Chandrababu: ఏపీలో కూటమి ప్రభుత్వం కొలువుదీరింది. టిడిపి తో పాటు జనసేన, బిజెపికి చెందిన నేతలు మంత్రివర్గంలో ఉన్నారు. జనసేనకు మూడు, బిజెపికి ఒక మంత్రి పదవి కేటాయించారు. గతంలో వైసీపీ ప్రభుత్వంలోని మంత్రులు, వారి కుటుంబ సభ్యుల పేర్లు పలు వివాదాల్లో బయటకు వచ్చాయి. అప్పట్లో టిడిపి తో పాటు విపక్షాలు అనేక ఆరోపణలు చేశాయి. ఇప్పుడు తెలుగుదేశం పార్టీకి చెందిన మంత్రి భార్య ఒకరు వివాదంలో చిక్కుకున్నారు.మంత్రి భార్య ఏకంగా పోలీసులపై విరుచుకుపడడం సోషల్ మీడియాలో వైరల్ అయింది. దీంతో సీఎం చంద్రబాబు స్పందించారు. సదరు మంత్రిపై ఆగ్రహం వ్యక్తం చేశారు. దీనిపై వివరణ ఇవ్వాలని.. మరోసారి ఇటువంటి ఘటన జరిగితే కఠిన చర్యలు తప్పవని హెచ్చరించారు. మంత్రి పదవి వచ్చి నెల రోజులు గడవకముందే భార్య దెబ్బకు ఆ మంత్రికి మైండ్ బ్లాక్ అయ్యింది.
ఏపీ క్యాబినెట్లో చాలామందికి అనూహ్యంగా చోటు దక్కింది. రాయచోటి నుంచి పోటీ చేసి గెలిచిన రాంప్రసాద్ రెడ్డిని చంద్రబాబు తన క్యాబినెట్ లోకి తీసుకున్నారు. అయితే మంత్రి రాంప్రసాద్ రెడ్డి భార్య హరితారెడ్డి పోలీసులతో ప్రవర్తించడం వెలుగు చూసింది. రాయచోటి పోలీసులు తనకు ఎస్కార్ట్ గా రావాలని మంత్రి భార్య వారిని ఆదేశించారు. అందుకు పోలీసులు నిరాకరించారు. ఆ సమయంలో పోలీసులకు ఆమె వాగ్వివాదానికి దిగారు. దురుసుగా ప్రవర్తించారు. ఆ వీడియోలు సోషల్ మీడియాలో రావడంతో ఆమె తీవ్ర విమర్శలకు గురయ్యారు. విషయం తెలుసుకున్న చంద్రబాబు నేరుగా మంత్రి రాంప్రసాద్ రెడ్డికి ఫోన్ చేసి వివరణ కోరారు.
ఇటువంటి విషయాల్లో మంత్రులు జాగ్రత్తగా ఉండాలని చంద్రబాబు ఇప్పటికే ఆదేశాలు ఇచ్చారు. మంత్రి పదవి స్వీకరించి నెల రోజులు గడవకముందే ఇదేంటన్న ప్రశ్న ఉత్పన్నమవుతోంది. మంత్రి పదవి వచ్చిందని ఇలా చేయడం సరికాదని.. ఇంకోసారి ఇలా జరిగితే ఊరుకునేది లేదని సీఎం చంద్రబాబు గట్టిగానే హెచ్చరించినట్లు సమాచారం. దీనిపై రాంప్రసాద్ రెడ్డి విచారం వ్యక్తం చేశారు. తన భార్య హరిత రెడ్డి పోలీసులు పట్ల వ్యవహరించిన తీరు బాధాకరంగా ఉందని.. ఇంకోసారి ఇలా జరగకుండా చూసుకుంటానని.. ఈసారి క్షమించాలని ఆయన కోరారు. అయితే ఉద్యోగులు, అధికారుల విషయంలో చంద్రబాబు చాలా రకాల జాగ్రత్తలు తీసుకుంటున్నారు. ఆ రెండు వర్గాలు జగన్ హయాంలో బాధిత వర్గాలుగా మిగిలాయి. ఎన్నికల్లో ఉద్యోగులు కూటమికి ఏకపక్షంగా అండగా నిలిచారు. అందుకే వారి విషయంలో ఎటువంటి ఘటనలు జరిగిన ప్రభుత్వానికి చెడ్డ పేరు వస్తుందని చంద్రబాబు భావిస్తున్నారు.
