Renault Duster Hybrid : మిడ్సైజ్ ఎస్యూవీ విభాగంలో మరో కీలక పోటీకి తెరలేవనుంది. ఫ్రెంచ్ ఆటోమొబైల్ దిగ్గజం రెనాల్ట్ తన కొత్త డస్టర్ హైబ్రిడ్ను భారత మార్కెట్లోకి తీసుకురానుంది. కంపెనీ సమాచారం ప్రకారం అక్టోబర్ 17న డస్టర్ హైబ్రిడ్ అధికారికంగా లాంచ్ కానుంది. ఇప్పటికే పెట్రోల్ ఇంజిన్లతో అందుబాటులో ఉన్న డస్టర్కు ఈ హైబ్రిడ్ పవర్ట్రెయిన్ అదనపు ఆకర్షణగా మారనుంది. ముఖ్యంగా మారుతి గ్రాండ్ విటారా, టయోటా అర్బన్ క్రూయిజర్ హైరైడర్, మారుతి విక్టోరిస్ వంటి స్ట్రాంగ్-హైబ్రిడ్ ఎస్యూవీలకు ఇది నేరుగా పోటీ ఇవ్వనుంది.
E-Tech హైబ్రిడ్ టెక్నాలజీ
డస్టర్ హైబ్రిడ్లో రెనాల్ట్ తన E-Tech హైబ్రిడ్ సిస్టమ్ను ఉపయోగిస్తోంది. ఫార్ములా-1లో కంపెనీకి ఉన్న సాంకేతిక అనుభవం నుంచి ఈ టెక్నాలజీ అభివృద్ధి చెందిందని రెనాల్ట్ చెబుతోంది. ఈ వ్యవస్థలో 1,789cc, నాలుగు సిలిండర్ల నేచురల్లీ ఆస్పిరేటెడ్ పెట్రోల్ ఇంజిన్తో పాటు రెండు ఎలక్ట్రిక్ మోటార్లు ఉంటాయి.ఇందులో ఒక ఎలక్ట్రిక్ మోటార్ సుమారు 20hp సామర్థ్యంతో జనరేటర్గా పనిచేస్తుంది. మరో 49hp ఎలక్ట్రిక్ మోటార్ నేరుగా చక్రాలకు శక్తిని అందిస్తుంది. మొత్తం పవర్ అవుట్పుట్ 160hp, టార్క్ 172Nmగా ఉంటుంది. వీటికి 1.4kWh బ్యాటరీ ప్యాక్ను జత చేశారు.
టయోటా హైబ్రిడ్కు భిన్నంగా..
గ్రాండ్ విటారా, హైరైడర్, విక్టోరిస్లో ఉపయోగిస్తున్న టయోటా హైబ్రిడ్ సిస్టమ్తో పోలిస్తే డస్టర్ E-Tech వ్యవస్థ కొంత భిన్నంగా ఉంటుంది. టయోటా మోడళ్లలో e-CVT, పవర్-స్ప్లిట్ వ్యవస్థ ఉండగా.. డస్టర్లో మల్టీ-మోడ్ ఆటోమేటిక్ గేర్బాక్స్ ఉంటుంది. దీంతో డ్రైవింగ్ సమయంలో సంప్రదాయ ఆటోమేటిక్ కార్ల మాదిరిగా గేర్ మార్పులు, ఇంజిన్ RPMలో మార్పులు కనిపించే అవకాశం ఉంది.
డస్టర్లోని 1.4kWh బ్యాటరీ టయోటా హైబ్రిడ్ సిస్టమ్లోని 0.76kWh బ్యాటరీ కంటే దాదాపు రెండింతలు పెద్దది. తక్కువ వేగాల్లో ఎలక్ట్రిక్ మోడ్లో ప్రయాణించడం, బ్రేకింగ్ సమయంలో ఎనర్జీని తిరిగి పొందడం, అవసరం లేనప్పుడు పెట్రోల్ ఇంజిన్ను ఆపేయడం ద్వారా ఇంధన సామర్థ్యాన్ని పెంచేలా ఈ వ్యవస్థ పనిచేస్తుంది.
80 శాతం సిటీ డ్రైవింగ్ EV మోడ్లో!
రెనాల్ట్ ప్రకారం డస్టర్ హైబ్రిడ్ సిటీ డ్రైవింగ్లో దాదాపు 80 శాతం వరకు EV మోడ్లో ప్రయాణించగలదు. అయితే వాస్తవ మైలేజీ ట్రాఫిక్ పరిస్థితులు, డ్రైవింగ్ వేగం, వాతావరణం, డ్రైవింగ్ శైలి వంటి అంశాలపై ఆధారపడి ఉంటుంది.
డీజిల్ ఇంజిన్ ఆప్షన్ లేకపోవడాన్ని బలమైన హైబ్రిడ్ టెక్నాలజీతో భర్తీ చేయాలని రెనాల్ట్ భావిస్తోంది. మొత్తంగా చూస్తే, ఆకర్షణీయమైన SUV డిజైన్తో పాటు హైబ్రిడ్ టెక్నాలజీ కోరుకునే భారతీయ వినియోగదారులకు డస్టర్ కొత్త ఆప్షన్గా మారనుంది. అక్టోబర్ 17న ధరలు వెల్లడైన తర్వాత గ్రాండ్ విటారా, హైరైడర్, విక్టోరిస్తో డస్టర్ హైబ్రిడ్ పోటీ ఎంతవరకు ఉంటుందో స్పష్టమవుతుంది.
