కోట శ్రీనివాస రావు. విలక్షణ నటుడు. ఏ పాత్ర చేసినా అందులో జీవిస్తారు. ఆ పాత్రకు ప్రాణం పోయడమే కాదు దానికి హుందా తనం తీసుకొస్తారు. కామెడీ క్యారెక్టర్ తో కడుపుబ్బా నవ్వించగలరు.. ఎమోషన్ సీన్స్తో ఏడిపించగలరు..ప్రతి నాయకుడిగా క్రూరత్వం ప్రదర్శించగలరు. తండ్రిగా, తాతగా, స్నేహితుడిగా… ఇలా ఆయన పోషించని పాత్ర లేదు. ఇక రాజకీయ పాత్రలు చేయడంలో ఆయణ్ని మించిన వారు లేరు. ఇప్పుడు కోట మరోసారి రాజకీయ నాయకుడి అవతారం ఎత్తబోతున్నారు. సీఎం పాత్రలో మెప్పించబోతున్నారు.
చరణ్ రోరి దర్శక నిర్మాతగా తెరకెక్కిస్తున్న ‘రోరి’ చిత్రంలో ఆయన తెలంగాణ ముఖ్యమంత్రిగా కనిపించనున్నారు. ఇందులో కోట శ్రీనివాసరావు ఫస్ట్లుక్ను ఆయన పుట్టినరోజు సందర్భంగా విడుదల చేశారు. ఈ చిత్రానికి భీమ్స్ సంగీత దర్శకుడు.ఈ మూవీలో ఆర్.రామన్న చౌదరి అనే సెన్సిటివ్ సీఎంగా కోట ఓ డిఫెరెంట్ పాత్రలో కనిపిస్తారు. అసలే ముఖ్యమంత్రి క్యారెక్టర్ కాబట్టి దీన్ని చాలా జాగ్రత్తగా తీర్చిదిద్దారు చరణ్ రోరి. ఈ చిత్రాన్ని సీటీఎస్ స్టూడియోస్, ఎస్టీవీ ఎంటైర్టైన్మెంట్స్ నిర్మిస్తున్నాయి.