Comedian Riyaz: సినీ ప్రముఖులు రాజకీయాల్లో కూడా రాణిస్తున్న విషయం అందరికీ తెలిసిందే. గతంలో ముఖ్యమంత్రులుగా కూడా పని చేశారు. కాగా ప్రస్తుతం పలువురు నటీనటులు ఎమ్మెల్యే గా కూడా కొనసాగుతూ నటిస్తున్నారు. వారిలో బాలకృష్ణ, నటి రోజా ఉండగా… పవర్ స్టార్ పవన్ కళ్యాణ్ రాజకీయాల్లో యాక్టివ్ గా ఉంటూనే సినిమాల్లో నటిస్తున్నారు. అయితే ఇప్పుడు ఆ రేంజ్ లో కాకపోయిన మున్సిపల్ ఎన్నికల్లో పోటీకి రెడీ అయ్యాడు ఒక బుల్లితెర కమెడియన్. జీ తెలుగులో ప్రసారం అవుతున్న ‘అదిరింది’ షో ద్వారా కమెడియన్ రియాజ్ తెలుగు ప్రేక్షకులకు పరిచయమయ్యాడు.
ఈ షోలో తన కామెడీతో అందర్నీ అలరించాడు. ఇప్పుడు యూట్యూబ్ లో కూడా పలు వెబ్ సిరీస్ లు చేస్తూ ప్రేక్షకుల్లో మంచి గుర్తింపు తెచ్చుకుంటున్నాడు. అప్పుడప్పుడు సినిమాల్లో కూడా చిన్న పాత్రలు చేస్తున్నాడు. సద్దాం స్కిట్స్ లో నటించే రియాజ్ పవన్ కళ్యాణ్ ఫ్యాన్ అని షోలో వేసే స్కిట్స్ ద్వారా తెలిపాడు. చాలా మంది సెలబ్రిటీలు, ఆర్టిస్టులు జనసేనకు బయట నుంచి మద్దతు ఇస్తున్నారు కానీ ఎవరూ జనసేనలో చేరట్లేదు అనే చెప్పాలి.
అయితే తాజాగా రియాజ్ తాను జనసేన పార్టీలో చేరుతున్నానని నెల్లూరులోని 30వ డివిజన్ నుంచి మున్సిపల్ ఎన్నికల్లో పోటీ చేస్తానని ప్రకటించారు. ఏపీలో రాష్ట్ర వ్యాప్తంగా 12 మున్సిపాలిటీలు, ఒక కార్పొరేషన్ ఎన్నికలు జరగాల్సి ఉంది. త్వరలోనే వీటి నోటిఫికేషన్ విడుదల కానుంది. ప్రస్తుతం ఈ వార్త సోషల్ మీడియాలో వైరల్ అవుతుంది.
