Rainy Season Diseases: వర్షాకాలం ప్రారంభమైన తర్వాత వాతావరణంలో తేమ పెరగడం, ఉష్ణోగ్రతల్లో హెచ్చుతగ్గులు ఏర్పడటం వల్ల వైరస్లు, బ్యాక్టీరియా వేగంగా వ్యాపించే అవకాశం ఉంటుంది. దీంతో జలుబు, జ్వరం, గొంతు నొప్పి, దగ్గు, వైరల్ ఇన్ఫెక్షన్లు వంటి ఆరోగ్య సమస్యలు ఎక్కువగా కనిపిస్తాయి. ముఖ్యంగా పిల్లలు, వృద్ధులు, రోగనిరోధక శక్తి తక్కువగా ఉన్నవారు ఈ సీజన్లో మరింత జాగ్రత్తగా ఉండాలని వైద్య నిపుణులు సూచిస్తున్నారు. ముఖ్యంగా ఈ లక్షణాలు కనిపిస్తే.. తజాగ్రత్తలు తప్పనిసరిగా తీసుకోవాలని అంటున్నారు. అవేంటంటే..
వర్షాకాలంలో తాగునీరు కలుషితమయ్యే ప్రమాదం ఎక్కువగా ఉంటుంది. కలుషిత నీటి వల్ల వైరల్, బ్యాక్టీరియా ఇన్ఫెక్షన్లతో పాటు టైఫాయిడ్, విరేచనాలు వంటి సమస్యలు వచ్చే అవకాశం ఉంది. అందుకే నీటిని బాగా కాచి చల్లార్చిన తర్వాత మాత్రమే తాగడం మంచిది. బయటకు వెళ్లినప్పుడు కూడా శుభ్రమైన తాగునీటినే ఉపయోగించాలి.ఇంటి పరిసరాలు తడిగా, మురికిగా ఉంటే దోమలు, ఈగలు, క్రిములు పెరిగే అవకాశం ఉంటుంది. దీంతో డెంగ్యూ, మలేరియా వంటి వ్యాధుల ప్రమాదం కూడా పెరుగుతుంది. ఇంట్లో గాలి బాగా ఆడేలా చూడాలి. నీరు నిల్వ ఉండకుండా జాగ్రత్త పడాలి. తరచూ నేల, బాత్రూమ్, వంటగదిని శుభ్రం చేయడం ద్వారా ఇన్ఫెక్షన్ల ప్రమాదాన్ని తగ్గించవచ్చు.
వర్షాకాలంలో బయట విక్రయించే ఆహారం త్వరగా కలుషితమయ్యే అవకాశం ఉంటుంది. అలాంటి ఆహారం తీసుకోవడం వల్ల కడుపు ఇన్ఫెక్షన్లు, ఫుడ్ పాయిజనింగ్ సమస్యలు రావచ్చు. కాబట్టి ఇంట్లో తాజాగా తయారుచేసిన వేడి ఆహారాన్ని మాత్రమే తీసుకోవాలి. అలాగే సూప్లు, వేడి పాలు, హెర్బల్ టీ వంటి వేడి పానీయాలు శరీరానికి ఉపశమనం కలిగిస్తాయి. వర్షంలో తడిసిన బట్టలతో ఎక్కువసేపు ఉండటం వల్ల శరీర ఉష్ణోగ్రత తగ్గి జలుబు, దగ్గు వచ్చే ప్రమాదం పెరుగుతుంది. కాబట్టి వర్షంలో తడిస్తే వెంటనే పొడి దుస్తులు ధరించి, జుట్టును కూడా పూర్తిగా ఆరబెట్టుకోవాలి. అవసరమైతే గోరువెచ్చని నీటితో స్నానం చేయడం మంచిది.
ఈ సీజన్లో రోగనిరోధక శక్తిని బలోపేతం చేసే ఆహారం తీసుకోవడం చాలా ముఖ్యం. తులసి, అల్లం, పసుపు, వెల్లుల్లి వంటి సహజ పదార్థాలు శరీర రక్షణ వ్యవస్థకు మేలు చేస్తాయి. అలాగే నిమ్మకాయ, ఉసిరి, నారింజ వంటి విటమిన్-సి అధికంగా ఉండే పండ్లు, ఆకుకూరలు, ప్రోటీన్ అధికంగా ఉండే ఆహారం తీసుకోవడం వల్ల శరీరం వైరస్లతో పోరాడే శక్తిని పెంచుకుంటుంది. బయట నుంచి ఇంటికి వచ్చిన వెంటనే చేతులను సబ్బుతో శుభ్రంగా కడుక్కోవాలి. తుమ్మేటప్పుడు లేదా దగ్గేటప్పుడు నోరు, ముక్కును రుమాలు లేదా మోచేతితో కప్పుకోవాలి. జలుబు లేదా జ్వరం ఉన్నవారితో అత్యంత సన్నిహితంగా ఉండకుండా జాగ్రత్త పడాలి. వ్యక్తిగత పరిశుభ్రత పాటించడం ద్వారా అనేక ఇన్ఫెక్షన్లను నివారించవచ్చు.
జ్వరం, తీవ్రమైన దగ్గు, గొంతు నొప్పి, శ్వాస తీసుకోవడంలో ఇబ్బంది, విరేచనాలు వంటి లక్షణాలు రెండు మూడు రోజులకుపైగా కొనసాగితే వెంటనే వైద్యుడిని సంప్రదించాలి. స్వయంగా మందులు వాడటం కంటే వైద్యుల సలహాతో చికిత్స తీసుకోవడం సురక్షితం.
