High Protein Breakfast: ప్రస్తుత కాలంలో చాలామంది ఆరోగ్యకరమైన లేదా పోషకాలు కలిగిన ఆహార పదార్థాలు తీసుకోవాలని అనుకుంటున్నారు. అయితే అధికంగా ప్రోటీన్లు ఇచ్చే పదార్థాలు అధిక ఖర్చుతో కూడుకొని ఉన్నాయి. ఇలాంటి సమయంలో కొన్నింటి మిశ్రమం ద్వారా ఇంట్లోనే విటమిన్లు, ఖనిజాలు అందించే ఆహార పదార్థాలను తయారు చేసుకోవచ్చు. ఇలా తయారు చేసుకున్న పదార్థాలలో ఉదయం అల్పాహారం లేదా సాయంత్రం స్నాక్స్ గా తీసుకుంటే శరీరానికి ప్రోటీన్లు అందించడమే కాకుండా అనవసరపు కొవ్వు పేరుకు పోకుండా ఉంటుంది. ఇంతకీ దీనిని ఎలా తయారు చేసుకోవాలి? అసలు ఏంటిది?
మనం కిచెన్ గదితోపాటు మార్కెట్లో తరచుగా ఎండు బఠానీలను చూస్తూ ఉంటాం. వీటికి మరికొన్ని పదార్థాలను కలిపి తింటే పోషకాహారం అవుతుంది అని కొందరు ఆహార పదార్థాలు తయారు చేసే నిపుణులు పేర్కొంటున్నారు. ఎండు బఠానీలు, పల్లీలు, మొక్కజొన్న గింజలు ఒక్కో కప్పుతో తీసుకోవాలి. ఈ మిశ్రమంలో రెండు టేబుల్ స్పూన్ల తేనె, ఒక టేబుల్ స్పూన్ నూనె లేదా నెయ్యి, అర టేబుల్ స్పూన్ ఆవాలు, కొద్దిగా జీలకర్ర, మూడు పచ్చిమిర్చి, తగినంత అల్లం తురుము, కొద్దిగా పసుపు, ఉప్పు పదార్థాలను దగ్గర ఉంచుకోవాలి.
ఎండు బఠానీలతో పాటు పల్లీలను ముందుగా నానబెట్టాలి. ఇలా నానబెట్టడం వల్ల ఉడికించడానికి సులభం అవుతుంది. బఠానీలు మెత్తగా మారిన తరువాత మొక్కజొన్న గింజలతో కలిసి కుక్కర్ లో వేసి ఉడికించాలి. ఆ తరువాత ఒక్ పాన్ తీసుకొని అందులో టేబుల్ స్పూన్ నూనె లేదా నెయ్యి వేసి వేడి చేయాలి. ఆ తరువాత ఆవాలు, జీలకర్ర వేయించాలి. ఇప్పుడు కొద్దిగా పచ్చిమిర్చి, అల్లం తురుము, కరివేపాకు వేసి మిశ్రమం చేయాలి. ఇప్పుడు ఉడికించిన పల్లీలు, బఠానీలు, మొక్కజొన్న గింజలను ఇందులో వేసి కలపాలి. ఇలా మూడు నిమిషాల పాటు తాలింపు చేయాలి.
చివరలో కాస్త నిమ్మరసం వేసి రెండు టేబుల్ స్పూన్ల తేనె వేసి బాగా కలపాలి. ఆ తరువాత ఒక పాత్రలో వేసుకొని తింటే చాలా రుగా ఉంటుంది. ఈ పదార్థం రుచిగా ఉండడంతో పాటు ఆరోగ్యం కూడా అందిస్తుంది. బఠానీల్లో ప్రోటీన్, మొక్కజొన్నల్లో కార్బోహైడ్రేట్ల వంటి పోషకాలు ఉంటాయి. ఇవి శరీరానికి ఎంతో మేలు చేస్తాయి. బయట లభించే ఫాస్ట్ ఫుడ్, ప్రాసెస్ ఫుడ్ కంటే ఇవి ఎంతో ఆరోగ్యకరం.
అయితే వీటిని తీసుకునే క్రమంలో ఆరోగ్య రక్షణలు పాటించాలి. ప్రత్యేక ఆరోగ్య సమస్యలు ఉన్నవారు వైద్యులను సంప్రదించి తీసుకోవాలి. గ్యాస్, అజీర్ణ సమస్యలు ఉన్నవారు వీటికి దూరంగా ఉండడమే మంచిది. అలాగే లివర్ సమస్యలు ఉన్నవారు కూడా వీటిని తీసుకోవడం అంతమంచిది కాదు.
