‘గివింగ్ బ్యాక్ టు ది కమ్యూనిటీ’లో భాగంగా డౌనీ స్కూల్ విద్యార్థులకు తానా సేవలు
TANA Community Service విద్యార్థుల భవిష్యత్తుకు బాటలు వేసే విద్యా సంవత్సరాన్ని మరింత ఆనందంగా ప్రారంభించేలా ఉత్తర అమెరికా తెలుగు సంఘం (తానా) మరోసారి తన సేవా స్ఫూర్తిని చాటుకుంది. కమ్యూనిటీకి తిరిగి ఏదైనా అందించాలనే ఉద్దేశంతో తానా నిర్వహిస్తున్న ‘గివింగ్ బ్యాక్ టు ది కమ్యూనిటీ’ కార్యక్రమంలో భాగంగా మిడ్-అట్లాంటిక్ విభాగం హ్యారీస్‌బర్గ్‌లోని డౌనీ స్కూల్ విద్యార్థులకు స్కూల్ బ్యాగులు, విద్యా సామగ్రిని అందజేసింది.
స్కూల్ ప్రారంభం అంటే పిల్లల్లో కొత్త ఉత్సాహం. అయితే అవసరమైన పుస్తకాలు, బ్యాగులు, ఇతర విద్యా సామగ్రి సమకూర్చుకోవడం ప్రతి కుటుంబానికీ సులభం కాదు. ఈ నేపథ్యంలో విద్యార్థుల అవసరాలను గుర్తించి వారికి అవసరమైన వస్తువులను అందించడమే లక్ష్యంగా ఈ కార్యక్రమాన్ని చేపట్టారు. విద్యార్థులకు బ్యాక్‌ప్యాక్‌లతో పాటు ఇతర విద్యా సామగ్రిని అందించడం ద్వారా కొత్త విద్యా సంవత్సరాన్ని సంతోషంగా ప్రారంభించేందుకు తానా తనవంతు సహకారం అందించింది.
సేవే లక్ష్యంగా..
తానా ఆధ్వర్యంలో ప్రతి ఏడాది నిర్వహిస్తున్న ‘గివింగ్ బ్యాక్ టు ది కమ్యూనిటీ’ కార్యక్రమం ద్వారా స్థానిక సమాజంలోని అవసరాలను గుర్తించి వివిధ సేవా కార్యక్రమాలను చేపడుతున్నారు. ఈసారి చిన్నారుల విద్యకు ప్రాధాన్యతనిస్తూ డౌనీ స్కూల్ విద్యార్థులకు సహాయం అందించారు. విద్యార్థులకు అందించిన ప్రతి బ్యాగ్ వెనుక సమాజం పట్ల బాధ్యత, పిల్లల భవిష్యత్తుపై నమ్మకం ఉందని నిర్వాహకులు తెలిపారు.
ఈ సేవా కార్యక్రమానికి నాయకత్వం వహించి, అవసరమైన సహకారం అందించిన తానా అధ్యక్షుడు డా. నరేన్ కొడాలి, తానా బోర్డ్ డైరెక్టర్ రవి పొట్లూరిలకు మిడ్-అట్లాంటిక్ విభాగం ప్రత్యేక కృతజ్ఞతలు తెలిపింది.
సమష్టి కృషితో విజయవంతం
కార్యక్రమాన్ని విజయవంతం చేయడంలో తానా ఈవీపీ శ్రీనివాస్ లావు, కమ్యూనిటీ సర్వీస్ కోఆర్డినేటర్ సాయి బొల్లినేని, తానా బెనిఫిట్స్ కోఆర్డినేటర్ వెంకట్ సింగు, మిడ్-అట్లాంటిక్ రీజినల్ రిప్రజెంటేటివ్ ఫణి కంతేటి కీలకంగా వ్యవహరించారు.
అలాగే కార్యక్రమం కోసం తమ సమయాన్ని కేటాయించిన వలంటీర్లకు నిర్వాహకులు ధన్యవాదాలు తెలిపారు. సేవా కార్యక్రమానికి ఆర్థిక సహకారం అందించిన గ్రాండ్ స్పాన్సర్లు షిన్‌టెక్ ఇంక్ మరియు బ్రైట్ రేట్ మోర్ట్‌గేజ్ ఎల్‌ఎల్‌సీకి ప్రత్యేక కృతజ్ఞతలు తెలియజేశారు.
చిన్నారుల చేతుల్లో కొత్త బ్యాగులు.. వారి ముఖాల్లో చిరునవ్వులు.. విద్యా సంవత్సరాన్ని ఆత్మవిశ్వాసంతో ప్రారంభించేలా అందిన ప్రోత్సాహం.. ఇదే ‘గివింగ్ బ్యాక్ టు ది కమ్యూనిటీ’ కార్యక్రమం అందించిన అసలైన స్ఫూర్తి. విద్యతో పాటు సేవా విలువలను కూడా సమాజంలో బలపరచాలనే తానా ప్రయత్నానికి ఈ కార్యక్రమం మరో ఉదాహరణగా నిలిచింది.
