Hyderabad Billionaires : భారతదేశపు సంపద పటంలో హైదరాబాద్ మరోసారి తనదైన ముద్ర వేసింది. హురున్ తాజా నివేదిక ప్రకారం.. దేశంలోని అత్యంత సంపన్నుల జాబితాలో తెలుగు గడ్డకు చెందిన ఏడుగురు వ్యాపారవేత్తలు స్థానం దక్కించుకున్నారు. వీరంతా కలిసి సృష్టించిన సంపద విలువ ఏకంగా రూ.4 లక్షల కోట్లు దాటడం విశేషం.. ఇది కొన్ని చిన్న దేశాల జీడీపీతో సమానమైన మొత్తం.
ఔషధాల నుంచి డేటా వరకు.. విభిన్న రంగాల విజేతలు
ఈ జాబితాలో ముందు వరుసలో దివీస్ ల్యాబొరేటరీస్ సారథి మురళి నిలిచారు, ఆయన సంపద రూ.1.25 లక్షల కోట్లకు చేరింది. ఫార్మా రంగంలో భారత్ను ప్రపంచ పటంలో నిలిపిన సంస్థల్లో ఇది ఒకటి.
మౌలిక వసతుల రంగంలో మేఘా ఇంజినీరింగ్ సృష్టించిన సంచలనం చిన్నది కాదు. ఈ సంస్థ వ్యవస్థాపకులు పి. పిచ్చిరెడ్డి, పి.వి. కృష్ణారెడ్డిలు వరుసగా రూ.53,100 కోట్లు, రూ.52,100 కోట్ల సంపదతో దేశవ్యాప్త ప్రాజెక్టుల ద్వారా తమ సామ్రాజ్యాన్ని విస్తరించారు.
డిజిటల్ యుగపు కొత్త రారాజు అనదగ్గ కంట్రోల్ ఎస్ డేటా సెంటర్స్ వ్యవస్థాపకుడు శ్రీధర్ పిన్నపురెడ్డి కుటుంబం రూ.46,100 కోట్ల సంపదతో క్లౌడ్, డేటా మౌలిక వసతుల విప్లవానికి ప్రతినిధిగా నిలిచింది.
ఔషధ రంగపు రెండు దిగ్గజాలు.. ఆరోబిందో ఫార్మా వ్యవస్థాపకుడు పి.వి. రామ్ప్రసాద్ రెడ్డి (రూ.39,900 కోట్లు), హెటెరో గ్రూప్ చైర్మన్ బి. పార్థసారథి రెడ్డి కుటుంబం (రూ.39,400 కోట్లు) కూడా ఈ ఖ్యాతిని పంచుకున్నారు.
నగరాల పోటీలో నాలుగో స్థానం
కేవలం వ్యక్తిగత సంపద పరంగానే కాదు, సంపన్నుల నగరాల జాబితాలోనూ హైదరాబాద్ తన సత్తా చాటింది. ముంబై, ఢిల్లీ, బెంగళూరు తర్వాత నాలుగో స్థానంలో నిలిచి, దేశంలోని అగ్రశ్రేణి వాణిజ్య కేంద్రాల సరసన చేరింది.
భాగ్యనగరం కొత్త అధ్యాయం
ఒకప్పుడు ముత్యాల వ్యాపారానికి, తర్వాత ఐటీ హబ్గా పేరు తెచ్చుకున్న హైదరాబాద్ ఇప్పుడు ఫార్మా, ఇన్ఫ్రా, డేటా సెంటర్ల వంటి కొత్త రంగాల్లోనూ సంపద సృష్టికర్తగా ఎదుగుతోంది. గౌతమ్ అదానీ, ముకేశ్ అంబానీ వంటి జాతీయ దిగ్గజాల నీడలో కూడా, దక్షిణాది నుంచి ఏడుగురు వ్యాపారవేత్తలు ఏకకాలంలో టాప్ 100లో నిలవడం — భాగ్యనగరపు వ్యాపార భవిష్యత్తుకు స్పష్టమైన సంకేతం.
