Almonds : ఆరోగ్యం కోసం ఇటీవల డ్రై ఫ్రూట్స్ తినేవారు పెరుగుతున్నారు. ఉదయం అల్పాహారానికి బదులుగా, సాయంత్రం టీ, స్కాక్స్ స్థానంలో చాలా మంది డ్రై ఫ్రూట్స్ తీసుకుంటున్నారు. ఇలా మనం ఆహారంగా తీసుకునే డ్రై ఫ్రూట్స్లో బాదం పప్పు ఒకటి. బాదం పప్పు మన ఆరోగ్యానికి ఎంతో మేలు చేస్తుందన్న సంగతి తెలిసిందే. బాదం పప్పులో ఆరోగ్యానికి మేలు చేసే కొవ్వులు, ప్రోటీన్లు, ఫైబర్తోపాటు ఇతర అనేక పోషకాలు ఉంటాయి. గుండె ఆరోగ్యాన్ని మెరుగుపరచడంలో, శరీరంలోని చెడు కొలెస్ట్రాల్ స్థాయిలను తగ్గించడంలో బాదం పప్పు మనకు సహాయపడుతుంది. అలాగే మనం ప్రతిరోజూ పాలను కూడా ఆహారంగా తీసుకుంటూ ఉంటాం. పాలను ఆహారంగా తీసుకోవడం వల్ల మన ఆరోగ్యానికి కలిగే మేలు అంతా ఇంతా కాదు. పాలల్లో మన శరీరారినికి అవసరమయ్యే విటమిన్స్, మినరల్స్తోపాటు ఇతర పోషకాలు అనేకం ఉంటాయి. పాలు తాగడం వలన మనం చక్కటి ఆరోగ్యాన్ని సొంతం చేసుకోవచ్చు. బాదం పప్పు, పాలు రెండూ మన ఆరోగ్యానికి ఎంతో మేలు చేసేవే. అయితే వీటిని విడివిడిగా తీసుకోవడం కంటే కలిపి తీసుకుంటే మరిన్ని ప్రయోజనాలు పొందవచ్చని నిపుణులు చెబుతున్నారు.
కలిపితే తీసుకుంటే కలిగే ప్రయోజనాలెన్నో…
బాదం, పాలను కలిపి తీసుకోవడం వల్ల మనకు కలిగే ఆరోగ్య ప్రయోజనాలు ఏమిటో ఇప్పుడు తెలుసుకుందాం. బాదం, పాలను తీసుకోవడం వల్ల శరీరానికి కావల్సిన పోషకాలన్నీ సమృద్ధిగా అందుతాయి. పౌష్టికాహార లోపం తలెత్తకుండా ఉంటుంది. శాఖాహారులు బాదం పాలను తీసుకోవడం వల్ల అధిక ప్రయోజనాలను పొందవచ్చు. పాలు తాగడానికి ఎక్కువగా ఇష్టపడని వారు బాదం పాలను తయారు చేసుకుని తాగవచ్చు. ఇలా బాదం పాలను తాగడం వల్ల కూడా మంచి ఫలితం ఉంటుంది.
బాదం పాలలో విటమిన్స్..
బాదం పాలను తీసుకోవడం వల్ల మన శరీరంలో విటమిన్–ఇ లోపం తలెత్తకుండా ఉంటుంది. చర్మం, జుట్టు ఆరోగ్యం మెరుగుపడుతుంది. జుట్టు రాలడం, జుట్టు తెల్లబడడం వంటి సమస్యలు తగ్గుతాయి. వృద్ధాప్య ఛాయలు మన దరిచేరవు. అదే విధంగా బాదం పాలను తాగడం వల్ల శరీరానికి తగినంత కాల్షియం లభిస్తుంది. దీంతో ఎముకలు దృఢంగా, ఆరోగ్యంగా తయారవుతాయి. ఎముకలకు సంబంధించిన సమస్యలు తగ్గు ముఖం పడతాయి. బరువు తగ్గాలనుకునే వారు బాదం పాలను తాగడం వలన మంచి ఫలితం ఉంటుంది. కప్పు బాదం పాలల్లో 39 క్యాలరీల శక్తి ఉంటుంది. వీటిని తాగడం వల్ల కడుపు నిండిన భావన కలుగుతుంది. దీంతో మన దృష్టి ఇతర చిరుతిళ్ల మీదికి వెళ్లకుండా ఉంటుంది. బాదం పాలను తీసుకోవడం వల్ల పేగుల్లో కదలికలు పెరిగి మలబద్దకం సమస్య తగ్గుతుంది. జీర్ణశక్తి మెరుగుపడుతుంది. దీంతో పేగులు మనం తీసుకున్న ఆహారంలో ఉండే పోషకాలను ఎక్కువగా గ్రహిస్తాయి.
ఈ విధంగా బాదం పాలు మన ఆరోగ్యానికి ఎంతో మేలు చేస్తాయని నిపుణులు చెబుతున్నారు. చలికాలంలో బాదం పాలను తీసుకోవడం వల్ల మరిన్ని ప్రయోజనాలను పొందవచ్చని అలాగే జుట్టుకు, చర్మానికి సంబంధించిన సమస్యలతో బాధపడే వారు బాదం పాలను తీసుకోవడం వల్ల మంచి ఫలితాలను పొందవచ్చని నిపుణులు తెలియజేస్తున్నారు.
