India Kashmir : కాశ్మీర్ విషయంలో అమెరికా చేసిన తాజా వ్యాఖ్యలు దక్షిణాసియా దౌత్య వేదికపై సంచలనానికి తెరలేపాయి. శ్రీనగర్ గడ్డపై నుంచి అమెరికా రాయబారి సెర్జియా గోర్ చేసిన వ్యాఖ్యలు సాధారణ ప్రకటనగా కొట్టిపారేయలేనివి. ముఖ్యంగా కశ్మీర్ భారత్లో అంతర్భాగమన్న భావనకు అనుగుణంగా ఆయన చేసిన వ్యాఖ్యలు పాకిస్తాన్కు తీవ్ర అసౌకర్యాన్ని కలిగించే పరిణామంగా కనిపిస్తున్నాయి.
అమెరికా రాయబారి కశ్మీర్కు వెళ్లి అక్కడే ఈ వ్యాఖ్యలు చేయడం వెనుక దౌత్యపరమైన సందేశం ఉందా? అన్న చర్చ ఇప్పుడు మొదలైంది. ఇది కేవలం ఒక రాయబారి అభిప్రాయమా? లేక అమెరికా దక్షిణాసియా విధానంలో వస్తున్న మార్పుకు సంకేతమా? అనే ప్రశ్నలు తలెత్తుతున్నాయి.
ముఖ్యంగా పాకిస్తాన్ ఇటీవలి కాలంలో అనుసరిస్తున్న విదేశాంగ విధానం అమెరికాకు పూర్తిగా అనుకూలంగా లేదన్న వాదనలు వినిపిస్తున్నాయి. సౌదీ అరేబియా, టర్కీ, పాకిస్తాన్ మధ్య కుదిరిన రక్షణ సహకారం కూడా ఈ నేపథ్యంలో ప్రాధాన్యం సంతరించుకుంది. గల్ఫ్ ప్రాంతంలో దశాబ్దాలుగా అమెరికా కీలక భద్రతా భాగస్వామిగా ఉన్న నేపథ్యంలో, ప్రత్యామ్నాయ భద్రతా వ్యవస్థల వైపు పాకిస్తాన్ అడుగులు వేయడం వాషింగ్టన్కు ఎంతవరకు ఆమోదయోగ్యమన్నది ఆసక్తికరంగా మారింది.
ఇక ఇరాన్ విషయంలో పాకిస్తాన్ అనుసరిస్తున్న ద్వంద్వ వైఖరిపై అమెరికాకు అసంతృప్తి ఉందన్న విశ్లేషణలు కూడా ఉన్నాయి. మరోవైపు చైనాతో పాకిస్తాన్ పెంచుకుంటున్న వ్యూహాత్మక సంబంధాలు కూడా అమెరికా దృష్టిలో కీలక అంశమే. పాకిస్తాన్ ఆర్థిక సంక్షోభ సమయంలో అంతర్జాతీయ ఆర్థిక సంస్థల ద్వారా సహాయం అందించడంలో అమెరికా ప్రభావం ఉన్నప్పటికీ.. ఇస్లామాబాద్ క్రమంగా బీజింగ్కు దగ్గరవుతున్న తీరు వాషింగ్టన్కు ఆందోళన కలిగించే అంశంగా మారింది.
ఇలాంటి పరిణామాల మధ్య కశ్మీర్పై అమెరికా వైఖరిలో కనిపిస్తున్న స్పష్టతను పాకిస్తాన్ తేలికగా తీసుకునే పరిస్థితి లేదు. గతంలో కశ్మీర్ అంశంపై అమెరికా తరచూ భారత్, పాకిస్తాన్ మధ్య చర్చల ద్వారా పరిష్కారం కావాలని చెబుతూ వచ్చింది. ఇప్పుడు శ్రీనగర్ నుంచే భారత అనుకూలంగా అర్థమయ్యే వ్యాఖ్యలు వినిపించడం దౌత్యపరంగా గణనీయమైన మార్పుగా భావించవచ్చు.
అయితే ఒక్క రాయబారి వ్యాఖ్యల ఆధారంగా అమెరికా మొత్తం విదేశాంగ విధానం మారిపోయిందని నిర్ధారించడం తొందరపాటు అవుతుంది. కశ్మీర్ అంశంపై అమెరికా అధికారిక విధానం, అధ్యక్షుడు ట్రంప్ పరిపాలన నుంచి వచ్చే ప్రకటనలు, పాకిస్తాన్పై వాషింగ్టన్ తీసుకునే తదుపరి చర్యలే అసలు దిశను స్పష్టం చేస్తాయి.
అయినప్పటికీ శ్రీనగర్ వేదికగా వచ్చిన ఈ వ్యాఖ్యలు ఒక విషయం మాత్రం స్పష్టం చేస్తున్నాయి. దక్షిణాసియాలో మారుతున్న భౌగోళిక రాజకీయ సమీకరణాల్లో పాకిస్తాన్ తన స్థానాన్ని మరోసారి సమీక్షించుకోవాల్సిన పరిస్థితి ఏర్పడుతోంది. అమెరికా, చైనా, టర్కీ, సౌదీ అరేబియా, ఇరాన్ల మధ్య సమతూకం సాధించే క్రమంలో ఇస్లామాబాద్ వేసే ప్రతి అడుగు ఇక మరింత జాగ్రత్తగా ఉండాల్సిందే.
కశ్మీర్ విషయంలో అమెరికా నుంచి వచ్చిన ఈ సంకేతం అందుకే ఒక సాధారణ దౌత్య ప్రకటన కాదు. ఇది దక్షిణాసియా శక్తి సమీకరణాల్లో వస్తున్న మార్పులకు అద్దం పట్టే పరిణామం. ముఖ్యంగా పాకిస్తాన్కు మాత్రం.. వాషింగ్టన్ తన పాత మిత్రుడి విషయంలో గతంలో ఉన్నంత ఓపికతో లేదన్న హెచ్చరికగా దీనిని చూడాల్సిన అవసరం ఉంది.
కాశ్మీర్ పై అమెరికా వ్యాఖ్యలు దౌత్యపరంగా ఓ పెద్ద కుదుపు.. దీనిపై ‘రామ్ ’ గారి సునిశిత విశ్లేషణను కింది వీడియోలో చూడొచ్చు..
