Nandyal Missing Girl: కాకినాడ జిల్లా తునిలో రెండేళ్ల చిన్నారి జ్ఞానేశ్వరి అదృశ్యం కేసు మిస్టరీ ఇంతవరకు వీడలేదు. చిన్నారి ఆచూకీ ఇంతవరకు దొరకలేదు. ఇలాంటి పరిస్థితుల్లో నంద్యాల జిల్లాలో జరిగిన ఓ ఘటన పోలీస్ యంత్రాంగాన్ని పరుగులు తీయించింది. నంద్యాల శివారు ప్రాంతంలో ఆరేళ్ల చిన్నారి కనిపించకుండా పోవడం స్థానికంగా కలకలం రేపింది. దీంతో కుటుంబ సభ్యుల ఫిర్యాదుతో రంగంలోకి దిగారు వందల మంది పోలీసులు. మొత్తం జల్లెడ పట్టేశారు. ఇంట్లో ఎవరూ లేని సమయంలో చిన్నారి బయటకు వెళ్లినట్లు తెలుసుకున్న పోలీసులు ఆ దిశగా.. వెతుకులాట ప్రారంభించేసరికి అసలు విషయం తెలిసింది.
* డయల్ 100కు ఫిర్యాదు..
ఇంట్లో ఎవరూ లేని సమయంలో ఆ చిన్నారి బయటకు వెళ్ళిపోయింది. కొద్దిసేపటి తర్వాత తల్లి కుమార్తె కనిపించిన విషయాన్ని గుర్తించింది. అన్నిచోట్ల వెతికింది. జాడ తెలియక పోవడంతో ఆదివారం రాత్రి 9 గంటలకు డయల్ 100 కు ఫోన్ చేసి సమాచారం అందించింది. తుని ఘటన నేపథ్యంలో నంద్యాల ఎస్పీ సునీల్ సోరాన్ అప్రమత్తం అయ్యారు. రాత్రంతా 200 మంది పోలీసులు గాలించారు పాప ఆచూకీ కోసం. డ్రోన్ కెమెరాలు, పోలీస్ జాగిలాల సాయంతో గాలింపు చర్యలు చేపట్టారు. ఈ క్రమంలో చిన్నారి వీధుల్లో తిరుగుతున్న సిసి ఫుటేజీ కనిపించింది. అయినా సరే జాడ తెలియలేదు.
* జొన్న చేనులో నిద్రపోతూ..
ఆదివారం అర్ధరాత్రి నుంచి సోమవారం వేకువ జాము వరకు పోలీసులు జల్లెడ పట్టారు. అయితే ఇంటి సమీపంలోని ఓ జొన్న చేనులో పోలీసులు కూంబింగ్ చేపట్టారు. జొన్న చేనులో చిన్నారి నిద్రపోతూ కనిపించడంతో.. పోలీస్ బృందాలు ఊపిరి పీల్చుకున్నాయి. పాపను తల్లి చెంతకు చేర్చాయి. ఫిర్యాదు అందిన కొన్ని గంటల్లోనే పాపను పోలీసులు గుర్తించడంతో అంతా ఊపిరి పీల్చుకున్నారు. అయితే తుని చిన్నారి జ్ఞానేశ్వరి కి సంబంధించి నెలలు గడుస్తున్న ఆచూకీ తెలియలేదు. ఈ నేపథ్యంలో నంద్యాల ఘటన జరగడంతో పోలీస్ శాఖ ఒక్కసారిగా షాక్ కు గురైంది. చిన్నారి ఆచూకీ వెనువెంటనే దొరకడంతో ఉపశమనం పొందింది.
