Thota Trimurthulu: జగన్ కి తోట త్రిమూర్తుల పరీక్ష

Thota Trimurthulu: ఎమ్మెల్సీ తోట త్రిమూర్తుల పరిస్థితి ఏంటి? ఆయన విషయంలో జగన్ తీసుకునే నిర్ణయం ఏంటి? పోటీలో నిలబెడతారా? లేకుంటే తప్పిస్తారా? ఏపీ పొలిటికల్ సర్కిల్లో బలమైన చర్చ నడుస్తోంది. 28 సంవత్సరాల కిందట నాటి కేసులో..సరిగ్గా ఎన్నికలకు ముందు తీర్పు రావడం ఇబ్బందికర పరిణామమేనని రాజకీయ విశ్లేషకులు అభిప్రాయపడుతున్నారు. ఈ కేసులో శిక్ష పడడం, వెంటనే బెయిల్ రావడంతో పోటీ చేయడానికి ఇబ్బంది ఉండదని చెబుతున్నారు. కానీ ప్రజాక్షేత్రంలో ఈ కేసు ప్రభావం అధికంగా ఉంటుందని విశ్లేషకులు అభిప్రాయపడుతున్నారు.

ప్రస్తుతం నామినేషన్ల పర్వం ప్రారంభమైంది. ఈనెల 25 తో ముగియనుంది. ఈలోపే శిక్ష పై హైకోర్టులో ఆప్పీల్ కి వెళ్లాలనుకున్నారట త్రిమూర్తులు. 1955 ప్రొటెక్షన్ ఆఫ్ సివిల్ రైట్స్ చట్టం ప్రకారం అంటరానితనం, కుల వివక్ష కేసుల్లో ఆరు నెలలకు పైబడి శిక్ష పడ్డవారు ఎన్నికల్లో పోటీకి అనర్హులు. అయితే ఈ కేసులో త్రిమూర్తులకు తప్పకుండా శిక్ష పడే అవకాశం ఉంది. అందుకే ఆయన విషయంలో జగన్ తర్జనభర్జన పడుతున్నారు. ఎలాంటి నిర్ణయం తీసుకోలేకపోతున్నారు. త్రిమూర్తులు కాపు సామాజిక వర్గానికి చెందినవారు. అప్పట్లో తెలుగుదేశం పార్టీలో ఉన్నప్పుడు శిరోముండనం కేసు నమోదు అయ్యింది. నాడు మూడు నెలల పాటు రిమాండ్ ఖైదీగా కూడా ఉన్నారు. అయితే ఆయన కాపు నేత కావడంతో అప్పట్లో టిడిపి సస్పెండ్ చేయలేదు. కాంగ్రెస్ పార్టీ సైతం చూసీ చూడనట్టుగా విడిచిపెట్టింది.

అయితే ఇప్పుడు త్రిమూర్తుల విషయంలో ఎలా ముందుకెళ్లాలో తెలియక జగన్ సతమతమవుతున్నారు. ఇప్పటికే కాపు సామాజిక వర్గం వైసీపీకి దూరమైందన్న విశ్లేషణలు ఉన్నాయి. ఇప్పుడు గానీ త్రిమూర్తులను మార్చితే కాపుల్లో తప్పుడు సంకేతం వెళ్తుంది. అలాగని కొనసాగిస్తే ఎస్సీ,ఎస్టీలు వ్యతిరేకించే అవకాశం ఉంది. వైసీపీకి బలమైన మద్దతుదారులుగా ఎస్సీలు ఉన్నారు. ఆయనను అభ్యర్థిగా మార్చి, పార్టీ నుంచి తొలగించాలని దళిత సంఘాలు పెద్ద ఎత్తున నిరసన కార్యక్రమాలు చేపడుతున్నాయి. దీంతో జగన్ ఒక రకమైన ఆందోళనతో ఉన్నారు. అయితే తనను తప్పిస్తే కుమారుడు కి టికెట్ ఇవ్వాలని త్రిమూర్తులు కోరుతున్నట్లు తెలుస్తోంది. అయితే దళిత సంఘాలు మాత్రం ఆ కుటుంబంలో ఎవరికీ టిక్కెట్ ఇవ్వకూడదని డిమాండ్ చేస్తుండడం విశేషం. ఇంకా నామినేషన్లకు ఐదు రోజుల గడువు ఉండడంతో.. జగన్ ఎలాంటి నిర్ణయం తీసుకుంటారోనన్న ఉత్కంఠ కొనసాగుతోంది.