Polar Bear Protection : ఎవరైనా ప్రశాంతంగా నిద్రపోతున్నప్పుడు కావాలనే లేపితే సహజంగానే కోపం వస్తుంది. అయితే నార్వేలో మాత్రం ఓ వ్యక్తి చేసిన ఈ పని ఏకంగా రూ.5 లక్షల జరిమానాకు దారితీసింది. అది కూడా ఓ మనిషిని నిద్రలేపినందుకు కాదు.. అరుదైన ధృవపు ఎలుగుబంటిని నిద్రలేపినందుకు!
నార్వేకు చెందిన స్వాల్బార్డ్ ద్వీపసమూహం అరుదైన ధృవపు ఎలుగుబంట్లకు కీలక ఆవాసంగా ఉంది. ఇక్కడి వన్యప్రాణులను రక్షించేందుకు నార్వే ప్రభుత్వం ఎన్నో సంవత్సరాలుగా కఠినమైన నిబంధనలను అమలు చేస్తోంది. ముఖ్యంగా ధృవపు ఎలుగుబంట్లను ఎలాంటి ఇబ్బందులకు గురిచేయకుండా పర్యాటకులు, నౌకల సిబ్బంది అప్రమత్తంగా వ్యవహరించాల్సి ఉంటుంది.
ఇటీవల స్వాల్బార్డ్ ప్రాంతానికి పర్యాటకులతో వెళ్లిన ఓ నౌకలోని వ్యక్తి నిద్రిస్తున్న ఓ ధృవపు ఎలుగుబంటిని కావాలనే నిద్రలేపేందుకు ఫాగ్హార్న్ మోగించాడు. భారీ శబ్దంతో ఒక్కసారిగా ఉలిక్కిపడిన ఎలుగుబంటి అక్కడి నుంచి పరుగులు తీసింది. ఈ ఘటనపై అధికారులు తీవ్రంగా స్పందించారు. వన్యప్రాణిని ఉద్దేశపూర్వకంగా భయపెట్టినందుకు ఆ వ్యక్తిపై సుమారు రూ.5 లక్షల జరిమానా విధించినట్లు సమాచారం.
ఫాగ్హార్న్ సాధారణ హారన్ లాంటిది కాదు. దట్టమైన పొగమంచులో నౌకలు పరస్పరం ఢీకొనకుండా హెచ్చరికలు ఇవ్వడానికి దీనిని ఉపయోగిస్తారు. దీని శబ్దం చాలా దూరం వరకు వినిపించేంత తీవ్రంగా ఉంటుంది. ఇలాంటి భారీ శబ్దాలు అడవి జంతువులను తీవ్ర భయాందోళనలకు గురిచేయవచ్చు. భయంతో అవి చాలా దూరం పరుగెత్తాల్సి రావడం వల్ల అలసట, ఒత్తిడి వంటి సమస్యలు ఎదురయ్యే అవకాశం ఉంటుంది.
ముఖ్యంగా తల్లి ధృవపు ఎలుగుబంటి భయంతో తన పిల్లల నుంచి దూరమైతే పరిస్థితి మరింత ప్రమాదకరంగా మారుతుంది. పిల్లలకు తల్లి పాలు అందకపోవడం వాటి ప్రాణాలకే ముప్పుగా మారొచ్చు. అందుకే స్వాల్బార్డ్లో వన్యప్రాణుల విషయంలో అధికారులు కఠినమైన నిబంధనలు అమలు చేస్తున్నారు.
పర్యాటకులు అరుదైన జంతువులను దగ్గరగా చూడాలనే ఉత్సాహంలో వాటి సహజ జీవనానికి ఎలాంటి ఆటంకం కలిగించకూడదని అధికారులు హెచ్చరిస్తున్నారు. ఫొటోలు, వీడియోల కోసం జంతువులను భయపెట్టడం లేదా వాటి ప్రవర్తనను మార్చేలా చేయడం వన్యప్రాణి సంరక్షణకు తీవ్ర నష్టం కలిగిస్తుందని స్పష్టం చేస్తున్నారు.
ఒక్క హారన్ కొట్టినందుకే ఇంత భారీ జరిమానా ఎందుకని అనిపించినా.. అరుదైన ధృవపు ఎలుగుబంట్లను కాపాడేందుకు నార్వే తీసుకుంటున్న చర్యలు ఎంత కఠినంగా ఉంటాయో ఈ ఘటన మరోసారి స్పష్టం చేసింది.
