Mega DSC 2025 : ఆంధ్రప్రదేశ్లో ఉపాధ్యాయ నియామకాల కోసం నిర్వహించిన మెగా డీఎస్సీ-2025 ప్రక్రియపై ఇటీవల సోషల్ మీడియాలో, రాజకీయ వర్గాల్లో వస్తున్న ఆరోపణలకు రాష్ట్ర ప్రభుత్వం పూర్తి స్థాయిలో సమాధానం ఇచ్చింది. పరీక్ష నిర్వహణ నుంచి తుది ఎంపిక వరకు ప్రతి దశను అత్యంత పారదర్శకంగా, సాంకేతిక భద్రతా ప్రమాణాలతో నిర్వహించామని స్పష్టం చేసింది. కేవలం ఆరోపణలను ఖండించడమే కాకుండా, మొత్తం నియామక ప్రక్రియ ఎలా సాగిందో వివరంగా వెల్లడించడం ద్వారా అపోహలకు చెక్ పెట్టే ప్రయత్నం చేసింది.
ప్రభుత్వం విడుదల చేసిన వివరాల ప్రకారం, డీఎస్సీ పరీక్షల నిర్వహణకు TCS ION డిజిటల్ ప్లాట్ఫామ్ సేవలను వినియోగించారు. ప్రశ్నాపత్రాల భద్రత కోసం 256-బిట్ ఎన్క్రిప్షన్, ర్యాండమైజేషన్ టెక్నాలజీ, పరిమిత యాక్సెస్ వంటి అత్యాధునిక భద్రతా వ్యవస్థలను అమలు చేసినట్లు తెలిపింది. దాదాపు 42 వేల ప్రశ్నల బ్యాంక్ నుంచి కంప్యూటర్ ఆధారిత విధానంలో ప్రశ్నలు రూపొందించబడటంతో పేపర్ లీక్కు ఎలాంటి అవకాశం లేదని ప్రభుత్వం పేర్కొంది.
అభ్యర్థుల సందేహాలు, ఫిర్యాదుల పరిష్కారం కోసం ప్రత్యేకంగా మూడు స్థాయిల గ్రీవెన్స్ రెడ్రెస్సల్ వ్యవస్థ ఏర్పాటు చేసినట్లు వెల్లడించింది. వేల సంఖ్యలో వచ్చిన అభ్యంతరాలను పరిశీలించి, నిబంధనల ప్రకారం పరిష్కరించామని తెలిపింది. అలాగే ఆన్సర్ కీలు, మెరిట్ లిస్టులు, ఎంపిక ప్రక్రియకు సంబంధించిన అన్ని వివరాలను అధికారిక వెబ్సైట్లో అందుబాటులో ఉంచడం ద్వారా పారదర్శకతను పాటించామని పేర్కొంది.
ఈ నియామక ప్రక్రియలో మరో విశేషం ఏమిటంటే… 16,347 ఉపాధ్యాయ పోస్టులను కేవలం 148 రోజుల్లో భర్తీ చేయడం. రాష్ట్ర చరిత్రలోనే అత్యంత వేగంగా ఉపాధ్యాయ నియామకాలను పూర్తి చేసిన ప్రక్రియగా దీనిని ప్రభుత్వం అభివర్ణిస్తోంది. నోటిఫికేషన్ నుంచి నియామకాల వరకు ప్రతి దశకు సంబంధించిన రికార్డులు అందుబాటులో ఉన్నాయని, అవసరమైతే ఎవరైనా పరిశీలించవచ్చని కూడా స్పష్టం చేసింది.
మెగా డీఎస్సీపై జరుగుతున్న తప్పుడు ప్రచారం వల్ల నిజాయితీగా పరీక్షలు రాసి ఉద్యోగాలు సాధించిన వేలాది మంది అభ్యర్థుల ప్రతిభను అవమానించినట్లవుతుందని ప్రభుత్వం అభిప్రాయపడింది. కష్టపడి ఎంపికైన అభ్యర్థుల విజయాన్ని అనుమానాల ముసుగులో కించపరచడం బాధ్యతారాహిత్యమని విమర్శించింది.
అదే సమయంలో గత ప్రభుత్వంపై కూడా ప్రభుత్వం విమర్శలు గుప్పించింది. మెగా డీఎస్సీ పేరుతో హామీలు ఇచ్చినా వాటిని అమలు చేయలేదని, ప్రస్తుత ప్రభుత్వం మాత్రం హామీని కార్యరూపంలోకి తీసుకువచ్చి రికార్డు స్థాయిలో నియామకాలు పూర్తి చేసిందని పేర్కొంది.
మొత్తానికి, మెగా డీఎస్సీ-2025పై వస్తున్న విమర్శలకు ప్రభుత్వం సాంకేతిక ఆధారాలు, పరిపాలనా వివరాలు, అధికారిక రికార్డులను చూపిస్తూ సమాధానం ఇవ్వడం విశేషం. ఇప్పుడు ఈ వివరణలతో వివాదం ముగుస్తుందా? లేక ప్రతిపక్షాల నుంచి మరిన్ని ప్రశ్నలు వస్తాయా? అన్నది రాజకీయంగా ఆసక్తికరంగా మారింది. అయితే ఒక విషయం మాత్రం స్పష్టంగా కనిపిస్తోంది… ఈసారి ప్రభుత్వం కేవలం ఖండనతో ఆగకుండా, మొత్తం ప్రక్రియను ప్రజల ముందుంచి పారదర్శకతను నిరూపించే ప్రయత్నం చేసింది.
