Baltic Sea: సముద్ర అంతర్భాగంలో పదివేల ఏళ్ళనాటి రాతి గోడ.. పరిశోధకుల పరిశీలనలో షాకింగ్ నిజాలు

Baltic Sea: అప్పట్లో 2002లో నాసా అంతరిక్షం నుంచి ఓ చిత్రం తీస్తే రామసేతు కనిపించింది. రామాయణంలో యుద్ధకాండ సమయంలో రామసేతు ప్రస్తావన ఉంది. తమిళనాడులోని రామేశ్వరం వద్ద గల ధనుష్కోటి నుంచి శ్రీలంకలోని మన్నార్ ద్వీపాల వరకు 48 కిలోమీటర్ల పొడవుతో మూడు కిలోమీటర్ల వెడల్పుతో దీనిని నిర్మించారు. ఈ వారధిని సేతుబంధ రామేశ్వరం అంటారు. 15వ శతాబ్దం వరకు ఈ రామసేతు భారత్ శ్రీలంక వరకు నడకమార్గానికి అందుబాటులో ఉండేది. 1480లో వచ్చిన తుఫాన్ ప్రభావం వల్ల ఈ వంతెన ధ్వంసం అయింది. అయితే ఇప్పుడు ఐరోపాలో దాదాపు ఇలాంటి ఒక వందల ఏళ్ల సంవత్సరాల నాటి గోడను పరిశోధకులు కనుగొన్నారు. ఐరోపాఖండంలోని జర్మనీలో బాల్టిక్ సముద్రం కింద ఈ రాతియుగం నాటి గోడను పరిశోధకులు వెలుగులోకి తీసుకొచ్చారు. మెక్లెన్ బర్గ్ బే లో పది కిలోమీటర్ల సముద్ర అంతర్భాగంలో శాస్త్రవేత్తలు, పరిశోధక విద్యార్థులు మల్టీ బీమ్ సోనార్ సిస్టం ద్వారా పరిశీలించినప్పుడు ఇది కనిపించింది. ఈ రాతిగోడలో 1,673 రాళ్ళు ఉన్నాయి. ఈ గోడ ఒక మీటర్ కంటే తక్కువ ఎత్తులో ఉంది. 971 మీటర్ల దూరం వరకు విస్తరించి ఉంది. దీనిని నాసా ఓరియన్ నెబ్యూలా 3D ద్వారా ఈ చిత్రాన్ని తీసింది. ఈ పురాతన రాతి గోడ సహజమా? లేకుంటే సునామీ లేదా హీమానీ నదాల కలయిక వల్ల ఏర్పడిందా? అనే ప్రశ్నలు తలెత్తుతున్నాయి. అయితే సహజ ప్రక్రియల ద్వారా ఈ గోడ ఏర్పడే అవకాశం లేదని పరిశోధకులు చెబుతున్నారు.

” మంచు స్పటికాల ద్వారా తీర ప్రాంతం ప్రభావితం అవుతుందని మేము అనుకోవడం లేదు. సునామీ లేదా ఇతర సంఘటనల వల్ల ఇలాంటి గోడ ఏర్పడుతుందని రుజువులు లేవు. ఈ గోడను మనుషులు నిర్మించారని మేము నమ్ముతున్నామని” ప్రొసీడింగ్స్ ఆఫ్ ది నేషనల్ అకాడమీ ఆఫ్ సైన్స్ లో పరిశోధకులు పేర్కొన్నారు. బ్లింకర్ వాల్, నిక్ పాయింట్ వద్ద ఈ గోడ అతిపెద్ద రాళ్ల సమూహంగా ఈ గోడ ఉందని వారు వివరించారు.

ఈ గోడను పదివేల సంవత్సరాల క్రితం నిర్మించారని పరిశోధకులు చెబుతున్నారు. అప్పట్లో ఈ గోడ నిర్మించినప్పుడు ఈ ప్రాంతమంతా సరస్సు లాగా ఉండేదని వారు అభిప్రాయపడుతున్నారు. అప్పట్లో వేట కోసం ఈ గోడను నిర్మించి ఉంటారని వారు పేర్కొంటున్నారు. అయితే ఈ గోడ నిర్మాణం వెనుక కచ్చితమైన ప్రయోజనాన్ని చెప్పలేమని.. రెయిన్ డీర్ మందలను వేటాడేందుకు వేటగాళ్లు ఈ గోడను ఉపయోగించి ఉంటారనే పరిశోధకులు అభిప్రాయం వ్యక్తం చేస్తున్నారు. ఈ గోడను ఒక కృత్రిమ అడ్డంకిగా సృష్టించి రెయిన్ డీర్ లను అడ్డుకొని, వాటిని చంపేశారేమోననే అనుమానాలు వ్యక్తం చేస్తున్నారు.

“రెయిన్ డీర్ లు నీళ్లల్లో ఈత కొట్టినప్పటికీ వాటి గమనానికి ఈ గోడ అడ్డుగా ఉండేది కావచ్చు. అప్పుడు పైన ఉన్న వేటగాళ్లు బాణాలు, ఈటెలు, పదునైన ఆయుధాలతో వేటాడే వారని” పరిశోధకులు అభిప్రాయపడుతున్నారు. ” సముద్రమట్టాలు పెరగడం వల్ల క్రమక్రమంగా ఈ గోడ మునిగిపోయింది. సుమారు 8,500 సంవత్సరాల క్రితమే ఇది కూడా మునిగిపోయి ఉంటుందని” పరిశోధకులు చెప్తున్నారు. గోడ మీద ఉన్న ఆనవాళ్ళు ఆధారంగా నాటి ప్రజల జీవన విధానాన్ని అంచనా వేసేందుకు తోడ్పడుతుందని పరిశోధకులు అంటున్నారు.