Mission Shakti : సాంకేతిక, రక్షణ రంగాల్లో భారత్ సాధించిన విజయాల్లో 2019లో చేపట్టిన ‘మిషన్ శక్తి’ (ASAT) పరీక్ష కీలకమైనది. ఈ ప్రయోగం సమయంలో అమెరికా నిఘా వర్గాల్లో తీవ్ర ఆందోళన నెలకొన్నట్లు అమెరికా మాజీ ఎయిర్‌ఫోర్స్ ఇంటెలిజెన్స్ అధికారి డేవిడ్ గ్రుష్ తాజాగా వెల్లడించారు.
జో రోగన్ పాడ్‌కాస్ట్‌లో గ్రుష్ మాట్లాడుతూ.. 2019లో భారత్ ముందస్తు సమాచారం లేకుండా తన ఉపగ్రహాన్ని క్షిపణితో కూల్చివేసిందని చెప్పారు. ఒడిశా తీరంలో జారీ చేసిన NOTAM ద్వారా క్షిపణి పరీక్ష జరుగుతోందని తెలిసినా, అది యాంటీ శాటిలైట్ పరీక్ష అని అమెరికా ఊహించలేదన్నారు. దీంతో అమెరికా అధికారులు వెంటనే ఎంబసీలు, ఉన్నతాధికారులను సంప్రదించారని తెలిపారు.
ఆ సమయంలో తాను NROలో ఇంటెలిజెన్స్ విభాగంలో పనిచేస్తున్నానని చెప్పిన గ్రుష్.. ఉపగ్రహాన్ని కూల్చివేయడం వల్ల ఏర్పడే అంతరిక్ష వ్యర్థాలు అమెరికా గూఢచారి ఉపగ్రహాలను ఢీకొనే ప్రమాదంపై ఆందోళన వ్యక్తం చేశారు. వెంటనే ఆర్బిటల్ అనలిస్టులను సంప్రదించి వ్యర్థాల వ్యాప్తి, ఉపగ్రహాల మార్గాల్లో మార్పులు అవసరమా అనే విషయాలను పరిశీలించినట్లు వెల్లడించారు.
నాలుగో దేశంగా భారత్
‘మిషన్ శక్తి’ ద్వారా భారత్ తక్కువ ఎత్తులో ఉన్న ‘మైక్రోశాట్-ఆర్’ ఉపగ్రహాన్ని కూల్చివేసింది. దీంతో అమెరికా, రష్యా, చైనా తర్వాత యాంటీ శాటిలైట్ సామర్థ్యాన్ని ప్రదర్శించిన నాలుగో దేశంగా భారత్ నిలిచింది. తక్కువ ఎత్తులో పరీక్ష నిర్వహించడం వల్ల ఏర్పడిన వ్యర్థాలు కొద్ది వారాల్లోనే వాతావరణంలోకి ప్రవేశించి కాలిపోతాయని భారత్ స్పష్టం చేసింది.
ఈ ప్రయోగం అత్యంత రహస్యంగా జరిగినట్లు DRDO మాజీ చైర్మన్ జి. సతీశ్ రెడ్డి గతంలో వెల్లడించారు. 2016లో ప్రధాని, అప్పటి NSA అజిత్ దోవల్‌కు ఈ ప్రయోగంపై ప్రజెంటేషన్ ఇచ్చినట్లు తెలిపారు. ప్రయోగానికి సంబంధించిన పూర్తి సమాచారం కేవలం నలుగురు లేదా ఐదుగురు శాస్త్రవేత్తలకు మాత్రమే తెలుసని ఆయన పేర్కొన్నారు.
