OTT: కరోనా ప్రభావంతో థియేటర్లు మూతపడిపోవడం వల్ల సినీ ప్రియులంతా ఓటీటీ వైపు మొగ్గు చూపుతున్నారు. గత సంవత్సర కాలంలో ఓటీటీల హవా జోరుగా నడుస్తోందనడంలో ఎటువంటి ఆశ్చర్యం లేదు. ఈ క్రమంలోనే సినిమాలతో పాటు వెబ్సిరీస్లకూ మంచి ప్రాధాన్యత సంతరించుకుంది. దీంతో, దర్శక నిర్మాతలు సినిమాలు, వెబ్సిరీస్లకు సీక్వెల్స్ ప్లాన్ చేసి విడుదలకు సిద్ధం చేస్తున్నారు. ఈ క్రమంలోనేే త్వరలో పలు ఓటీటీ ప్లాట్ఫామ్స్ వేదికగా త్వరలో ప్రేక్షకుల ముందుకు రానున్న వెబ్సిరీస్లపై ఓ లుక్కేద్దాం.
ఇటీవల కాలంలో ఓటీటీలో అత్యధిక జనాధరణ పొందిన వెబ్సిరీస్ల్లో అసుర్- వెల్కమ్ టు యువర్ డార్క్ సైడ్ ఒకటి. క్రైమ్ థ్రిల్లర్ నేపథ్యంలో వచ్చిన ఈ సిరీస్ ప్రేక్షకులను ఎంతగానో ఆకట్టుకుంది ప్రస్తుతం ఈ సిరీస్ రెండో సీజన్ను త్వరలో విడుదలకు సిద్ధం చేస్తున్నట్లు వూట్ సంస్థ ప్రకటించింది.
మరోవైపు, సోనీలైవ్లో విడుదలైన స్కామ్ 1992 ఎంత పెద్ద సక్సెస్ సాధించిందో ప్రత్యేకంగా చెప్పనక్కర్లేదు. ఈ జోరుతోనే మరో వెబ్సిరీస్ను తెరకెక్కిస్తున్నట్లు అప్లాజ్ ఎంటర్టైన్మెంట్ సంస్థ ప్రకటించింది. నకిలీ స్టాంప్ పేపర్లతో కోట్లు గడించిన అబ్దుల్ కరీమ్ తెల్గీ కేసుపై ఈ సిరీస్ వస్తోన్నట్లు పేర్కొంది.
స్పై, యాక్షన్ థ్రిల్లర్ నేపథ్యంలో 2020లో వచ్చి హిట్ కొట్టిన వెబ్సిరీస్ల్లో స్పెషల్ ఆప్స్ ఒకటి. ‘రా’ ఏజెంట్గా హిమ్మత్ సింగ్ ( కే.కే. మీనన్ ) తన టీమ్తో ఎలాంటి ఆపరేషన్స్ చేశాడనేదే కథ. అయితే, ఇందుకు సీక్వెల్గా హిమ్మత్ సింగ్ ‘రా’ ఏజెంట్గా జాయిన్ అయిన తొలినాళ్లలో ఎదుర్కొన్న సవాళ్లు, హనీ ట్రాప్ కథాంశంగా స్పెషల్ ఆప్స్ 1.5 రాబోతోంది. నవంబరు 12న హాట్స్టార్లో విడుదల కానుంది.
క్రికెట్ స్టోరీ బ్యాక్డ్రాప్లో వచ్చిన ఇన్సైడ్ ఎడ్స్ వెబ్సిరీస్ ప్రేక్షకుల మనసును కట్టిపడేశాయి. ఇప్పటికే ఈ సిరీస్ నుంచి రెండు సీజన్లు విడుదలయ్యాయి. కాగా, ఇప్పుడు మరో సీక్వెల్ను తెరపైకి తీసురానున్నట్లు అమెజాన్ ప్రైమ్ ట్విట్టర్ వేదికగా తెలిపింది. విడుదల తేదీ ప్రకటించాల్సి ఉంది.
బాలీవుడ్ నటి సుష్మితా సేన్ ప్రధాన పాత్రలో నటించి హిట్ కొట్టి సిరీస్ ఆర్య. క్రైమ్ థ్రిల్లర్ నేపథ్యంలో తెరకెక్కిన ఈ సిరీస్ను రామ్ మాధవానీ, సందీప్ మోడీ, వినోద్ రావత్ దర్శకత్వం వహించారు. తాజాగా, ఈ సిరీస్కు సీక్వెల్ రానున్నట్లు డిస్నీ+హాట్స్టార్ తెలిపింది. వీటితో పాటు, షీ- సీజన్ 2(నెట్ఫ్లిక్స్), మసబా.. మసబా.. సీజన్ 2(నెట్ఫ్లిక్స్), మేడ్ ఇన్ హెవెన్ 2(అమెజాన్ ప్రైమ్ వీడియో), ఢిల్లీ క్రైమ్ 2(నెట్ఫ్లిక్స్), జమ్తారా సీజన్ 2(నెట్ఫ్లిక్స్) సిరీస్లు కూడా సీక్వెల్స్ను విడుదల చేసేందుకు సిద్ధమయ్యాయి.
