవకాశం ఉంటుంది.
పతనం ఆగాలంటే ఏం జరగాలి?
బంగారం ధరలు కేవలం పాత కనిష్ట స్థాయిని తాకినంత మాత్రాన మళ్లీ పైకి వెళ్లకపోవచ్చని మార్కెట్ విశ్లేషణ సూచిస్తోంది. కొనుగోలుదారులు నిజంగా పెద్ద మొత్తంలో పెట్టుబడులు పెట్టేందుకు సిద్ధంగా ఉన్నారనే సంకేతాలు కనిపించాలి. అందుకు మార్కెట్లో ఒక బలమైన పరిణామం అవసరం.
ముఖ్యంగా ఫెడ్ ఇకపై వడ్డీ రేట్లను పెంచే ఆలోచనలో లేదని స్పష్టమైన సంకేతం ఇవ్వడం బంగారానికి సానుకూలంగా మారవచ్చు. అలాంటి పరిణామం ఇన్వెస్టర్ల అంచనాలను మార్చడంతో పాటు ధరల్లో స్థిరమైన బాటమ్ ఏర్పడేందుకు దోహదపడవచ్చు.
మరోవైపు ఆప్షన్స్ గడువు ముగింపు వంటి పరిణామాలు స్వల్పకాలికంగా ధరల్లో మార్పులకు కారణం కావచ్చు. కానీ అలాంటి తాత్కాలిక ర్యాలీలను దీర్ఘకాలిక ట్రెండ్ మార్పుగా భావించడం తొందరపాటు అవుతుంది.
$2,801 స్థాయిపై కూడా విశ్లేషకుల దృష్టి!
బంగారం రికార్డు గరిష్ఠ ధర $5,602.23లో సుమారు 50 శాతానికి సమానమైన $2,801.11 స్థాయిని కూడా దీర్ఘకాలిక విలువ అంచనాలకు ఒక సూచికగా పరిశీలిస్తున్నారు. అయితే ధర తప్పనిసరిగా అక్కడి వరకు పడిపోతుందని దీని అర్థం కాదు. అంతకంటే ముందే పలు కీలక మద్దతు స్థాయుల్లో కొనుగోళ్లు పెరిగే అవకాశం ఉంది.
ఇన్వెస్టర్లు ఏం గమనించాలి?
ప్రస్తుతానికి బంగారం మార్కెట్పై స్వల్పకాలిక అంచనా ప్రతికూలంగానే ఉంది. అయితే వరుసగా పడిపోతున్న ధరల నేపథ్యంలో రోజువారీ చార్టులో ‘డైలీ క్లోజింగ్ ప్రైస్ రివర్సల్ బాటమ్’ ఏర్పడుతుందా అనే అంశాన్ని ట్రేడర్లు నిశితంగా పరిశీలిస్తున్నారు. అలాంటి సంకేతం ఏర్పడి, అది నిర్ధారణ అయితే తాత్కాలికంగా ధరలు తిరిగి పుంజుకునే అవకాశం ఉంటుంది.
బంగారం మార్కెట్ ప్రస్తుతం కీలక మలుపు వద్ద ఉంది. ఒకవైపు అమ్మకాల ఒత్తిడి కొనసాగుతుండగా, మరోవైపు దీర్ఘకాలిక కొనుగోలుదారులు ప్రవేశించే ధరల కోసం మార్కెట్ ఎదురుచూస్తోంది. ఫెడ్ నిర్ణయాలు, ద్రవ్యోల్బణ గణాంకాలు, కీలక సాంకేతిక మద్దతు స్థాయులే పసిడి తదుపరి దిశను నిర్ణయించనున్నాయి.