YS Jagan Mohan Reddy: గురువారం చెన్నై లీలా ప్యాలెస్ లో వైయస్ అనిల్ రెడ్డి కుమార్తె వివాహం ఘనంగా జరిగింది. ఈ కార్యక్రమానికి ఏపీ మాజీ ముఖ్యమంత్రి వైయస్ జగన్మోహన్ రెడ్డి.. భార్య భారతితో కలిసి హాజరయ్యారు. ఈ వేడుకకు ప్రముఖ వ్యాపారవేత్త ఆదాని.. కేటీఆర్.. తమిళనాడు ముఖ్యమంత్రి విజయ్ కూడా హాజరయ్యారు. జగన్, విజయ్, కేటీఆర్ ఫోటోలను వైసిపి అనుకూల మీడియా.. బీఆర్ఎస్ అనుకూల మీడియా సోషల్ మీడియాలో విపరీతంగా ట్రెండ్ చేస్తున్నాయి.
ఈ విషయాన్ని పక్కన పెడితే అనిల్ రెడ్డి కుమార్తె వివాహానికి వెళ్ళినట్టు.. జగన్.. భారతి షర్మిల కుమార్తె వివాహానికి వెళ్తారా అనే ప్రశ్న వ్యక్తమవుతోంది. అనిల్ రెడ్డి కుమార్తె వివాహానికి జగన్ మాతృమూర్తి విజయమ్మ కూడా హాజరయ్యారు. ఈ నేపథ్యంలో రక్తం పంచుకుని పుట్టిన సొంత సోదరి షర్మిల కుమార్తె వివాహానికి కూడా జగన్ హాజరవుతారా.. అనే ప్రశ్న చర్చకు దారి తీస్తోంది.
షర్మిల తో కొనసాగుతున్న విభేదాలు కేవలం రాజకీయాలకు మాత్రమే పరిమితం కావాలని.. బంధువులు కోరుకుంటున్నారు. అయితే ఈ వివాదాలు కుటుంబ సంబంధాల వరకు విస్తరించాయి. బెంగళూరులోని నివాసంలో కుమార్తె వివాహాన్ని నిర్వహించాలని షర్మిల భావించారు. భద్రత కారణాలను చూపించి జగన్ దానికి ఒప్పుకోలేదు. తల్లి విజయమ్మ సపోర్ట్ ఉన్నప్పటికీ.. చిన్నప్పటి నుంచి ఆ ఇంట్లో పెరిగిన కుమార్తె వివాహం చేయాలని కోరికను షర్మిల నెరవేర్చుకోలేకపోతున్నారు. ఈ నేపథ్యంలో ఇటీవల తన ఆవేదనను బయటపెట్టిన షర్మిల.. తన కుమార్తె వివాహ వేదికను వేరే చోటుకు మార్చుకున్నారు. సొంత చెల్లెలికి కుమార్తె వివాహ వేడుకకు స్థలం ఇవ్వడానికి జగన్ ఒప్పుకోలేదు. ఈ నేపథ్యంలో జగన్ అసలు ఈ పెళ్లికి వస్తారా.. లేదా.. అనే అనుమానాలు వ్యక్తమవుతున్నాయి.
ఆస్తుల పంపకాల విషయంలో షర్మిల హక్కులను మొత్తం జగన్ లాగేసుకున్నారని ఆమె తరఫు వారు ఆరోపిస్తున్నారు. దీనికి తోడు కేసుల వ్యవహారం కూడా కొనసాగుతోంది. ఈ ఆస్తి వివాదాలను జగన్ పిల్లల శుభకార్యాల వరకు తీసుకెళ్లారని షర్మిల తరఫు బంధువులు ఆరోపిస్తున్నారు. ఇది సరైన పద్ధతి కాదని వారు విమర్శిస్తున్నారు. బంధువుల ఇంట్లో జరిగే శుభకార్యాలకు జగన్ సతీసమేతంగా హాజరవుతున్నారు. కానీ తోడబుట్టిన చెల్లెలి విషయంలో మాత్రం ఆయన ఈ సిద్ధాంతాన్ని పాటించడం లేదు. ఫలితంగా వైయస్ కుటుంబం ఒకతాటిపైకి కాకుండా.. ఒక వేదిక మీదికి రాకుండా ఉండిపోతుంది. దీంతో వైయస్ అభిమానుల్లో మనస్థాపం కనిపిస్తోంది.
రాజకీయాలు ఒక పరిధి వరకు ఉండాలి. ఆస్తి వివాదాలు కూడా ఒక స్థాయి వరకు ఉండాలి. ప్రేమాభిమానాలు.. రక్త సంబంధాలు ఎప్పటికీ బలంగా ఉండాలి. అనిల్ కుమార్తె పెళ్లికి జగన్ భార్యతో కలిసి వెళ్లిపోయారు. అక్కడ సందడి చేశారు. అలాగే తన మేనకోడలి వివాహం విషయంలో కూడా ఇలానే చేయాలని వైయస్ అభిమానులు ఆశిస్తున్నారు. దీనివల్ల వైయస్ వారసత్వానికి.. కుటుంబ గౌరవానికి ఒక సార్థకత లభిస్తుందని నెటిజన్లు పేర్కొంటున్నారు. మరి జగన్ షర్మిల కుమార్తె పెళ్లికి హాజరవుతారా.. అది సాధ్యమవుతుందా.. ఈ ప్రశ్నలకు కాలమే సమాధానం చెప్పాలి.
