Side effects of staying in AC: ప్రస్తుతం ఎండలు మండిపోతున్నాయి. ఇంట్లో నుంచి బయటకు రావాలంటే భయం వేస్తుంది. అయితే వేసవిలో చల్లదనం కోసం ఒకప్పుడు ఫ్యాన్లు, కూలర్లను ఉపయోగించారు. కానీ కొన్ని ప్రాంతాల్లో అధిక వేడి ఉండడంతో ఏయిర్ కండీషన్ వాడకం తప్పడం లేదు. దీంతో ప్రతీ ఇంట్లో ఏసీ తప్పనిసరిగా మారింది. అయితే చల్లదనం కోసం ఏసీని అధికంగా వాడటం వల్ల ఆరోగ్యపరమైన సమస్యలతో పాటు ఆర్థిక ఇబ్బందులు కూడా తలెత్తే ప్రమాదం ఉందని కొందరు నిపుణులు తెలుపుతున్నారు. ఇలాంటి సమయంలో కొన్ని జాగ్రత్తలు తీసుకోవాల్సిన అవసరం ఉంది. ఆ వివరాల్లోకి వెళితే..
Air Contidioner (AC)లో ఎక్కువసేపు ఉండటం వల్ల శరీరం సహజ వాతావరణానికి దూరమవుతుంది. ముఖ్యంగా గది పూర్తిగా మూసివేసి AC వాడితే తాజా గాలి లోపిస్తుంది. దీని ప్రభావంగా శ్వాసకోశ సమస్యలు, గొంతు ఇబ్బందులు, దగ్గు వంటి సమస్యలు రావచ్చు. అలాగే చల్లని గాలిలో ఎక్కువసేపు ఉండడం వల్ల శరీర ఉష్ణోగ్రతలో మార్పులు వచ్చి తలనొప్పి, అలసట వంటి సమస్యలు తలెత్తుతాయి. ఏసీ గాలి తేమను తగ్గించే స్వభావం కలిగి ఉంటుంది. దీని వల్ల చర్మం పొడిబారడం, కళ్లలో ఎండదనం, పెదవులు చిట్లడం వంటి సమస్యలు కనిపిస్తాయి. ఫిల్టర్లు శుభ్రంగా లేకపోతే దుమ్ము, బాక్టీరియా గాల్లోకి వచ్చి అలర్జీలు, శ్వాస సంబంధిత ఇబ్బందులు కలిగించే అవకాశముంది. దీర్ఘకాలం ఈ పరిస్థితి కొనసాగితే ఆరోగ్యంపై మరింత ప్రతికూల ప్రభావం చూపుతుంది.
ఏసీల వల్ల ఆర్థికపరమైన ఇబ్బందులు కూడా ఉన్నాయి. రోజుకు ఎక్కువ గంటలు ఏసీ వాడటం వల్ల విద్యుత్ వినియోగం పెరిగి భారీ బిల్లులు వస్తాయి. ముఖ్యంగా పాత మోడల్ ఎయిర్ కండీషనర్ లు ఎక్కువ విద్యుత్ తీసుకుంటాయి. ఫిల్టర్లు శుభ్రం చేయించకపోయినా లేదా సర్వీసింగ్ చేయించకపోతే యంత్రం పనితీరు తగ్గి మరింత కరెంట్ వినియోగిస్తుంది.
ఇలాంటి సమయంలో కొన్ని జాగ్రత్తలు పాటిస్తే ఈ సమస్యలను తగ్గించుకోవచ్చు. ఏసీని 24 నుంచి 26 డిగ్రీల మధ్య ఉంచడం ఆరోగ్యానికి మంచిది. గదిలో అప్పుడప్పుడు గాలి రాకపోకలు ఉండేలా కిటికీలు తెరవడం అవసరం. ఫిల్టర్లను నిరంతరం శుభ్రం చేయడం ద్వారా గాలి నాణ్యత మెరుగుపడుతుంది. అలాగే ఫ్యాన్తో పాటు ఏసీని వాడితే చల్లదనం సమానంగా వ్యాపించి విద్యుత్ వినియోగం తగ్గుతుంది.
వేసవిలో ఏసీ వాడకం అవసరం అయినా, అతి వినియోగం అనారోగ్యం మరియు ఆర్థిక భారం రెండింటికీ కారణమవుతుంది. సరైన విధంగా వినియోగించడం ద్వారా చల్లదనాన్ని ఆస్వాదించడంతో పాటు ఆరోగ్యాన్ని, డబ్బును కూడా కాపాడుకోవచ్చు.
