Andhra Pradesh Development : తలసరి ఆదాయంలో 13వ ర్యాంక్.. ప్రజలకు సమాన అవకాశాలు కల్పించడంలో రెండో ర్యాంక్. అందుబాటులో ఉన్న వనరులతోనే అద్భుత ఫలితాలు సాధించిన ఆంధ్రప్రదేశ్. అభివృద్ధి అంటే సంపద సృష్టించడం మాత్రమే కాదు.. ఆ సంపదతో ప్రజల జీవితాల్లో మార్పు తీసుకురావడమని నిరూపిస్తున్న ఏపీ పాలనా నమూనాకు జాతీయ స్థాయిలో గుర్తింపు లభించింది.
రాష్ట్ర విభజన తర్వాత ఆంధ్రప్రదేశ్ ఎదుర్కొంటున్న సవాళ్లు అన్నీఇన్నీ కావు. రాజధాని నుంచి మౌలిక సదుపాయాల వరకు ఎన్నో అంశాల్లో కొత్తగా నిర్మాణం చేపట్టాల్సిన పరిస్థితి. మరోవైపు ఆర్థిక పరిమితులు, పెరుగుతున్న ప్రజల అవసరాలు, సంక్షేమ పథకాల అమలు.. ఇలా అనేక బాధ్యతలు ప్రభుత్వంపై ఉన్నాయి. ఇలాంటి పరిస్థితుల్లో ఒక రాష్ట్రం అభివృద్ధి పథంలో ఎంతవరకు ముందుకు వెళ్లగలదు? ప్రజలకు ఎలాంటి అవకాశాలు కల్పించగలదు? అన్న ప్రశ్నలకు ఆంధ్రప్రదేశ్ తన ర్యాంకుతో సమాధానం చెప్పింది.
దేశంలో ప్రజలకు సమాన అవకాశాలు కల్పించడంలో ఆంధ్రప్రదేశ్ రెండో స్థానాన్ని సాధించింది. ఓపీ జిందాల్ గ్లోబల్ యూనివర్సిటీకి చెందిన సెంటర్ ఫర్ న్యూ ఎకనామిక్స్ స్టడీస్ విడుదల చేసిన ‘యాక్సెస్ ఈక్వాలిటీ ఇండెక్స్ 2026’లో ఏపీ 0.66 స్కోరుతో ఈ ఘనత సాధించింది. 0.68 స్కోరుతో గోవా మొదటి స్థానంలో ఉండగా, పెద్ద రాష్ట్రాల జాబితాలో మాత్రం ఆంధ్రప్రదేశ్ అగ్రస్థానంలో నిలవడం ప్రత్యేకత.
ఆదాయం కంటే అవకాశాల కల్పనలోనే అసలు సక్సెస్!
ఈ నివేదికలో అందరినీ ఆకర్షిస్తున్న అంశం మరొకటి ఉంది. తలసరి ఆదాయంలో ఆంధ్రప్రదేశ్ దేశంలో 13వ స్థానంలో ఉంది. కానీ ప్రజలకు విద్య, వైద్యం, భద్రత, మౌలిక సదుపాయాలు వంటి అవకాశాలు కల్పించడంలో మాత్రం రెండో స్థానానికి చేరుకుంది. రాష్ట్ర ఆర్థిక స్థాయిని పరిగణనలోకి తీసుకుంటే ఏపీకి 0.51 స్కోరు మాత్రమే రావాల్సి ఉండగా, ఏకంగా 0.66 స్కోరు సాధించింది.
అంటే రాష్ట్రానికి అందుబాటులో ఉన్న వనరులతోనే ప్రజలకు మెరుగైన సేవలు అందించడంలో గణనీయమైన పనితీరు కనబరిచిందన్నమాట. సంపద ఎంత ఉందన్నది మాత్రమే కాదు.. ఉన్న సంపదను ప్రజల కోసం ఎంత సమర్థవంతంగా వినియోగిస్తున్నామన్నదే అభివృద్ధికి అసలైన కొలమానమని ఈ ఫలితాలు సూచిస్తున్నాయి.
ఐదు రంగాలు.. 60 సూచికలు!
ఈ ర్యాంకుల కోసం విద్య, వైద్యం, మౌలిక సదుపాయాలు, సామాజిక-ఆర్థిక భద్రత, న్యాయ సేవలు అనే ఐదు కీలక రంగాలను పరిగణనలోకి తీసుకున్నారు. వీటికి సంబంధించిన 60 సూచికల ఆధారంగా రాష్ట్రాల పనితీరును అంచనా వేశారు.
ముఖ్యంగా సామాజిక, ఆర్థిక భద్రత కల్పించడంలో ఆంధ్రప్రదేశ్ 0.69 స్కోరుతో దేశంలోనే మొదటి స్థానాన్ని దక్కించుకుంది. రెండో స్థానంలో ఉన్న గోవా కంటే 0.19 పాయింట్లు అధికంగా సాధించడం ఏపీ పనితీరును చాటుతోంది. ప్రజలకు సంక్షేమ భరోసా కల్పించడం, సామాజిక భద్రతను బలోపేతం చేయడం వంటి అంశాల్లో రాష్ట్రం మెరుగైన ఫలితాలు సాధించినట్లు నివేదిక వెల్లడించింది.
చంద్రబాబు పాలనకు జాతీయ గుర్తింపు?
ముఖ్యమంత్రి చంద్రబాబు నాయుడు నేతృత్వంలోని కూటమి ప్రభుత్వం అభివృద్ధి, సంక్షేమాన్ని సమన్వయం చేస్తూ ముందుకు సాగుతోంది. ఒకవైపు పెట్టుబడులను ఆకర్షించడం, పరిశ్రమలను తీసుకురావడం, ఉద్యోగ అవకాశాలను పెంచడం ద్వారా సంపద సృష్టించాలనే లక్ష్యం పెట్టుకుంది. మరోవైపు ప్రజలకు మెరుగైన విద్య, వైద్యం, మౌలిక సదుపాయాలు, సామాజిక భద్రత అందించడంపై దృష్టి సారిస్తోంది.
ఈ రెండు లక్ష్యాల మధ్య సమతుల్యత సాధించడమే ప్రభుత్వానికి అసలైన సవాలు. తాజాగా వెలువడిన యాక్సెస్ ఈక్వాలిటీ ఇండెక్స్ ఫలితాలు ఈ దిశగా రాష్ట్రం సాధించిన పురోగతికి గుర్తింపుగా నిలుస్తున్నాయి. ఈ ర్యాంకుపై సీఎం చంద్రబాబు హర్షం వ్యక్తం చేశారు.
అసలు పరీక్ష ఇప్పుడే మొదలు!
జాతీయ స్థాయిలో రెండో ర్యాంకు సాధించడం ఆంధ్రప్రదేశ్‌కు గర్వకారణమే. అయితే ఈ గుర్తింపును నిలబెట్టుకోవడం, మరింత మెరుగైన స్థానానికి చేరుకోవడం ప్రభుత్వానికి తదుపరి సవాలు. ముఖ్యంగా విద్య, వైద్యం, ఉపాధి, గ్రామీణ మౌలిక సదుపాయాల రంగాల్లో ఈ పురోగతి క్షేత్రస్థాయిలోనూ కనిపించాలి. ప్రజల జీవన ప్రమాణాల్లో శాశ్వతమైన మార్పు రావాలి.
రాష్ట్ర విభజనతో ఎదురైన ఆర్థిక, మౌలిక సదుపాయాల సవాళ్ల మధ్య ఏపీ సాధించిన ఈ ర్యాంకు ఒక సానుకూల సంకేతం. ఆదాయంలో వెనుకబడినా అవకాశాల కల్పనలో ముందుండవచ్చని ఆంధ్రప్రదేశ్ ఫలితాలు చెబుతున్నాయి. చివరికి ఒక రాష్ట్ర అభివృద్ధిని కొలవాల్సింది దాని ఖజానాలోని సంపదతో మాత్రమే కాదు.. ఆ రాష్ట్ర ప్రజలకు అందుతున్న అవకాశాలతో కూడా!
