Vehicle Headlight Black Sticker: రాత్రి సమయంలో వాహనాలు నడపడం ఇప్పుడు చాలామందికి భయంగా మారుతోంది. ముఖ్యంగా ఎదురుగా వచ్చే వాహనాల హై పవర్ LED హెడ్లైట్ల కాంతి కళ్లపై నేరుగా పడడంతో కొన్ని క్షణాల పాటు రోడ్డు కనిపించకుండా పోతోంది. దీంతో రాత్రి ప్రయాణం చాలా ప్రమాదకరంగా మారిందని డ్రైవర్లు చెబుతున్నారు. గతంలో ఈ సమస్యను కొంతవరకు తగ్గించేందుకు వాహనాల హెడ్లైట్లపై బ్లాక్ స్టిక్కర్లు లేదా బ్లాక్ టేప్లను ఉపయోగించేవారు. ఇప్పుడు అవి కనిపించకపోవడంతో ప్రమాదాలు పెరుగుతున్నాయని నిపుణులు హెచ్చరిస్తున్నారు. అసలు బ్లాక్ స్టిక్కర్ వల్ల ఎలాంటి ప్రయోజనాలు ఉంటాయి? అవి లేకపోతే ఏమవుతుంది?
గతంలో వాహనాల హెడ్లైట్లపై చిన్న బ్లాక్ స్టిక్కర్ లేదా నల్ల టేప్ ప్రధాన ఉద్దేశం ఎదురుగా వచ్చే వాహన డ్రైవర్ కళ్లపై కాంతి నేరుగా పడకుండా నియంత్రించడం. హెడ్లైట్ మధ్య భాగంలో లేదా పై భాగంలో ఈ స్టిక్కర్ ఉండటం వల్ల కాంతి కొంతవరకు విరిగి కిందికి పడేది. దీంతో ఎదురు డ్రైవర్కు తక్కువ గ్లేర్ కనిపించి రోడ్డు స్పష్టంగా కనిపించేది. ఈ బ్లాక్ స్టిక్కర్ల వల్ల రాత్రి సమయంలో కళ్లకు ఒత్తిడి తగ్గేది. ఎక్కువ కాంతి కళ్లపై పడితే కంటి మణి ఒక్కసారిగా కుదించుకొని కొన్ని క్షణాల పాటు చూపు మందగిస్తుంది. దీనిని ‘టెంపరరీ బ్లైండ్నెస్’ అని కూడా అంటారు. బ్లాక్ స్టిక్కర్ వల్ల కాంతి తీవ్రత కొంత తగ్గి ఈ సమస్య తగ్గేది.
అయితే ప్రస్తుతం మార్కెట్లో ఎక్కువగా LED, వైట్ లైట్ హెడ్లైట్లు వాడుతున్నారు. ఇవి సాధారణ హాలోజన్ లైట్ల కంటే చాలా ఎక్కువ ప్రకాశం ఇస్తాయి. కొందరు నియమాలకు విరుద్ధంగా అధిక పవర్ లైట్లు అమర్చుకోవడం, హై బీమ్ను నిరంతరం ఉపయోగించడం వల్ల సమస్య మరింత తీవ్రమవుతోంది. ముఖ్యంగా హైవేలపై ఎదురుగా వచ్చే భారీ వాహనాల LED ఫోకస్ కారణంగా చిన్న వాహన డ్రైవర్లు తీవ్ర ఇబ్బందులు పడుతున్నారు.
ఇప్పట్లో బ్లాక్ స్టిక్కర్లు కనిపించకపోవడానికి కూడా కొన్ని కారణాలు ఉన్నాయి. ఆధునిక కార్లలో ప్రొజెక్టర్ ల్యాంపులు, ఆటో ఫోకస్ సిస్టమ్లు రావడంతో కంపెనీలు ప్రత్యేకంగా స్టిక్కర్లు వాడటం తగ్గించాయి. మరోవైపు చాలామంది వాహన యజమానులు ‘ఎక్కువ కాంతి అంటే ఎక్కువ భద్రత’ అనే భావనతో అత్యధిక ప్రకాశం ఉన్న లైట్లను వాడుతున్నారు. దీంతో ఇతరులకు కలిగే ప్రమాదాన్ని పట్టించుకోవడం తగ్గిపోయింది.
నిపుణుల సూచనల ప్రకారం రాత్రి డ్రైవింగ్ సమయంలో అవసరం లేకపోతే హై బీమ్ వాడకూడదు. ఎదురుగా వాహనం వస్తే వెంటనే లో బీమ్కు మార్చాలి. వాహనాల్లో కంపెనీ నిర్దేశించిన లైట్లనే ఉపయోగించాలి. అలాగే ప్రభుత్వం కూడా అధిక పవర్ LED లైట్లపై కఠిన నియంత్రణలు తీసుకురావాలని, ట్రాఫిక్ పోలీసులు తరచూ తనిఖీలు నిర్వహించాలని ప్రజలు కోరుతున్నారు.
