car safety tips : ఈ రోజుల్లో ప్రతి ఒక్కరి ఇంట్లోనూ కారు ఒక ముఖ్యమైన భాగంగా మారిపోయింది. రోజువారీ ప్రయాణాలు, వీకెండ్ ట్రిప్పులు సుఖమయంగా గడిచిపోవాలంటే కారు కండిషన్ బాగుండటం చాలా అవసరం. అయితే, చాలామంది డ్రైవింగ్ చేసేటప్పుడు డ్యాష్బోర్డ్పై కనిపించే వార్నింగ్ లైట్స్ని నిర్లక్ష్యం చేస్తుంటారు. మీ కారులో ఏదైనా సాంకేతిక లోపం తలెత్తితే, ఇంజిన్ మిమ్మల్ని హెచ్చరించేందుకు డ్యాష్బోర్డ్ సింబల్స్ను ఉపయోగిస్తుంది. వీటిని సకాలంలో గుర్తించి స్పందించకపోతే కారు తీవ్రంగా పాడవ్వడమే కాకుండా, భారీగా రిపేర్ ఖర్చులు భరించాల్సి వస్తుంది.
డ్యాష్బోర్డ్పై చిన్న ఇంజిన్ ఆకారంలో ఉండే చెక్ ఇంజిన్ లైట్ వెలిగిందంటే, మీ కారు ఎలక్ట్రానిక్ లేదా మెకానికల్ సెన్సార్లలో సమస్య ఉందర్థం. లూజ్ గ్యాస్ క్యాప్ నుండి ఇంజిన్ సిలిండర్లు దెబ్బతినడం వరకు ఏ కారణమైనా కావచ్చు. ఈ లైట్ కనిపించినప్పుడు వెంటనే సమీపంలోని సర్వీస్ సెంటర్కు తీసుకెళ్లి స్కానింగ్ చేయించడం మంచిది.
టీకప్పు లేదా ఆయిల్ డ్రాప్ ఆకారంలో ఉండే ఇంజిన్ ఆయిల్ ప్రెజర్ వార్నింగ్ లైట్ చాలా ప్రమాదకరమైనది. ఇంజిన్లో ఆయిల్ లెవెల్స్ చాలా తక్కువగా ఉన్నాయని లేదా ఆయిల్ పంప్ సరిగ్గా పనిచేయడం లేదని ఇది హెచ్చరిస్తుంది. ఆయిల్ లేకుండా కారు నడిపితే ఇంజిన్ ఒక్కసారిగా సీజ్ అయ్యే ప్రమాదం ఉంది కాబట్టి, వెంటనే కారును పక్కకు ఆపి ఆయిల్ లెవెల్ చెక్ చేయాలి.
థర్మామీటర్ నీటిలో మునిగినట్లు ఉండే కూలెంట్ టెంపరేచర్ వార్నింగ్ లైట్ వెలిగిందంటే ఇంజిన్ ఓవర్ హీట్ అవుతోందని అర్థం. రేడియేటర్లో కూలెంట్ లేకపోవడం లేదా కూలింగ్ ఫ్యాన్ పనిచేయకపోవడం దీనికి కారణం కావచ్చు. ఇలాంటప్పుడు కారును వెంటనే సురక్షితమైన ప్రదేశంలో ఆపి ఇంజిన్ ఆఫ్ చేయాలి.
ప్లస్, మైనస్ గుర్తులతో ఉండే బ్యాటరీ వార్నింగ్ లైట్ కారు ఛార్జింగ్ సిస్టమ్లో లోపాన్ని సూచిస్తుంది. ఆల్టర్నేటర్ ఫెయిల్ అవ్వడం వల్ల లేదా బ్యాటరీ లైఫ్ అయిపోవడం వల్ల ఇది వెలుగుతుంది. ఈ లైట్ వెలిగినప్పుడు కారు ఎక్కువసేపు స్టార్ట్లో ఉండదు కాబట్టి, ఏసీ మరియు మ్యూజిక్ సిస్టమ్ను ఆఫ్ చేసి కారు ఆగిపోకముందే మెకానిక్ వద్దకు చేరుకోవాలి.
రౌండ్ సర్కిల్లో ఆశ్చర్యార్థకం గుర్తుతో ఉండే బ్రేక్ సిస్టమ్ వార్నింగ్ లైట్ హ్యాండ్ బ్రేక్ వేసి ఉన్నప్పుడు లేదా బ్రేక్ ఆయిల్ తక్కువగా ఉన్నప్పుడు కనిపిస్తుంది. హ్యాండ్ బ్రేక్ రిలీజ్ చేసినా ఈ లైట్ ఆఫ్ కాకపోతే, బ్రేక్ ఫ్లూయిడ్ చెక్ చేయించడం అత్యవసరం.
సాధారణంగా డ్యాష్బోర్డ్పై పసుపు లేదా ఆరెంజ్ రంగులో లైట్ వెలిగితే సమస్యను త్వరలోనే చెక్ చేయించాలని అర్థం, అదే ఎరుపు రంగు లైట్ వెలిగితే మాత్రం వెంటనే కారును ఆపి సమస్యను పరిష్కరించాలని హెచ్చరికగా భావించాలి. చిన్న చిన్న నిర్లక్ష్యాలు పెద్ద ప్రమాదాలకు దారితీస్తాయి కాబట్టి మీ కారు భద్రతను ఎప్పుడూ మొదటి ప్రాధాన్యతగా తీసుకోండి. ఈ ముఖ్యమైన సమాచారాన్ని మీ ఫ్రెండ్స్, ఫ్యామిలీలోని కార్ ఓనర్స్ అందరితోనూ షేర్ చేయండి.
